ଖୋର୍ଦ୍ଧା: ଆଜି ମୁଖ୍ୟମନ୍ତ୍ରୀ ଭର୍ଚୁଆଲ କନଫରେନ୍ସ ମାଧ୍ୟମରେ ୧୬ ନମ୍ବର ଜାତୀୟ ରାଜପଥର ପୋଲିସ ପାଟ୍ରୋଲିଂ ବ୍ୟବସ୍ଥାର ଶୁଭାରମ୍ଭ କରିଛନ୍ତି। ୧୬ ନମ୍ବର ଜାତୀୟ ରାଜପଥର ପିତାପଲ୍ଲୀ ଠାରୁ ବାଲୁଗାଁ ପର୍ଯ୍ୟନ୍ତ ଏହି ପାଟ୍ରୋଲିଂ ବ୍ୟବସ୍ଥା କାର୍ଯ୍ୟ କରିବ। ଏହା ଦ୍ଵାରା ଏହି ରାଜପଥରେ ଯାତାୟାତ କରୁଥବା ଯାତ୍ରୀ ବିଶେଷ ଉପକୃତ ହେବେ ବୋଲି ଆଶା କରାଯାଉଛି। ଏହା ଦ୍ଵାରା ଚୋରୀ ଡକାୟତି ରୋକିବା ସହ ଦୁର୍ଘଟଣାଗ୍ରସ୍ତ ଲୋକଙ୍କୁ ଉଦ୍ଧାର କରାଯାଇ ତୁରନ୍ତ ଚିକିତ୍ସା ପାଇଁ ହସ୍ପିଟାଲକୁ ପଠାଯାଇପାରିବ।
ଖୋର୍ଦ୍ଧା ଜିଲ୍ଲା ପ୍ରଶାସନ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ କେନ୍ଦ୍ରାଞ୍ଚଳ ପୋଲିସ ଡ଼ି.ଆଇ.ଜି. ଆଶିଷ ସିଂ, ଖୋର୍ଦ୍ଧା ଜିଲ୍ଲାପାଳ ସନତ ମହାନ୍ତି, ଚିଲିକା ବିଧାୟକ ତଥା ଜିଲ୍ଲା ଯୋଜନା ବୋର୍ଡ଼ ଅଧ୍ୟକ୍ଷ ପ୍ରଶାନ୍ତ କୁମାର ଜଗଦ୍ଦେବ, ଖୋର୍ଦ୍ଧା ବିଧାୟକ ଜ୍ୟୋତିରିନ୍ଦ୍ର ନାଥ ମିତ୍ର ପ୍ରମୁଖ ଉପସ୍ଥିତ ଥିଲେ।
ଏହି ବ୍ୟବସ୍ଥାକୁ ତିନୋଟି ଭାଗରେ ଭାଗ କରାଯାଇଛି। ପ୍ରଥମ ପାଟ୍ରୋଲିଙ୍ଗ ଗାଡି ପିତାପଲ୍ଲୀ ଠାରୁ ଗୋଡିପଡ଼ା ପର୍ଯ୍ୟନ୍ତ ତଦାରଖ କରିବ, ଦ୍ଵିତୀୟ ଗାଡ଼ି ଗୋଡିପଡ଼ା ଠାରୁ କୁହୁଡି ପର୍ଯ୍ୟନ୍ତ ଏବଂ ତୃତୀୟ ଗାଡ଼ି କୁହୁଡି ଠାରୁ ବାଲୁଗାଁ ନାଭାଲ ଛକ ପର୍ଯ୍ୟନ୍ତ ତଦାରଖ କରିବ ବୋଲି ଚିଲିକା ବିଧାୟକ ପ୍ରକାଶ କରିଛନ୍ତି।
ଉଲ୍ଲେଖ ଯୋଗ୍ୟ ଯେ, ଏହି ଜାତୀୟ ରାଜପଥରେ ଦିନକୁ ଦିନ ଲୁଟପାତ ସଂଖ୍ୟା ବଢୁଥିବା ବେଳେ ଦୁର୍ଘଟଣା ସଂଖ୍ୟାରେ ମଧ୍ୟ ବୃଦ୍ଧି ପାଉଛି। ତେବେ ଏହା ଦ୍ଵାରା ଲୁଟେରା କବଳରୁ ଲଗାମ ଲାଗିବ ବୋଲି ଆଶା କରାଯାଉଛି।
