ଭୁବନେଶ୍ୱର: ରାଜ୍ୟରେ ଜଳସେଚନର ସୁପରିଚାଳନା ତଥା ଜଳର ସୁଷମ ବଣ୍ଟନ ପାଇଁ ଜଳସମ୍ପଦ ବିଭାଗର ବୃହତ୍ ଓ ମଧ୍ୟମ ଜଳସେଚନ ଶାଖାରେ କାର୍ଯ୍ୟରତ ଯନ୍ତ୍ରୀମାନଙ୍କ ନିମନ୍ତେ “ ଜଳ ସମ୍ପଦର ବିକାଶ ଓ ପରିଚାଳନା” ସମ୍ବନ୍ଧରେ ଏକ ୫ ଦିନିଆ ପ୍ରଶିକ୍ଷଣ କାର୍ୟ୍ୟକ୍ରମ ପ୍ରତାପନଗରୀ ସ୍ଥିତ ଜଳ ଓ ଭୂ ପରିଚାଳନା ପ୍ରତିଷ୍ଠାନ (ୱାଲମୀ) ଠାରେ ଆଜି ଉଦ୍ଘାଟିତ ହୋଇଯାଇଛି।
ଏହି କାର୍ଯ୍ୟକ୍ରମରେ ମହାନଦୀ-କାଠଯୋଡି ସିଷ୍ଟମ ଓ ମୁଖ୍ୟ ଯନ୍ତ୍ରୀ, ଡ୍ରେନେଜ୍ ଅଧୀନରେ ଥିବା ୩୩ ଜଣ ଯନ୍ତ୍ରୀ ଯୋଗଦାନ କରିଛନ୍ତି। ମୁଖ୍ୟ ଯନ୍ତ୍ରୀ, ଡ୍ରେନେଜ୍ ତଥା ୱାଲମୀ, ଓଡିଶାର ନିର୍ଦ୍ଦେଶକ, ଇଂ ବିଜୟ କୁମାର ସାମଲ ଏହାକୁ ଉଦ୍ଘାଟନ କରିଥିଲେ। ମୁଖ୍ୟ ଯନ୍ତ୍ରୀ, ଜଳ ସମ୍ପଦ ବିଭାଗ ଶ୍ରୀଯୁକ୍ତ ଦେବୀଦତ୍ତ ରମଣୀ ରଞ୍ଜନ ପଟ୍ଟନାୟକ, ସମ୍ମାନୀୟ ଅତିଥ ଭାବରେ ଯୋଗଦେଇଥିଲେ।
ଓ୍ୱାଲମୀର ପ୍ରମୁଖ ପ୍ରଶିକ୍ଷଣ ସଂଯୋଜକ, ପ୍ରଫେସର ସୁଧନ୍ୱା ଚନ୍ଦ୍ର ପାତ୍ର ସାଗତ ଭାଷଣ ପ୍ରଦାନ କରିଥିବା ବେଳେ ସହଯୋଗୀ ପ୍ରାଧ୍ୟାପିକା ଇଂ ଇତିଶ୍ରୀ ମିଶ୍ର ଧନ୍ୟବାଦ ଅର୍ପଣ କରିଥିଲେ। ୱାଲମୀ, ଓଡିଶାର ଯୁଗ୍ମ ନିର୍ଦ୍ଦେଶକ ଓ ଉପ ନିର୍ଦ୍ଦେଶକ ତଥା ଅନ୍ୟ କର୍ମଚାରୀମାନେ ଏହି କାର୍ୟ୍ୟକ୍ରମରେ ଯୋଗଦାନ କରିଥିଲେ। ୱାଲମୀର ପ୍ରଫେସର, ଇଂ ଅରୁଣ କୁମାର ସାମନ୍ତରାୟ, ଉଦ୍ଘାଟନୀ କାର୍ୟ୍ୟକ୍ରମ ପରିଚାଳନା କରିଥିଲେ।