ନୂଆଦିଲ୍ଲୀ: ଛତିଶଗଡରେ ନକ୍ସଲମାନଙ୍କ ବିରୋଧରେ ଆରମ୍ଭ ହୋଇଥିବା ଅଭିଯାନରେ ମଙ୍ଗଳବାର ଦିନ ସୁରକ୍ଷା ବାହିନୀ ସବୁଠୁ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି। କାଙ୍କେର ଅଞ୍ଚଳରେ ହୋଇଥିବା ଏକ ଏନକାଉଣ୍ଟରରେ ୨୯ ଜଣ ନକ୍ସଲଙ୍କ ମୃତ୍ୟୁ ହୋଇଛି। ଏହି ସମସ୍ତ ମାଓବାଦୀଙ୍କ ମୃତଦେହ ମଧ୍ୟ ଉଦ୍ଧାର କରାଯାଇଛି। ସର୍ଚ୍ଚ ଅପରେସନ ଚାଲିଥିବାରୁ ଏହି ସଂଖ୍ୟା ବୃଦ୍ଧି ପାଇପାରେ ବୋଲି ପୋଲିସ କହିଛି।
ଏହି ଏନକାଉଣ୍ଟରରେ ଦୁଇଜଣ ସୀମା ସୁରକ୍ଷା ବଳ (ବିଏସ୍ଏଫ୍) ଯବାନ ଏବଂ ଜିଲ୍ଲା ପୋଲିସର ଜିଲ୍ଲା ରିଜର୍ଭ ଗାର୍ଡ (DRG) କର୍ମଚାରୀଙ୍କ ସମେତ ତିନିଜଣ ସୁରକ୍ଷା କର୍ମୀ ମଧ୍ୟ ଆହତ ହୋଇଛନ୍ତି। ସୁରକ୍ଷା ବାହିନୀ ଅନୁଯାୟୀ, ଯଦି ନକ୍ସଲଙ୍କ ସଂଖ୍ୟା ୩୦ ଅତିକ୍ରମ କରେ, ତେବେ ଗତ ୧୦ ବର୍ଷ ମଧ୍ୟରେ ଏହା ଫୋର୍ସ ଦ୍ୱାରା ପରିଚାଳିତ ସବୁଠାରୁ ବଡ ଅପରେସନ୍ ହେବ। ଏହାପୂର୍ବରୁ, ଗ୍ରେହାଉଣ୍ଡ କମାଣ୍ଡୋ ୨୦୧୬ ରେ ଏକ ଅପରେସନରେ ୩୦ ଜଣ ନକ୍ସଲଙ୍କୁ ମାରିଥିଲେ। ୨୦୨୧ ମସିହାରେ ହୋଇଥିବା ଅନ୍ୟ ଏକ ଅପରେସନ୍ ରେ, ନକ୍ସଲାଇଟ୍ ନେତା ମିଲିନ୍ଦ ତେଲତୁମ୍ବଡେଙ୍କ ସହ ୨୫ ଜଣ ନିହତ ହୋଇଥିଲେ।