ନୂଆଦିଲ୍ଲୀ: ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣକୁ ଆମେରିକା, ଇସ୍ରାଏଲ ସମେତ ବିଶ୍ୱର ଅନେକ ଦେଶ କଡ଼ା ସମାଲୋଚନା କରିଛନ୍ତି। ଏହି ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବହୁ ପରିମାଣରେ ବୃଦ୍ଧି ପାଇଛି। ଏହି ସମ୍ପର୍କରେ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରେସ୍ କହିଛନ୍ତି ଯେ, ଗତ କିଛି ବର୍ଷ ମଧ୍ୟରେ ଏଥର ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ସର୍ବାଧିକ ବୃଦ୍ଧି ପାଇଛି। ସମ୍ପର୍କ ଏକ ଉତ୍କଟ ସ୍ଥିତିରେ ପହଞ୍ଚିଛି ତାହା ଦେଖି ମୁଁ ଦୁଃଖିତ।
‘ସାଧାରଣ ଲୋକଙ୍କୁ ଟାର୍ଗେଟ କରିବା ଗ୍ରହଣୀୟ ନୁହେଁ’:
ଜାତିସଂଘର ମହାସଚିବ କହିଛନ୍ତି ଯେ, ୨୨ ଏପ୍ରିଲରେ ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣ ପରେ ମୁଁ ଲୋକଙ୍କ ଭାବନାକୁ ବୁଝିପାରୁଛି। ମୁଁ ପୁଣି ଥରେ ସେହି ଆକ୍ରମଣକୁ ଦୃଢ଼ ନିନ୍ଦା କରୁଛି ଏବଂ ପୀଡିତଙ୍କ ପରିବାର ପ୍ରତି ମୋର ସମବେଦନା ପ୍ରକାଶ କରୁଛି। ସେ ଆହୁରି ମଧ୍ୟ କହିଛନ୍ତି ଯେ, ସାଧାରଣ ନାଗରିକଙ୍କୁ ଟାର୍ଗେଟ କରିବା ଭୁଲ।
ଆଣ୍ଟୋନିଓ ଗୁଟେରେସ କହିଛନ୍ତି ଯେ, ଜାତିସଂଘ ଉତ୍ତେଜନା ହ୍ରାସ, କୂଟନୀତି ଏବଂ ଶାନ୍ତି ପ୍ରତି ନୂତନ ପ୍ରତିବଦ୍ଧତାକୁ ପ୍ରୋତ୍ସାହିତ କରୁଥିବା ଯେକୌଣସି ପଦକ୍ଷେପକୁ ସମର୍ଥନ କରିବାକୁ ପ୍ରସ୍ତୁତ। ଜାତିସଂଘର ମହାସଚିବ ଭାରତ ଏବଂ ପାକିସ୍ତାନକୁ ସର୍ବାଧିକ ସଂଯମତା ଅବଲମ୍ବନ କରିବାକୁ ଆହ୍ୱାନ କରିଛନ୍ତି।
ଜାତିସଂଘର ମହାସଚିବ କହିଛନ୍ତି ଯେ, ପହଲଗାମ ଆକ୍ରମଣରେ ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ମୁଁ ମୋର ସମବେଦନା ଜଣାଉଛି। ସାଧାରଣ ଲୋକଙ୍କ ଉପରେ ଆକ୍ରମଣକୁ ଆଦୌ ବରଦାସ୍ତ କରାଯାଇପାରିବ ନାହିଁ। ଯେଉଁମାନେ ଏହି ଆତଙ୍କବାଦୀ ଆକ୍ରମଣ କରିଛନ୍ତି ସେମାନଙ୍କୁ ଆଇନ ପରିସରକୁ ଅଣାଯାଇ କଠୋର ଦଣ୍ଡ ଦିଆଯିବା ଉଚିତ।
ମୁଁ ଭାରତ ଏବଂ ପାକିସ୍ତାନ ସରକାରଙ୍କୁ ସର୍ବାଧିକ ସଂଯମତା ଅବଲମ୍ବନ କରିବାକୁ ଏବଂ ପରିସ୍ଥିତିକୁ ଆହୁରି ଖରାପ କରିପାରୁଥିବା କାର୍ଯ୍ୟରୁ ଦୂରେଇ ରହିବାକୁ ଅନୁରୋଧ କରୁଛି। ଏହି ଦୁଇ ଦେଶ ମଧ୍ୟରେ ସଂଘର୍ଷ ଏହି ଅଞ୍ଚଳ ଏବଂ ବିଶ୍ୱ ସହ୍ୟ କରିପାରିବ ନାହିଁ, ଯାହାର ଲକ୍ଷ ଲକ୍ଷ ଲୋକଙ୍କ ପାଇଁ ଦୁଃଖଦ ପରିଣାମ ହେବ। ଜାତିସଂଘ ଚାର୍ଟର ଏବଂ ଅନ୍ତର୍ଜାତୀୟ ଆଇନର ନୀତିକୁ ସମ୍ମାନ ଦେଇ ଶାନ୍ତିପୂର୍ଣ୍ଣ ଭାବରେ ସେମାନଙ୍କର ମତଭେଦ ସମାଧାନ କରିବା ପାଇଁ ମୁଁ ଉଭୟ ପକ୍ଷକୁ ଆଲୋଚନା ଏବଂ କୂଟନୀତିରେ ନିୟୋଜିତ ହେବାକୁ ଆହ୍ୱାନ କରୁଛି।