ଭୁବନେଶ୍ବର: କିଛିଦିନର ବ୍ୟବଧାନ ପରେ ପୁଣି ଥରେ ପାଣ୍ଡିଆନଙ୍କୁ ଟାର୍ଗେଟ କରିଛନ୍ତି ବିଜେଡି ବିଧାୟକ ତଥା ସମ୍ବାଦ ସଂପାଦକ ସୌମ୍ୟରଞ୍ଜନ ପଟ୍ଟନାୟକ। ଆଜି ତାଙ୍କ ଖବର କାଗଜ ସମ୍ବାଦର ଆମଘର ହାଲଚାଲ ସ୍ତମ୍ବରେ ସେ ସିଧା ପାଣ୍ଡିଆନଙ୍କୁ ସମାଲୋଚନା କରିଛନ୍ତି। ପୂର୍ବରୁ ସେ ଏହିପରି ସମାଲୋଚନା କରିଆସୁଛନ୍ତି। ତେବେ ତାଙ୍କର ସମାଲୋଚନା ସେହି ସମାଲୋଚନା ଭିତରେ ହିଁ ରହି କୁଆଡେ ଉଭେଇ ଯାଉଛି।
ତେବେ ଏଥର ସେ ତାଙ୍କ ସ୍ତମ୍ବରେ ୫ଟି ସଚିବ ଭି କେ ପାଣ୍ଡିଆନଙ୍କୁ ଏକ ରାଜନୈତିକ ବ୍ୟକ୍ତିଭାବେ ପ୍ରମାଣିତ କରିବାକୁ ଚାହିଁଛନ୍ତି। ସେ କହିଛନ୍ତି ଯେ, ପାଣ୍ଡିଆନ ବିଭିନ୍ନ ଜିଲ୍ଲା ଗସ୍ତ ବେଳେ ପୁଣି ଥରେ ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ କରିବା ପାଇଁ ଲୋକଙ୍କୁ ଆହ୍ବାନ କରିଛନ୍ତି। ଏହା ଜଣେ ପ୍ରଶାସକ ହିସାବରେ କହିବା ଠିକ ନୁହେଁ ବୋଲି ସୌମ୍ୟରଂଜନ ତାଙ୍କ ଲେଖାରେ ଉଲ୍ଲେଖ କରିଛନ୍ତି। ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ହେବେ ହେଲେ ତାହା ପାଣ୍ଡିଆନ କିପରି କହୁଛନ୍ତି ବୋଲି ସୌମ୍ୟ ତାଙ୍କ ଲେଖାରେ ପ୍ରଶ୍ନ କରିଛନ୍ତି।
ସେହିପରି ସେ ଚନ୍ଦ୍ରଯାନ-୩ ଅଭିଯାନରେ ଛଅ ଶହ କୋଟି ଖର୍ଚ୍ଚ ହୋଇଥିବା ବେଳେ ପାଣ୍ଡିଆନଙ୍କ ଗସ୍ତ ଖର୍ଚ୍ଚ ମଧ୍ୟ ସେହିପରି ହୋଇଛି ବୋଲି ସେ ଉଲ୍ଲେଖ କରିଛନ୍ତି। ଏପରି ଖର୍ଚ୍ଚ ପଛରେ କଣ ରହିଛି କାରଣ ତାହା ତାଙ୍କୁ ବୁଝାପଡୁ ନାହିଁ ବୋଲି ସୌମ୍ୟରଞ୍ଜନ କହିଛନ୍ତି। ସାରା ଦେଶ ଯେପରି ଚନ୍ଦ୍ର ଭ୍ରମଣକୁ ଆଗ୍ରହ ସହକାର ସ୍ବୀକାର କରୁଛନ୍ତି, ଠିକ ସେହିପରି ଓଡିଶାରେ ମଧ୍ୟ ପାଣ୍ଡିଆନଙ୍କ ଭ୍ରମଣକୁ ସମସ୍ତେ ଗ୍ରହଣ କରୁଥିବାର ମନେ ହେଉଛି ବୋଲି ସେ କହିଛନ୍ତି।
ତେବେ ସୌମ୍ୟରଞ୍ଜନଙ୍କ ଏହି ଲେଖାକୁ କଡା ସମାଲୋଚନା କରିଛନ୍ତି ବିଜେଡି ନେତା ଅନୁଭବ ପଟ୍ଟନାୟକ। ସେ ସୌମ୍ୟରଞ୍ଜନଙ୍କୁ ଖୋଲା ଚ୍ୟାଲେଞ୍ଜ ଦେଇଛନ୍ତି। ସେ ତାଙ୍କ ଟୁଇଟରରେ ସୌମ୍ୟରଞ୍ଜନଙ୍କ ଉଲ୍ଲେଖରେ ଲେଖିଛନ୍ତି ଯେ, ୧୫ ଦିନ ପରେ ଆପଣ ନିଜ ଖବରକାଗଜରେ ଆଉ ଏକ ଲେଖା ଲେଖିଛନ୍ତି, ଯେଉଁଥିରୁ ସ୍ପଷ୍ଟ ପ୍ରମାଣିତ ହୋଇଛି ଯେ, ଆପଣ ଅତ୍ୟଧିକ ନିରାଶ ଏବଂ ହତାସ ହୋଇ ପଡିଛନ୍ତି।
ଆପଣ ଉଲ୍ଲେଖ କରିଛନ୍ତି ଯେ ୫ଟି ସଚିବ ଭିକେ ପାଣ୍ଡିଆନ ଏକ ବୈଠକରେ ନବୀନ ପଟ୍ଟନାୟକଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରାଇବା ପାଇଁ ଲୋକଙ୍କୁ ଆହ୍ବାନ କରିଥିଲେ। ମୁଁ ଆପଣଙ୍କୁ ଚ୍ୟାଲେଞ୍ଜ କରୁଛି ଯେ ପାଣ୍ଡିଆନ ଏହା କେଉଁଠି କହିଥିଲେ ତାହାର ପ୍ରମାଣ ଦିଅନ୍ତୁ। ୧୨ ଘଣ୍ଟା ମଧ୍ୟରେ ଆପଣ ଏହାକୁ ଆପଣଙ୍କ ଚ୍ୟାନେଲରେ ପ୍ରମାଣ ସହିତ ପ୍ରସାରଣ କରନ୍ତୁ। ଯଦି ଏହା ପ୍ରମାଣିତ କରାଇ ଦେବେ, ତେବେ ମୁଁ ରାଜନୀତିରୁ ସନ୍ୟାସ ନେବି ବୋଲି ଅନୁଭବ ସୌମ୍ୟଙ୍କୁ ଚ୍ୟାଲେଞ୍ଜ ଦେଇଛନ୍ତି। ଅନୁଭବ ଆହୁରି କହିଛନ୍ତି ଯେ, ଆପଣ ଯଦି ଏହାର ପ୍ରମାଣ ଦେଇ ନ ପାରିବେ ତେବେ ଓଡିଶା ଲୋକେ ଜାଣିବେ ଯେ, ଆପଣ ଜଣେ ମିଛୁଆ।
୫ଟି ସଚିବଙ୍କ ଗସ୍ତ ଖର୍ଚ୍ଚକୁ ନେଇ ମଧ୍ୟ ଅନୁଭବ ସୌମ୍ୟରଂଜନଙ୍କୁ ଚ୍ୟାଲେଞ୍ଜ କରିଛନ୍ତି। ସେ କହିଛନ୍ତି ଯେ, ଆପଣ ଉଲ୍ଲେଖ କରିଛନ୍ତି ଯେ ୫-ଟି ସଚିବଙ୍କ ଗସ୍ତରେ ୩୦୦ କୋଟି ଖର୍ଚ୍ଚ ହୋଇଛି। ଆପଣଙ୍କ ପାଖରେ କୈଣସି ପ୍ରମାଣ ଅଛି କି? ଆପଣ ଭଲଭାବେ ଜାଣିଛନ୍ତି ଯେ କିଛି ବର୍ଷ ପୂର୍ବେ ଓଡିଶାର ତତ୍କାଳୀନ ପେଟ୍ରୋଲିୟମ ମନ୍ତ୍ରୀ ବିଜ୍ଞାପନ ପାଇଁ ୬୦୦ କୋଟି ଖର୍ଚ୍ଚ କରିଛନ୍ତି। ସେତେବେଳେ ଆପଣଙ୍କର ବିବେକ କେଉଁଠାରେ ଥିଲା ବୋଲି ପ୍ରଶ୍ନ ପଚାରିଛନ୍ତି ଅନୁଭବ।
ସେ ପୁଣି କହିଛନ୍ତି ଯେ, ଆପଣ ଏବଂ ତତ୍କାଳୀନ ପେଟ୍ରୋଲିୟମ ମନ୍ତ୍ରୀଙ୍କ ସହିତ ଚନ୍ଦ୍ରକୁ ଯାଇ ସେଠାରେ ବସନ୍ତୁ। ୫-ଟି ସଚିବ ଯେଉଁ ଓଡିଶା ଗସ୍ତ କରୁଛନ୍ତି ସେଥିରେ ସେ ତାଙ୍କ ପରିବାରକୁ ଭେଟିବାକୁ ଯାଉ ନାହାଁନ୍ତି। ସେ ଓଡିଶାର ଲୋକମାନଙ୍କୁ ଭେଟିବାକୁ ଯାଉଛନ୍ତି, ସେମାନଙ୍କର ଅଭିଯୋଗ ଶୁଣୁଛନ୍ତି ଏବଂ ସେମାନଙ୍କଠାରୁ ନିବେଦନ ଗ୍ରହଣ କରୁଛନ୍ତି। ଏଥିରେ କେଉଁଠି ଭୁଲ ରହିଲା ବୋଲି ଅନୁଭବ ପ୍ରଶ୍ନ କରିଛନ୍ତି।
ଖଣ୍ଡପଡା ରାଜନୀତିକୁ ନେଇ ଅନୁଭବ ମଧ୍ୟ ସୌମ୍ୟଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ପାଣ୍ଡିଆନଙ୍କ ନୟାଗଡ ଗସ୍ତ ବେଳେ ସେ ଖଣ୍ଡପଡାବାସୀଙ୍କଠାରୁ ସର୍ବାଧିକ ସଂଖ୍ୟକ ନିବେଦନ ଗ୍ରହଣ କରିଛନ୍ତି। ଏହା ଦର୍ଶାଉଛି ଯେ ଖଣ୍ଡପଡାର ଲୋକମାନେ ଆପଣଙ୍କ ଉପରେ ସଂପୂର୍ଣ୍ଣ ବିଶ୍ୱାସ ହରାଇଛନ୍ତି। ଏହା ଆପଣଙ୍କୁ କଷ୍ଟ ଦେଉଛି, ଯେଉଁଥି ପାଇଁ ଆପଣ ଆପଣଙ୍କର ଖବରକାଗଜ ଲେଖା ମାଧ୍ୟମରେ କ୍ରୋଧ ବାହାର କରୁଛନ୍ତି।
ସୌମ୍ୟରଂଜନ ତାଙ୍କ ସମ୍ଭରେ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କୁ ବିଜେଡି କର୍ମିମାନେ ଘେରାଉ କରିବା ଠିକ ନୁହେଁ ବୋଲି ଉଲ୍ଲେଖ କରିଛନ୍ତି। ତାହାର ଜବାବ ମଧ୍ୟ ଅନୁଭବ ପ୍ରଦାନ କରିଛନ୍ତି। ସେ କହିଛନ୍ତି ଯେ ବହୁ ଠକେଇ ମାମଲାରେ ପ୍ରଦୀପ ପାଣିଗ୍ରାହୀ ଚାର୍ଜସିଟ୍ ହୋଇଛନ୍ତି। ସେ ଜାମିନରେ ଆସିଥିବା ଜଣେ ଅପରାଧୀ। ଆପଣଙ୍କ ଚ୍ୟାନେଲ ଏବଂ ଖବରକାଗଜ ମଧ୍ୟ ତାଙ୍କ ଠକେଇ ସଂପର୍କରେ ପ୍ରସାରଣ କରିଥିଲା। ଜାମିନରେ ଆସିଥିବା ଏପରି ଅପରାଧୀଙ୍କୁ ଆପଣ ସମର୍ଥନ କରୁଛନ୍ତି ବୋଲି ଆପଣ ଲଜ୍ଜିତ ନୁହଁନ୍ତି କି ବୋଲି ଅନୁଭବ ସୌମ୍ୟଙ୍କୁ ପ୍ରଶ୍ନ କରିଛନ୍ତି।
ଆପଣଙ୍କର ଏହି ଲେଖାରୁ ଆପଣଙ୍କ ବ୍ୟକ୍ତିଗତ ଏବଂ ରାଜନୈତିକ ଲୋଭ ଓଡ଼ିଶାର ଲୋକଙ୍କ ଆଗରେ ସଂପୂର୍ଣ୍ଣ ଭାବେ ପ୍ରକାଶ ପାଇଛି। ତଥାପି ମୁଁ ଆଶା କରେ ୧୨ ଘଣ୍ଟା ମଧ୍ୟରେ ମୁଁ ମାଗିଥିବା ପ୍ରମାଣ ଆପଣ ଆପଣଙ୍କ ଚ୍ୟାନେଲ ମାଧ୍ୟମରେ ପ୍ରସାରଣ କରିବେ ବୋଲି ଅନୁଭବ ଉଲ୍ଲେଖ କରିଛନ୍ତି।
ସୌମ୍ୟରଂଜନ ପଟ୍ଟନାୟକ ଏବଂ ଅନୁଭବ ପଟ୍ଟନାୟକଙ୍କ ମଧ୍ୟରେ ଏପରି ଜବାବ ପ୍ରତିଜବାବକୁ ନେଇ ଓଡିଶା ରାଜନୀତିରେ ବେଶ ରୋଚକ ଖେଳିଯାଇଛି।