ଭୁବନେଶ୍ବର, କେନ୍ଦ୍ର ମନ୍ତ୍ରୀମଣ୍ଡଳରେ ଅଶ୍ବିନୀ ବୈଷ୍ଣବଙ୍କ କ୍ଷମତା ବୃଦ୍ଧି ଏବଂ ଧର୍ମେନ୍ଦ୍ରଙ୍କ ଶକ୍ତିହ୍ରାସ ପରେ ଚିନ୍ତାରେ ରାଜ୍ୟ ବିଜେପି। କାରଣ ହେଲା ବର୍ତ୍ତମାନ ଓଡିଶାର ବିଭିନ୍ନ ପୋଷ୍ଟର ବ୍ୟାନରରେ ବିଜେପିର ମୁଖ୍ୟ ଆକର୍ଷଣରେ କିଏ ରହିବ। ଏ ନେଇ ଦଳ ଭିତରେ ଚାଲିଛି ଘଣ୍ଟାଚକଟା ।
ପୂର୍ବରୁ ଶକ୍ତିଶାଳୀ କେନ୍ଦ୍ରମନ୍ତ୍ରୀ ଭାବେ ଧର୍ମେନ୍ଦ୍ରଙ୍କର ଓଡିଶା ବିଜେପିରେ ଅଖଣ୍ଡ କ୍ଷମତା ଥିଲା। ସେହି ଆଧାରରେ ସେ ଓଡିଶା ବିଜେପିର ଅଘୋଷିତ ସୁପ୍ରିମୋ ଭାବେ କାର୍ଯ୍ୟ କରୁଥିଲେ। ବିଜେପିର ସମସ୍ତ କାର୍ଯ୍ୟକ୍ରମର ପ୍ରଚାର ପତ୍ରରେ ଧର୍ମେନ୍ଦ୍ର ମୁଖ୍ୟ ଆକର୍ଷଣ ହୋଇଛନ୍ତି। ଅନେକ ପୋଷ୍ଟର ଏବଂ ହୋଡିଂସରେ ଧର୍ମେନ୍ଦ୍ରଙ୍କ ବଡମୁଣ୍ଡ ଏବଂ ରାଜ୍ୟର ଅନ୍ୟ ନେତାମାନଙ୍କ ଛୋଟ ମୁଣ୍ଡ ରହୁଥିଲା। ତାଙ୍କୁ ଧରି ବର୍ତ୍ତମାନ ବିଜେପି ରାଜ୍ୟରେ ରାଜନୀତି କରୁଛି।
ତେବେ ବର୍ତ୍ତମାନ ଅଶ୍ବିନୀ ବୈଷ୍ଣବ ପାୱାରଫୁଲ ମନ୍ତ୍ରୀ ହେବା ପରେ ତାଙ୍କୁ ପୋଷ୍ଟରବଏ କରାଯିବ କି ନାହିଁ ସେହି ଚିନ୍ତା ବିଜେପି ନେତାଙ୍କୁ ଘାରିଛି। ହେଲେ ଅଶ୍ବିନୀଙ୍କୁ ନେଇ ଓଡିଶା ବିଜେପି ପାଇଁ ଦୁଇଟି ବଡ ଅଡୁଆ ରହିଛି। ତାହା ହେଲା ସେ ହେଉଛନ୍ତି ରାଜ୍ୟ ଶାସକ ଦଳ ବିଜେଡିର ସମର୍ଥିତ ସାଂସଦ। ତେଣୁ ତାଙ୍କୁ ପୋଷ୍ଟର ବଏ କଲେ ଲୋକେ ଏହାକୁ କେତେଦୂର ଗ୍ରହଣ କରିବେ ସେ ନେଇ ସନ୍ଦେହ ରହିଛି।
ଦ୍ବିତୀୟରେ ତାଙ୍କୁ ଓଡିଶାର ଲୋକେ ଭଲ ଭାବେ ଜାଣନ୍ତି ନାହିଁ। ଏପରିକି ସେ ଓଡିଶା ରାଜନୀତିରେ ସକ୍ରିୟ ରହିବେ କି ନାହିଁ ତାହା ମଧ୍ୟ ସ୍ପଷ୍ଟ ହୋଇ ନାହିଁ। ଅନ୍ୟ ଏକ ବଡ କଥା ହେଲା ଯେ, ଅଶ୍ବିନୀ ବୈଷ୍ଣବ ମୁଖ୍ୟମନ୍ତ୍ରୀ ତଥା ବିଜେଡି ବିରୋଧରେ କେବେ କିଛି କହିପାରିବେ ନାହିଁ। ତେଣୁ ବିଜେଡିକୁ ଯେଉଁ ମାଡ ମାରିବ ବୋଲି ବିଜେପି ଭାବିଛି ତାହା ଅଶ୍ବିନୀଙ୍କ ଦ୍ବାରା ହୋଇପାରିବ ନାହିଁ।
ଏସବୁକୁ ନେଇ ବିଜେପି ବର୍ତ୍ତମାନ ଏକ ଅଡୁଆ ପରିସ୍ଥିତିରେ ପଡିଯାଇଛି। ଅଶ୍ବିନୀଙ୍କୁ ପୋଷ୍ଟର ବଏ କଲେ କିଛି ଲାଭ ହେବ ନାହିଁ ବୋଲି ଦଳ ଭାବୁଛି। ହେଲେ ସେ କେନ୍ଦ୍ରରେ ଜଣେ ପାୱାରଫୁଲ ମନ୍ତ୍ରୀ ହୋଇଥିବାରୁ ତାଙ୍କୁ ପୁରା ବାଇପାଶ ମଧ୍ୟ କରିପାରିବ ନାହିଁ। ଫଳରେ ବର୍ତ୍ତମାନ କଣ କରାଯିବ ସେ ନେଇ ଚିନ୍ତାରେ ପଡିଯାଇଛି ବିଜେପି।
