ଗୁରୁପଦ ବେରା
କେନ୍ଦ୍ରାପଡା: ରାଜ୍ୟ ସରକାରଙ୍କ ପକ୍ଷରୁ ସାମ୍ବାଦିକଙ୍କୁ କରୋନା ଯୋଦ୍ଧା ବୋଲି ଅଭିହିତ କରାଯାଇଥିଲେ ମଧ୍ୟ ଜଣେ ବିଡିଓଙ୍କ ଦ୍ବାରା ଆକ୍ରମଣର ଶିକାର ହୋଇଛନ୍ତି ସାମ୍ବାଦିକ। ଏହି ଘଟଣାକୁ ନେଇ ପୋଲିସ୍ ନିକଟରେ ଅଭିଯୋଗ କରାଯାଇଥିଲେ ମଧ୍ୟ ପୋଲିସର ଉଦାସୀନ ମନୋଭାବ ଘଟଣାର ନିରପେକ୍ଷ ତଦନ୍ତ ଆଡକୁ ଆଙ୍ଗୁଳି ଉଠାଇଛି। ମୁଖ୍ୟମନ୍ତ୍ରୀଙ୍କ ରିଲିଫ୍ ଫାଣ୍ଡିକୁ ଜଣେ ମହିଳାଙ୍କ ଦାନ ସମ୍ପର୍କିତ ଏକ ଖବରକୁ ନେଇ ବିଡିଓ ଜଣେ କାର୍ଯ୍ୟରତ ସାମ୍ବାଦିକଙ୍କୁ ଆକ୍ରମଣ କରିଥିବା ବେଳେ ଏହାକୁ ନେଇ ଧାରଣାରେ ବସିଛନ୍ତି ଜିଲ୍ଲାର ୫୦ରୁ ଅଧିକ ସାମ୍ବାଦିକ। ଏପରିକି ପୋଲିସ୍ ନିକଟରେ ଅଭିଯୋଗ କରାଯାଇଥିବା ବେଳେ ବିଡିଓଙ୍କ ସହିତ ଆଲୋଚନା ପରେ ପଦକ୍ଷେପ ଗ୍ରହଣ କରିବେ ବୋଲି ପୋଲିସ୍ ଅଧିକାରୀ ପ୍ରକାଶ କରିଛନ୍ତି।
ସାମ୍ବାଦିକଙ୍କ ଆନ୍ଦୋଳନ ପରେ ବି ପ୍ରଶାସନର କୁମ୍ଭକର୍ଣ୍ଣ ନିଦ୍ରା ଭାଙ୍ଗୁ ନାହିଁ। ନିକଟରେ ପୁରୀର ଜନୈକ ବନବିଭାଗ କର୍ମଚାରୀ ସାମ୍ବାଦିକଙ୍କ ଉପରକୁ ଆକ୍ରମଣ କରିଥିବା ବେଳେ ରାଜକନିକା ବିଡିଓଙ୍କର ଏଭଳି ଆକ୍ରମଣକୁ ବୁଦ୍ଧିଜୀବୀ ମହଲରେ ନିନ୍ଦା କରାଯାଇଛି। ଫାଇଭ-ଟି ବ୍ୟବସ୍ଥାର ଡିଣ୍ଡିମ ପିଟୁଥିବା ସରକାର ଏହା ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ ନକଲେ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରାଯିବ ବୋଲି ସାମ୍ବାଦିକ ମାନେ ଚେତାବନୀ ଦେଇଛନ୍ତି।