ନୂଆଦିଲ୍ଲୀ: ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ତରଫରୁ ଆଜି ଆୟୋଜିତ ହେବାକୁ ଥିବା ଇଫତାର ପାର୍ଟିକୁ ପ୍ରମୁଖ ମୁସଲମାନ ଧାର୍ମିକ ସଂଗଠନ ବର୍ଜ୍ଜନ କରିବେ। ଚିଠିରେ ଉଲ୍ଲେଖ କରାଯାଇଛି ଯେ, ଜେଡିୟୁ ୱାକଫ ସଂଶୋଧନ ବିଲ୍ କୁ ସମର୍ଥନ କରୁଛି। ତେଣୁ ପ୍ରମୁଖ ମୁସଲମାନ ଧାର୍ମିକ ସଂଗଠନଗୁଡ଼ିକ ଇଫତାର ପାର୍ଟିକୁ ବିରୋଧ କରିବାକୁ ନିଷ୍ପତ୍ତି ନେଇଛନ୍ତି। ଆରଜେଡିର ମୁଖ୍ୟ ମୁଖପାତ୍ର ଶକ୍ତି ଯାଦବ ଇମାରତ-ଏ-ଶାରିଆଙ୍କ ଚିଠି ଜାରି କରିଛନ୍ତି।
ଏହି ଚିଠିରେ ଉଲ୍ଲେଖ କରାଯାଇଛି ଯେ, ଅଲ ଇଣ୍ଡିଆ ମୁସଲିମ ପର୍ସନାଲ ଲ ’ବୋର୍ଡ, ଇମାରତ-ଏ-ଶାରିଆ, ଜାମିୟତ ଉଲେମା ହିନ୍ଦ, ଜମାତ-ଇ-ଇସଲାମି ହିନ୍ଦ, ଖାନକାହ ମୁଜିବିୟା ଭଳି ସଂଗଠନ ଏଥିରେ ଅନ୍ତର୍ଭୁକ୍ତ। ସଂସଦର ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟରେ କେନ୍ଦ୍ର ସରକାର ଏହି ବିଲ୍ ଉପସ୍ଥାପନ କରିବେ ଏବଂ ଏହାକୁ ପାରିତ କରିବାକୁ ଚେଷ୍ଟା କରିବେ।
ଲିଖିତ ଚିଠିରେ ଏହି ସଂଗଠନ ନୀତୀଶ କୁମାରଙ୍କୁ କହିଛନ୍ତି ଯେ, ଆପଣ ଧର୍ମନିରପେକ୍ଷତା ଏବଂ ସଂଖ୍ୟାଲଘୁ ଅଧିକାରର ପ୍ରତିଶ୍ରୁତି ଉପରେ କ୍ଷମତା ହାସଲ କରିଛନ୍ତି, କିନ୍ତୁ ବିଜେପି ସହିତ ଆପଣଙ୍କର ମେଣ୍ଟ ଏବଂ ଅସାମ୍ବିଧାନିକ ୱାକଫ ସଂଶୋଧନ ବିଲକୁ ସମର୍ଥନ କରିବା ସେହି ପ୍ରତିଶ୍ରୁତିର ଉଲ୍ଲଂଘନ ଅଟେ।
ଏହା ମଧ୍ୟ ଚିଠିରେ ଲେଖାଯାଇଛି ଯେ, “ଆପଣଙ୍କ ଇଫତାର ଭୋଜିର ଉଦ୍ଦେଶ୍ୟ ହେଉଛି ଶୁଭେଚ୍ଛା ଏବଂ ବିଶ୍ୱାସକୁ ପ୍ରୋତ୍ସାହିତ କରିବା। ଏହି ବିଶ୍ୱାସ କେବଳ ଆନୁଷ୍ଠାନିକ ଭୋଜି ମାଧ୍ୟମରେ ନୁହେଁ ବରଂ ଠୋସ୍ ନୀତି ଏବଂ ପଦକ୍ଷେପ ଦ୍ଵାରା ହାସଲ ହୋଇପାରିବ।
ଏହି ସଂଗଠନଗୁଡ଼ିକ ସେମାନଙ୍କର ଦାବିକୁ ସ୍ପଷ୍ଟ ଶବ୍ଦରେ ଦୋହରାଇଛନ୍ତି ଏବଂ ୱାକଫ୍ ସଂଶୋଧନ ବିଲ୍ ପାଇଁ ସମର୍ଥନ ତୁରନ୍ତ ପ୍ରତ୍ୟାହାର କରାଯିବା ଉଚିତ ବୋଲି କହିଛନ୍ତି। ୱାକଫ ସଂଶୋଧନ ବିଲ୍ ର ଅସୁବିଧା ବିଷୟରେ ବର୍ଣ୍ଣନା କରି ଏହି ଚିଠିରେ କୁହାଯାଇଛି ଯେ, ଯଦି ଏହି ସଂଶୋଧନ କାର୍ଯ୍ୟକାରୀ ହୁଏ ତେବେ ଏହା ଶିକ୍ଷାନୁଷ୍ଠାନ, ଡାକ୍ତରଖାନା, ମହିଳା କେନ୍ଦ୍ର ଏବଂ ଧାର୍ମିକ ସ୍ଥାନରେ ଥିବା ପୁରୁଣା ୱାକଫ୍ ସମ୍ପତ୍ତି ନଷ୍ଟ କରିବ।
