ସମୀକ୍ଷା ବ୍ୟୁରୋ
ବୈଜୟନ୍ତ ପଣ୍ଡା ବିଜେପିର ଜାତୀୟ ଉପସଭାପତି ଓ ମୁଖପାତ୍ର ଭାବେ ନିୟୁକ୍ତି ପାଇବା ପରେ ଓଡିଶାରେ ବିଜେପିର ସମୀକରଣ ବଦଳିବାକୁ ଯାଉଛି । କେନ୍ଦ୍ରୀୟ ନେତୃତ୍ବ ବୈଜୟନ୍ତଙ୍କୁ ଯେ ଅଧିକ ଗୁରୁତ୍ବ ଦେଉଛି, ତାହା ଆଉ ଅଛପା ହୋଇ ରହିନାହିଁ । ଆବଶ୍ୟକତା ଠାରୁ ବୈଜୟନ୍ତଙ୍କୁ ଅଧିକ ଗୁରୁତ୍ଭ ହିଁ ତାଙ୍କୁ ଚର୍ଚ୍ଚାର ପରିସର ଭିତରକୁ ଟାଣିନେଇଛି। ବୈଜୟନ୍ତ ଏବେ ରାଜ୍ୟରେ ବିଜେପିର ନୂଆ ମୁହଁ ବୋଲି ଦଳ ଭିତରେ ଚର୍ଚ୍ଚା ହେଉଛି । ଅର୍ଥାତ ବୈଜୟନ୍ତ ବିଜେପିର ମୁଖ୍ୟମନ୍ତ୍ରୀ ପଦ ରେସରେ ସାମିଲ ହୋଇଛନ୍ତି ।
୬ ମାସ ତଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ବୋଲି ଦଳ ଭିତରେ ଓ ବାହାରେ ଏକ ଧାରଣା ସୃଷ୍ଟି ହୋଇଥିଲା। ତେବେ ଆଇଏଏସ ଚାକିରି ଛାଡି ଅପରାଜିତା ଷଡଙ୍ଗୀ ବିଜେପିରେ ଯୋଗଦେବାପରେ ସେ ମୁଖ୍ୟମନ୍ତ୍ରୀ ହେବା ଆଶାରେ ଦଳରେ ଯୋଗ ଦେଇଛନ୍ତି ବୋଲି ଆଲୋଚନା ହେଲା। ଏହା ପରେ ବିଜେପି ନେତାମାନେ ଅପରାଜିତାଙ୍କ ନିକଟତର ହେବାକୁ ଚେଷ୍ଟା କଲେ। ଅପରାଜିତା ବି ଦଳର କର୍ମୀମାନଙ୍କୁ ଅମୁକ ଭାଇ ସମୁକ ଭାଇ ଛାଡି ଦଳ ପାଇଁ କାମ କରିବାକୁ ତାଗିଦ କଲେ। ଧାରଣା ସୃଷ୍ଟି ହେଲା ଯେ, ଅପରାଜିତା ହିଁ ଦଳରେ କ୍ଷମତା କେନ୍ଦ୍ର ହେବାକୁ ଯାଉଛନ୍ତି। ଧର୍ମେନ୍ଦ୍ରଙ୍କ ପତିଆରା କମୁଥିବା ନେଇ କର୍ମୀମାନେ ଖୋଲାଖୋଲି ଆଲୋଚନା କଲେ।
ଏପରିକି ନିର୍ବାଚନ ମଣ୍ଡଳୀ ସ୍ତରର ନେତାମାନେ ପୋଷ୍ଟର ବ୍ୟାନରରେ ଅନ୍ୟ ନେତାଙ୍କ ସହ ଅପରାଜିତାଙ୍କ ଫଟୋ ମଧ୍ୟ ଲଗାଇବାକୁ ପଛାଇଲେ ନାହିଁ । ଅପରାଜିତା ଦଲର ଫେସ ବୋଲି ବାର୍ତ୍ତା ଦିଆଗଲା। ବିଜେପି କର୍ମୀମାନଙ୍କ ଯୁକ୍ତି ଥିଲା ,ଏଥର ନିର୍ବାଚନରେ ମହିଳା ଭୋଟରଙ୍କୁ ଆକୃଷ୍ଟ କରିବା ପାଇଁ ଏହା ଭଲ କାମ କରିବ । ଏବେ ଏଭଳି ଯୁକ୍ତି ଆଉ ଶୁଣିବାକୁ ମିଳୁନାହିଁ । ଅପରାଜିତା ତାଙ୍କର ରାଜନୈତିକ କାର୍ଯ୍ୟକଳାପ ଭୁବନେଶ୍ବର ଲୋକସଭା ନିର୍ବାଚନ ମଣ୍ଡଳୀ ଭିତରେ ସୀମିତ ରଖିଛନ୍ତି। ଯଦି ସେ ଲୋକସଭା ପ୍ରାର୍ଥୀ ହୁଅନ୍ତି, ତେବେ ମୁଖ୍ୟମନ୍ତ୍ରୀ ଦୌଡରେ ରହିବେ ନାହିଁ। ସେ ବିଧାନସଭା ପାଇଁ ପ୍ରାର୍ଥୀ ହେଲେ, ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ହେବେ। ଅପରାଜିତା ଆସିବା ପରେ ଧର୍ମେନ୍ଦ୍ରଙ୍କ ଗୁରୁତ୍ବ ଦଳରେ କିଛିଟା କମିଛି।
ଏଭଳି ସ୍ଥିତିରେ ବୈଜୟନ୍ତ ପଣ୍ଡା ଦଳରେ ପ୍ରବେଶ କରି ଜାତୀୟ ଉପସଭାପତି ଓ ମୁଖପାତ୍ର ଭଳି ଗୁରୁତ୍ବପୂର୍ଣ୍ଣ ପଦବୀ ହାସଲ କରିଛନ୍ତି । ଓଡିଶାର କୌଣସି ବିଜେପି ନେତାଙ୍କୁ ଦଳରେ ଯୋଗଦେବା ମାତ୍ରେ ଜାତୀୟ ସ୍ତରରେ ବଡ ପଦବୀ ମିଳିନଥିଲା। ତେବେ ମୁଖପାତ୍ର ପଦବୀ ଦେଇ ଦଳ ଅନେକ ପ୍ରଶ୍ନ ମଧ୍ୟ ଛିଡା କରାଇଛି । ନିର୍ବାଚନ ସମୟରେ ମୁଖପାତ୍ର ହିସାବରେ ବିଭିନ୍ନ ବିିତର୍କରେ ବୈଜୟନ୍ତଙ୍କୁ ଅଧିକ ସମୟ ଦେବାକୁ ପଡିବ । ତେଣୁ ସେ ନିର୍ବାଚନ ଲଢିବେ କି ନାହିଁ , ତାହା ଜଣା ପଡିନାହିଁ। ତେବେ ସେ ଯେ ମୁଖ୍ୟମନ୍ତ୍ରୀ ପଦ ପାଇଁ ଆଶାୟୀ ସେ ନେଇ ଚର୍ଚ୍ଚା ଚାଲିଛି । ବିଜେପିର ରଣନୀତି ଓ ଆଭିମୁଖ୍ୟ କଣ ହେବ, ତାହା ମଧ୍ୟ ସ୍ପଷ୍ଟ ହୋଇନାହି। ସେ ଯାହା ହେଉନା କାହିଁକି , ଦଳ ଭିତରେ ବୈଜୟନ୍ତ ଏବେ ନିଜର ପତିଆରା ଜାହିର କରିବେ। ବୈଜୟନ୍ତଙ୍କ ଯୋଗଦାନ ବିଜେପି କର୍ମୀଙ୍କୁ ଉତ୍ସାହିତ କରିଛି ।ଆଗକୁ ଦଳ କାହା ଇଶାରାରେ ଚାଲିବ, ଧର୍ମେନ୍ଦ୍ର, ବୈଜୟନ୍ତ ନା ଅପରାଜିତା । ଏମିତି ଏକ ସ୍ଥିତିରେ କର୍ମୀମାନେ ଦ୍ବନ୍ଦ୍ବରେ ପଡିବା ସ୍ବାଭାବିକ। ପୂର୍ବରୁ ଦଳ କହି ଆସିଛି ମୁଖ୍ୟମନ୍ତ୍ରୀ ପଦ ପାଇଁ ଦଳରେ ଅନେକ ଯୋଗ୍ୟ ପ୍ରାର୍ଥୀ ଅଛନ୍ତି । ଏବେ ଏହି ରେସରେ ପୁଣି ଦୁଇଜଣ ଯୋଡି ହୋଇଛନ୍ତି । ଏହା ଆଗକୁ ଦଳକୁ ଶକ୍ତିଶାଳୀ କରିବାରେ ସହାୟକ ହେବ ନା ବିଭିନ୍ନ ଗୋଷ୍ଠୀରେ ଭାଗ ଭାଗ କରିଦେବ, ତାହା ସମୟ କହିବ। ତା ଉପରେ ନିର୍ଭର କରିବ ଦଳର ଭବିଷ୍ୟତ ।