The Samikhsya Odia
ନୂଆଦିଲ୍ଲୀ: କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଆଜି ଡାକ୍ତରଖାନାରୁ ଡିସଚାର୍ଜ ହୋଇଛନ୍ତି। ପିଠି ଯନ୍ତ୍ରଣା ଅଭିଯୋଗ କରିବା ପରେ ତାଙ୍କୁ AIIMS ରେ ଭର୍ତ୍ତି କରାଯାଇଥିଲା।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସ୍ୱାସ୍ଥ୍ୟ ହଠାତ୍ ଖରାପ ହୋଇଯାଇଥିଲା, ଯାହା ପରେ ତାଙ୍କୁ ଦିଲ୍ଲୀ AIIMS ର ନ୍ୟୁରୋ ସର୍ଜରୀ ବିଭାଗରେ ଭର୍ତ୍ତି କରାଯାଇଥିଲା। ସୂଚନାନୁସାରେ, ପିଠି ଯନ୍ତ୍ରଣା ଅଭିଯୋଗ କରିବା ପରେ ତାଙ୍କୁ AIIMS ରେ ଭର୍ତ୍ତି କରାଯାଇଥିଲା। ବର୍ତ୍ତମାନ ତାଙ୍କ ଅବସ୍ଥା ଭଲ ଅଛି।
ନୂଆଦିଲ୍ଲୀ: ଏକ ବଡ ନିଷ୍ପତ୍ତି ନେଇ କେନ୍ଦ୍ର ସରକାର ଜୁନ୍ ୨୫ ତାରିଖକୁ ସମ୍ବିଧାନ ହତ୍ୟା ଦିବସ ବୋଲି ଘୋଷଣା କରିଛନ୍ତି। ଏ ସମ୍ପର୍କରେ ସରକାର ଏକ ବିଜ୍ଞପ୍ତି ଜାରି କରିଛନ୍ତି। ଜୁନ୍ ୨୫ ତାରିଖ ୧୯୭୫ରେ ଦେଶରେ ଜରୁରୀକାଳୀନ ପରିସ୍ଥିତି ଲାଗୁ କରାଯାଇଥିଲା ଏବଂ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଆଗାମୀ ଦିନରେ ଜୁନ୍ ୨୬ ତାରିଖରେ ଦେଶର ଲୋକଙ୍କୁ ଏହା ଜଣାଇଥିଲେ। ଗୃହମନ୍ତ୍ରୀ ଅମିତ ଶାହା ଏହି ପୋଷ୍ଟରେ ଜାରି କରାଯାଇଥିବା ବିଜ୍ଞପ୍ତିକୁ ସେୟାର କରି ଏହି ସୂଚନା ଦେଇଛନ୍ତି।
ଗୃହମନ୍ତ୍ରୀ ଅମିତ ଶାହା କ’ଣ କହିଛନ୍ତି?:
ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ, “ଜୁନ୍ ୨୫ ତାରିଖ ୧୯୭୫ ରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ନିଜର ଏକଛତ୍ରବାଦୀ ମାନସିକତା ପ୍ରଦର୍ଶନ କରି ଦେଶରେ ଜରୁରୀକାଳୀନ ପରିସ୍ଥିତି ଲଗାଇ ଭାରତୀୟ ଗଣତନ୍ତ୍ରର ଆତ୍ମାକୁ ଗଳା କାଟି ହତ୍ୟା କରିଥିଲେ। ଲକ୍ଷ ଲକ୍ଷ ଲୋକଙ୍କୁ ବିନା କାରଣରେ ଜେଲରେ ରଖାଯାଇଥିଲା। ଗଣମାଧ୍ୟମର ସ୍ୱରକୁ ଦମନ କରାଯାଇଥିଲା ଭାରତ ସରକାର ୧୯୭୫ ର ଅମାନୁଷିକ ଯନ୍ତ୍ରଣା ଭୋଗୁଥିବା ସମସ୍ତଙ୍କ ଅବଦାନକୁ ସ୍ମରଣ କରିବା ପାଇଁ ଜୁନ୍ ୨୫ ତାରିଖ ସମ୍ବିଧାନ ଦିବସ ଭାବରେ ପାଳନ କରିବାକୁ ନିଷ୍ପତ୍ତି ନେଇଛନ୍ତି।
ନୂଆଦିଲ୍ଲୀ: ପୂର୍ବତନ କେନ୍ଦ୍ର ମନ୍ତ୍ରୀ ତଥା ବିଜେପି ନେତା ସ୍ମୃତି ଇରାନୀଙ୍କ ଉପରେ ଯେଉଁମାନେ ଅଶ୍ଳୀଳ ତଥା ଅସଭ୍ୟ ମନ୍ତବ୍ୟ ଦେଉଛନ୍ତି ସେମାନଙ୍କୁ ରାହୁଲ ଗାନ୍ଧୀ ଚେତାବନୀ ଦେଇଛନ୍ତି। ରାଏବରେଲି ସାଂସଦ ରାହୁଲ ଗାନ୍ଧୀ କହିଛନ୍ତି ଯେ, ସେମାନେ ଏହା କରିବା ଉଚିତ୍ ନୁହେଁ। ସେ କହିଥିଲେ ଯେ, ଜୀବନରେ ହାରିବା ଏବଂ ଜିତିବା ଲାଗିରହିଛି, କିନ୍ତୁ କାହାକୁ ଅପମାନ କରିବା ଦୁର୍ବଳତାର ସଙ୍କେତ ଅଟେ।
ଏହା ସହିତ ସେ କଂଗ୍ରେସ ନେତାମାନଙ୍କୁ ମଧ୍ୟ ଚେତାବନୀ ଦେଇଛନ୍ତି ଯେ, ସ୍ମୃତି ଇରାନୀଙ୍କ ବିଷୟରେ କୌଣସି ନେତା ଭଲ କିମ୍ବା ଖରାପ କହିବା ଉଚିତ୍ ନୁହେଁ। କଂଗ୍ରେସ ନେତା ସୋସିଆଲ ମିଡିଆ ପ୍ଲାଟଫର୍ମରେ ଲେଖିଛନ୍ତି ଯେ, ଏପରି ଆଚରଣରୁ ଦୂରେଇ ରୁହନ୍ତୁ। ଲୋକଙ୍କୁ ଅପମାନିତ କରିବା ଶକ୍ତି ନୁହେଁ, ଦୁର୍ବଳତାର ସଙ୍କେତ ଅଟେ।
ରାହୁଲ ଗାନ୍ଧୀ ଏହା କାହିଁକି କହିଥିଲେ?:
ବାସ୍ତବରେ ଉତ୍ତରପ୍ରଦେଶର ଆମେଠି ଲୋକସଭା ଆସନରୁ ହାରିଯିବା ପରେ ସ୍ମୃତି ଇରାନୀଙ୍କୁ ସୋସିଆଲ ମିଡିଆରେ କ୍ରମାଗତ ଭାବେ ଟ୍ରୋଲ କରାଯାଉଥିଲା। କଂଗ୍ରେସ ନେତା କିଶୋରୀ ଲାଲ ଶର୍ମା ତାଙ୍କୁ ଏହି ଆସନରୁ ବିପୁଳ ବ୍ୟବଧାନରେ ପରାସ୍ତ କରିଛନ୍ତି। ଏହାପୂର୍ବରୁ ଲୋକସଭା ନିର୍ବାଚନ ୨୦୧୯ ରେ ସ୍ମୃତି ଇରାନୀ ରାହୁଲ ଗାନ୍ଧୀଙ୍କୁ ପରାସ୍ତ କରିଥିଲେ। ଏଥର ଯେତେବେଳେ ସ୍ମୃତି ଇରାନୀ ଆମେଠିରୁ ହାରିଗଲେ, ସେ ଟ୍ରୋଲ ହେବା ଆରମ୍ଭ ହେଲେ। ତାଙ୍କ ବଙ୍ଗଳା ଖାଲି କରିବାକୁ ମଧ୍ୟ ତାଙ୍କୁ ଟାର୍ଗେଟ କରାଯାଇଥିଲା।
ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସ୍ୱାସ୍ଥ୍ୟ ହଠାତ୍ ଖରାପ ହୋଇଯାଇଥିଲା, ଯାହା ପରେ ତାଙ୍କୁ ଦିଲ୍ଲୀ AIIMS ର ନ୍ୟୁରୋ ସର୍ଜରୀ ବିଭାଗରେ ଭର୍ତ୍ତି କରାଯାଇଥିଲା। ସୂଚନାନୁସାରେ, ପିଠି ଯନ୍ତ୍ରଣା ଅଭିଯୋଗ କରିବା ପରେ ତାଙ୍କୁ AIIMS ରେ ଭର୍ତ୍ତି କରାଯାଇଥିଲା। ବର୍ତ୍ତମାନ ତାଙ୍କ ଅବସ୍ଥା ଭଲ ଅଛି। ଜୁଲାଇ ୧୦ ତାରିଖରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ତାଙ୍କର ୭୩ ତମ ଜନ୍ମଦିନ ପାଳନ କରିଥିଲେ। ଦେଶର ସମସ୍ତ ନେତା ତାଙ୍କୁ ଅଭିନନ୍ଦନ ଜଣାଇଥିଲେ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଜନ୍ମଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋସିଆଲ ମିଡିଆ ପ୍ଲାଟଫର୍ମ X ରେ ଏକ ପୋଷ୍ଟ କରି ତାଙ୍କୁ କ୍ୟାବିନେଟର ଜଣେ ମୂଲ୍ୟବାନ ସହଯୋଗୀ ବୋଲି କହିଥିଲେ। ସେ କହିଥିଲେ ଯେ, ରାଜନାଥ ସିଂ ଜଣେ ନେତା ଯିଏ ତାଙ୍କ ବୁଦ୍ଧି ପାଇଁ ବହୁ ସମ୍ମାନିତ ଅଟନ୍ତି। କଠିନ ପରିଶ୍ରମ ଏବଂ ସେବା ପ୍ରତି ପ୍ରତିବଦ୍ଧତା ଆଧାରରେ ସେ ସାଧାରଣ ଜୀବନରେ ଅଗ୍ରଗତି କରିଛନ୍ତି। ସେ ଭାରତର ପ୍ରତିରକ୍ଷା ବ୍ୟବସ୍ଥାକୁ ମଜବୁତ କରିବାରେ ଏବଂ ଆମ ଦେଶକୁ ଏହି କ୍ଷେତ୍ରରେ ଆତ୍ମନିର୍ଭରଶୀଳ କରିବାରେ ନେତୃତ୍ୱ ନେଉଛନ୍ତି। ତାଙ୍କର ଦୀର୍ଘ ଏବଂ ସୁସ୍ଥ ଜୀବନ ପାଇଁ ପ୍ରାର୍ଥନା କରୁଛି।”
ନୂଆଦିଲ୍ଲୀ: ଅଗ୍ନିପଥ ଯୋଜନାକୁ ନେଇ ଗତ କିଛି ଦିନ ଧରି ଚାଲିଥିବା ବିବାଦ ମଧ୍ୟରେ କେନ୍ଦ୍ର ସରକାର ଏକ ବଡ ନିଷ୍ପତ୍ତି ନେଇଛନ୍ତି। ପୂର୍ବତନ ଅଗ୍ନିବୀରଙ୍କ ପାଇଁ ଗୃହ ମନ୍ତ୍ରଣାଳୟ କେନ୍ଦ୍ରୀୟ ସଶସ୍ତ୍ର ପୋଲିସ ଫୋର୍ସରେ କନଷ୍ଟେବଳଙ୍କ ୧୦ ପ୍ରତିଶତ ପଦବୀ ସଂରକ୍ଷଣ କରିଛି। ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ୍ ସିକ୍ୟୁରିଟି ଫୋର୍ସ (ସିଏସ୍ଏଫ୍) ରେ ମଧ୍ୟ ଶାରୀରିକ ପରୀକ୍ଷଣରେ ସରକାର ଆଶ୍ଵସ୍ତି ପ୍ରଦାନ କରିବେ।
ଗୃହ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ଅଗ୍ନିବୀର ମଧ୍ୟ କେନ୍ଦ୍ରୀୟ ପୋଲିସ ଫୋର୍ସରେ ଚାକିରି ପାଇବେ। ଏଥିସହ ପୂର୍ବତନ ଅଗ୍ନିବୀରଙ୍କ ପାଇଁ ୧୦ ପ୍ରତିଶତ ପଦବୀ ସଂରକ୍ଷିତ ରହିବ। ଅଗ୍ନିବୀରଙ୍କୁ ମଧ୍ୟ ଶାରୀରିକ ପରୀକ୍ଷଣରୁ ମୁକ୍ତ କରାଯିବ ଏବଂ ୧୦ ପ୍ରତିଶତ ପଦବୀ ମଧ୍ୟ CISF ରେ ସଂରକ୍ଷିତ ରହିବ। ଏହି ସମୟରେ ସିଏସ୍ଏଫ୍ ମହାନିର୍ଦ୍ଦେଶକ ନୀନା ସିଂ କହିଛନ୍ତି ଯେ, ସିଏସ୍ଏଫ୍ ମଧ୍ୟ ଏ ଦିଗରେ ସମସ୍ତ ପ୍ରସ୍ତୁତି ଚଳାଇଛି।
ଅଗ୍ନିପଥ ଯୋଜନାକୁ ନେଇ ବିବାଦ:
ନିକଟରେ ଶେଷ ହୋଇଥିବା ସଂସଦ ଅଧିବେଶନରେ ବିରୋଧୀମାନେ ଅଗ୍ନିପଥ ଯୋଜନା ସମ୍ପର୍କରେ ପ୍ରଶ୍ନ ଉଠାଇଥିଲେ। ସରକାରଙ୍କୁ ଘେରିବା ପରେ ଅଗ୍ନିପଥ ଯୋଜନାକୁ ନେଇ ବିବାଦ ମଧ୍ୟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଲୋକସଭାରେ ବିରୋଧୀଦଳର ନେତା ରାହୁଲ ଗାନ୍ଧୀଙ୍କ ଦାବିକୁ ଖଣ୍ଡନ କରିଥିଲେ ଏବଂ ୧୫୮ ଟି ସଂସ୍ଥାର ପରାମର୍ଶ ନେବା ପରେ ଏହା କାର୍ଯ୍ୟକାରୀ କରାଯାଇଛି ବୋଲି କହିଥିଲେ। ସାମରିକ ନିଯୁକ୍ତି ଯୋଜନା ସମ୍ପର୍କରେ ରାହୁଲ ଗାନ୍ଧୀ ଦାବି କରିଥିଲେ ଯେ, ସରକାର ଆଗ୍ନିବୀରଙ୍କୁ ଏକ ନିଷ୍କ୍ରିୟ ଶ୍ରମିକ ଭାବରେ ଦେଖୁଛନ୍ତି ଏବଂ ସେମାନଙ୍କୁ ଶହୀଦ ମାନ୍ୟତା ମଧ୍ୟ ଦେଉନାହାଁନ୍ତି।
ନୂଆଦିଲ୍ଲୀ: ଆଜି ଊନ୍ନାଓ ଜିଲ୍ଲାର ଆଗ୍ରା-ଲକ୍ଷ୍ନୌ ଏକ୍ସପ୍ରେସୱେରେ ଏକ ବସ୍ ଏବଂ ଟ୍ୟାଙ୍କର୍ ଧକ୍କାରେ ୧୮ ଜଣଙ୍କର ମୃତ୍ୟୁ ଘଟିଥିବା ବେଳେ ୧୯ ଜଣ ଆହତ ହୋଇଛନ୍ତି। ଏଥିରେ ଦୁଃଖ ପ୍ରକାଶ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଏବଂ ଆହତମାନଙ୍କୁ ୫୦ ହଜାର ଟଙ୍କା କ୍ଷତିପୂରଣ ଘୋଷଣା କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ X ରେ PMO ଏହା ଘୋଷଣା କରିଛି।
ଏହି ଦୁର୍ଘଟଣା ସମ୍ପର୍କରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଉତ୍ତରପ୍ରଦେଶର ଉନ୍ନାଓରେ ସଡ଼କ ଦୁର୍ଘଟଣା ଅତ୍ୟନ୍ତ ଯନ୍ତ୍ରଣାଦାୟକ ଅଟେ। ଯେଉଁମାନେ ଏଥିରେ ନିଜର ପ୍ରିୟଜନଙ୍କୁ ହରାଇଛନ୍ତି ସେମାନଙ୍କ ପ୍ରତି ମୋର ସମବେଦନା। ଭଗବାନ ସେମାନଙ୍କୁ ଏହି କଷ୍ଟ ସମୟରେ ଶକ୍ତି ପ୍ରଦାନ କରନ୍ତୁ। ଏହା ସହିତ, ମୁଁ ଆହତମାନଙ୍କ ଶୀଘ୍ର ଆରୋଗ୍ୟ କାମନା କରୁଛି। ରାଜ୍ୟ ସରକାରଙ୍କ ତତ୍ତ୍ୱାବଧାନରେ ସ୍ଥାନୀୟ ପ୍ରଶାସନ ପୀଡ଼ିତଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇବାରେ ନିୟୋଜିତ ଅଛନ୍ତି।
ଏଥି ସହ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ଏହି ଦୁର୍ଘଟଣାରେ ଦୁଃଖ ପ୍ରକାଶ କରିଛନ୍ତି। ସେ କହିଛନ୍ତି ଯେ, ଲକ୍ଷ୍ନୌ- ଆଗ୍ରା ଏକ୍ସପ୍ରେସୱେରେ ସଡ଼କ ଦୁର୍ଘଟଣାରେ ଅନେକ ଲୋକଙ୍କ ମୃତ୍ୟୁ ଖବର ଅତ୍ୟନ୍ତ ଦୁଃଖଦାୟକ। ଯେଉଁମାନେ ଉକ୍ତ ଦୁର୍ଘଟଣାରେ ମୃତ୍ୟୁର ଶିକାର ହୋଇଥିଲେ ସେମାନଙ୍କ ପରିବାର ସଦସ୍ୟଙ୍କୁ ମୁଁ ମୋର ଗଭୀର ସମବେଦନା ଜଣାଉଛି ଏବଂ ଆହତମାନଙ୍କ ଶୀଘ୍ର ଆରୋଗ୍ୟ କାମନା କରୁଛି।
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର ଦିନ ରୁଷର ମସ୍କୋରେ ପହଞ୍ଚିଥିଲେ। ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ନିମନ୍ତ୍ରଣରେ ପ୍ରଧାନମନ୍ତ୍ରୀ ମୋଦି ମସ୍କୋ ଯାଇଥିଲେ। ପ୍ରଧାନମନ୍ତ୍ରୀ ମୋଦୀ କରୋନା ପରେ ପ୍ରଥମ ଥର ପାଇଁ ରୁଷ ଯାଇଛନ୍ତି।
ତେବେ ଏହି ଅବସରରେ ଉଭୟ ଦେଶ ମଧ୍ୟରେ ଅନେକ ରାଜିନାମ ସ୍ବାକ୍ଷରିତ ହୋଇଛି। ଆସନ୍ତୁ ଜାଣିବା ଏହାର ତାଲିକା….
| କ୍ରଂ.ସଂ. | ବୁଝାମଣା ପତ୍ର/ରାଜିନାମା ର ନାମ | ଉଦ୍ଦେଶ୍ୟ |
| ୧. | ୨୦୨୪ରୁ ୨୦୨୯ ପର୍ଯ୍ୟନ୍ତ ରୁଷର ସୁଦୂର ପ୍ରାଚ୍ୟରେ ବାଣିଜ୍ୟ, ଆର୍ଥିକ ଓ ପୁଞ୍ଜିନିବେଶ କ୍ଷେତ୍ରରେ ଭାରତ-ରୁଷ ସହଯୋଗର କାର୍ଯ୍ୟକ୍ରମ ଏବଂ ରୁଷର ଆର୍କ୍ଟିକ୍ ଜୋନରେ ସହଯୋଗ ନୀତିର କାର୍ଯ୍ୟକାରିତା | ରୁଷ ଓ ଭାରତର ସୁଦୂର ପୂର୍ବାଞ୍ଚଳ ମଧ୍ୟରେ ବାଣିଜ୍ୟ ଏବଂ ମିଳିତ ନିବେଶ ପ୍ରକଳ୍ପଗୁଡ଼ିକୁ ଆହୁରି ବୃଦ୍ଧି କରିବା। |
| ୨. | ଜଳବାୟୁ ପରିବର୍ତ୍ତନ ଏବଂ ଅଙ୍ଗାରକାମ୍ଳ ହ୍ରାସ ପାଇଁ ପଦକ୍ଷେପ ବିକାଶ ପ୍ରସଙ୍ଗରେ ଭାରତର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ଏବଂ ରୁଷ ଆର୍ଥିକ ବିକାଶ ମନ୍ତ୍ରଣାଳୟ ମଧ୍ୟରେ ବୁଝାମଣାପତ୍ର | ଜଳବାୟୁ ପରିବର୍ତ୍ତନ ଏବଂ ଅଙ୍ଗାରକାମ୍ଳ ହ୍ରାସ ପାଇଁ ପଦକ୍ଷେପ ବିକାଶ ପ୍ରସଙ୍ଗରେ ଯୁଗ୍ମ କାର୍ଯ୍ୟକାରୀ ଗୋଷ୍ଠୀ ଗଠନ। କମ୍ ମୂଲ୍ୟର ଜ୍ଞାନକୌଶଳ ବିକଶିତ କରିବା ପାଇଁ ସୂଚନା / ସର୍ବୋତ୍ତମ ଅଭ୍ୟାସର ଆଦାନ ପ୍ରଦାନ ଏବଂ ମିଳିତ ଗବେଷଣା ଆୟୋଜନ। |
| ୩. | ସର୍ଭେ ଅଫ୍ ଇଣ୍ଡିଆ ଏବଂ ରୁଷର ଫେଡେରାଲ ସର୍ଭିସ ଫର ଷ୍ଟେଟ ରେଜିଷ୍ଟ୍ରେସନ, କାଡାଷ୍ଟ୍ରେ ଓ କାର୍ଟୋଗ୍ରାଫି ମଧ୍ୟରେ ବୁଝାମଣାପତ୍ର | ଜିଓଡେସି, କାର୍ଟୋଗ୍ରାଫି ଓ ସ୍ପେସିଆଲ ଡାଟା ଭିତ୍ତିଭୂମିରେ ଜ୍ଞାନ ଓ ଅଭିଜ୍ଞତାର ଆଦାନ ପ୍ରଦାନ; ବୃତ୍ତିଗତ ପ୍ରଶିକ୍ଷଣ ଓ ଦକ୍ଷତା ବିକାଶ; ବୈଜ୍ଞାନିକ ଓ ଶିକ୍ଷାନୁଷ୍ଠାନ ମଧ୍ୟରେ ସହଯୋଗ। |
| ୪. | ଭାରତ ସରକାରଙ୍କ ଭୂବିଜ୍ଞାନ ମନ୍ତ୍ରଣାଳୟର ଜାତୀୟ ମେରୁ ଓ ମହାସାଗର ଗବେଷଣା କେନ୍ଦ୍ର ଏବଂ ମେରୁ ଅଞ୍ଚଳରେ ଗବେଷଣା ଓ ଲଜିଷ୍ଟିକ୍ସ କ୍ଷେତ୍ରରେ ସହଯୋଗ ଉପରେ ଆର୍କ୍ଟିକ୍ ଓ ଆଣ୍ଟାର୍କଟିକା ଗବେଷଣା ପ୍ରତିଷ୍ଠାନ ମଧ୍ୟରେ ବୁଝାମଣାପତ୍ର | ସମ୍ବଳ ଏବଂ ଡାଟା ବିନିମୟ କରି ମେରୁ ପରିବେଶ ଏବଂ ସେଗୁଡ଼ିକର ପରିବର୍ତ୍ତନଶୀଳତା ଅଧ୍ୟୟନରେ ସହଯୋଗ; ମେରୁ ଅଞ୍ଚଳରେ ଲଜିଷ୍ଟିକ୍ସ; ମିଳିତ ଗବେଷଣା; କର୍ମଚାରୀଙ୍କ ବିନିମୟ; ଏବଂ ମେରୁ ଅଞ୍ଚଳରେ ଅନ୍ତର୍ଜାତୀୟ କାର୍ଯ୍ୟକ୍ରମ ଏବଂ ପ୍ରକଳ୍ପରେ ଅଂଶଗ୍ରହଣ। |
| ୫. | ଭାରତର ପ୍ରସାର ଭାରତୀ ଏବଂ ରୁଷର ଏଏନ୍ଓ ‘‘ଟିଭି-ନୋଭୋସ୍ତି’’ (ରୁଷିଆ ଟୁଡେ ଟିଭି ଚ୍ୟାନେଲ) ମଧ୍ୟରେ ପ୍ରସାରଣ କ୍ଷେତ୍ରରେ ସହଯୋଗ ଏବଂ ସହଭାଗିତା ପାଇଁ ବୁଝାମଣାପତ୍ର | କାର୍ଯ୍ୟକ୍ରମ, କର୍ମଚାରୀ ଏବଂ ପ୍ରଶିକ୍ଷଣ ଆଦାନ ପ୍ରଦାନ ସମେତ ପ୍ରସାରଣ କ୍ଷେତ୍ରରେ ସହଯୋଗ। |
| ୬. | ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ଭାରତୀୟ ଫାର୍ମାକୋପିଆ କମିଶନ ଏବଂ ରୁଷ ସ୍ୱାସ୍ଥ୍ୟ ମନ୍ତ୍ରଣାଳୟର ‘‘ସାଇଣ୍ଟିଫିକ୍ ସେଣ୍ଟର୍ ଫର ଏକ୍ସପର୍ଟ ଇଭାଲୁଏସନ୍ ଅଫ୍ ମେଡିସିନାଲ ପ୍ରଡକ୍ଟସ୍’’ ମଧ୍ୟରେ ବୁଝାମଣାପତ୍ର | ସୂଚନା ଆଦାନ ପ୍ରଦାନ ଏବଂ ଦକ୍ଷତା ବିକାଶ ମାଧ୍ୟମରେ ମାନବ ବ୍ୟବହାର ପାଇଁ ଉନ୍ନତ ମାନର ଔଷଧ ଉପଲବ୍ଧତା ସୁନିଶ୍ଚିତ କରିବା। |
| ୭. | ରୁଷର ଚାମ୍ବର ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରିରେ ଭାରତୀୟ ଅନ୍ତର୍ଜାତୀୟ ଆର୍ବିଟ୍ରେସନ୍ ସେଣ୍ଟର ଏବଂ ଅନ୍ତର୍ଜାତୀୟ ବାଣିଜ୍ୟିକ ଆର୍ବିଟ୍ରେସନ୍ କୋର୍ଟ ମଧ୍ୟରେ ସହଯୋଗ ରାଜିନାମା | ବାଣିଜ୍ୟିକ ପ୍ରକୃତିର ଦେୱାନୀ ଆଇନ ମାମଲା ସମାଧାନର ସୁବିଧା। |
| ୮. | ଇନଭେଷ୍ଟ ଇଣ୍ଡିଆ ଏବଂ ଜେଏସସି ‘‘ମ୍ୟାନେଜମେଣ୍ଟ କମ୍ପାନୀ ଅଫ୍ ରଷିୟାନ୍ ଡାଇରେକ୍ଟ ଇନଭେଷ୍ଟମେଣ୍ଟ ଫଣ୍ଡ’’ ମଧ୍ୟରେ ମିଳିତ ନିବେଶ ପ୍ରୋତ୍ସାହନ ବ୍ୟବସ୍ଥା ରାଜିନାମା | ନିବେଶ ସହଯୋଗକୁ ପ୍ରୋତ୍ସାହନ ଓ ସହଯୋଗ ଯୋଗାଇ ଦେଇ ଭାରତୀୟ ବଜାରରେ ରୁଷୀୟ କମ୍ପାନୀଗୁଡିକ ଦ୍ୱାରା ପୁଞ୍ଜିନିବେଶକୁ ସୁଗମ କରିବ । |
| ୯. | ଭାରତୀୟ ବାଣିଜ୍ୟିକ ପ୍ରୋତ୍ସାହନ ପରିଷଦ ଏବଂ ଅଲ୍ ରୁଷିଆ ପବ୍ଲିକ ଅର୍ଗାନାଇଜେସନ୍ ‘‘ବିଜନେସ୍ ରୁଷିଆ’’ ମଧ୍ୟରେ ବୁଝାମଣାପତ୍ର | ଦ୍ୱିପାକ୍ଷିକ ବାଣିଜ୍ୟ ଏବଂ ପୁଞ୍ଜିନିବେଶକୁ ପ୍ରୋତ୍ସାହନ ଦେବା, ବି୨ବି ବୈଠକ ଆୟୋଜନ, ବ୍ୟବସାୟ ପ୍ରୋତ୍ସାହନ କାର୍ଯ୍ୟକ୍ରମ ଆୟୋଜନ; ଏବଂ ବ୍ୟବସାୟିକ ପ୍ରତିନିଧି ମଣ୍ଡଳୀର ବିନିମୟ। |
ନୂଆଦିଲ୍ଲୀ: ପ୍ରଧାନମନ୍ତ୍ରୀ ମୋଦୀ ବର୍ତ୍ତମାନ ରୁଷ ଗସ୍ତରେ ଅଛନ୍ତି। ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ନିମନ୍ତ୍ରଣରେ ପ୍ରଧାନମନ୍ତ୍ରୀ ମୋଦି ମସ୍କୋ ଯାଇଛନ୍ତି। ଏହି ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ। ପ୍ରଧାନମନ୍ତ୍ରୀ ମୋଦୀ କରୋନା ପରେ ପ୍ରଥମ ଥର ପାଇଁ ରୁଷ ଯାଇଛନ୍ତି।
ଏହି କ୍ରମରେ ରୁଷ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ସହ ରୁଷ ସେନାରେ କାର୍ଯ୍ୟ କରୁଥିବା ଭାରତୀୟଙ୍କ ଦେଶକୁ ପ୍ରତ୍ୟାବର୍ତ୍ତନ ପ୍ରସଙ୍ଗ ଉଠାଇଛନ୍ତି। ଏହା ପରେ ରାଷ୍ଟ୍ରପତି ପୁତିନ ପ୍ରଧାନମନ୍ତ୍ରୀ ମୋଦୀଙ୍କୁ କହିଛନ୍ତି ଯେ ,ଭାରତୀୟମାନେ ଶୀଘ୍ର ଦେଶକୁ ଫେରିବେ।
ସମଗ୍ର ବିଷୟ କ’ଣ?:
ସୂଚନା ଅନୁଯାୟୀ ରୁଷର ସେନା ସହିତ ଭାରତୀୟ ନାଗରିକମାନେ ୟୁକ୍ରେନ ବିରୁଦ୍ଧରେ ଲଢିବାକୁ ବାଧ୍ୟ ହେଉଛନ୍ତି। ସୁରକ୍ଷା ସହାୟକ ଭାବେ କାମ କରିବା ପାଇଁ ଭାରତୀୟମାନଙ୍କୁ ପ୍ରତାରଣା କରି ସୀମାକୁ ପଠାଯାଉଛି। ନଭେମ୍ବର ୨୦୨୩ ରୁ ପ୍ରାୟ ୧୮ଜଣ ଭାରତୀୟ ରୁଷ-ୟୁକ୍ରେନ ସୀମାରେ ଫସି ରହିଛନ୍ତି। ଏହି ସମୟ ମଧ୍ୟରେ ଜଣଙ୍କର ମୃତ୍ୟୁ ମଧ୍ୟ ହୋଇଛି। ଏହି ଯୁଦ୍ଧରେ ଉତ୍ତରପ୍ରଦେଶ, ଗୁଜୁରାଟ, ପଞ୍ଜାବ ଏବଂ ଜମ୍ମୁ କାଶ୍ମୀରର ଅନେକ ଯୁବକ ମଧ୍ୟ ଫସି ରହିଛନ୍ତି।
ରୁଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧରେ ହାଇଦ୍ରାବାଦର ଜଣେ ଯୁବକ ମଧ୍ୟ ଫସି ରହିଥିଲେ। ଯୁବକ ଜଣକ ସୋସିଆଲ ମିଡିଆ ମାଧ୍ୟମରେ ସାହାଯ୍ୟ ପାଇଁ ଭାରତ ସରକାରଙ୍କୁ ନିବେଦନ କରିଥିଲେ। ଏହା ପରେ ପୀଡିତାଙ୍କ ପରିବାର AIMIM ସାଂସଦ ଅସଦୁଦ୍ଦିନ ଓୱାଇସିଙ୍କ ସହ ଯୋଗାଯୋଗ କରିଥିଲେ। ଏ ସମ୍ପର୍କରେ ଓୱାଇସି ଜାନୁଆରୀ ୨୫ ତାରିଖରେ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଏବଂ ମସ୍କୋରେ ଥିବା ଭାରତୀୟ ଦୂତାବାସକୁ ଏକ ଚିଠି ଲେଖିଥିଲେ। ଏଥିରେ ସେ ଯୁବକଙ୍କ ପ୍ରତ୍ୟାବର୍ତ୍ତନ ପାଇଁ ସରକାରଙ୍କ ହସ୍ତକ୍ଷେପ ଲୋଡିଥିଲେ।
ନୂଆଦିଲ୍ଲୀ: ଜେଏମଏମ ନେତା ହେମନ୍ତ ସୋରେନ ସୋମବାର ଦିନ ଝାଡଖଣ୍ଡର ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଏହି ସମୟରେ ହେମନ୍ତ ସୋରେନଙ୍କୁ ଦିଆଯାଇଥିବା ଜାମିନ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ସୁପ୍ରିମକୋର୍ଟଙ୍କ ନିକଟରେ ପହଞ୍ଚିଛି।
ଇଡି ଯୁକ୍ତି କରିଛି ଯେ, ଜମି ଦୁର୍ନୀତି ମାମଲାରେ ହାଇକୋର୍ଟଙ୍କ ଆଦେଶ ‘ଅବୈଧ’ ଏବଂ ସୁପ୍ରିମକୋର୍ଟଙ୍କ ହସ୍ତକ୍ଷେପ ଆବଶ୍ୟକ। ନିକଟରେ ଝାଡଖଣ୍ଡ ହାଇକୋର୍ଟ ହେମନ୍ତ ସୋରେନଙ୍କୁ ଜାମିନ ପ୍ରଦାନ କରିଛନ୍ତି। ଇଡି ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରିଛି। ହାଇକୋର୍ଟଙ୍କ ନିଷ୍ପତ୍ତିରେ ଏହି ଦୁର୍ନୀତି ମାମଲାର ଗୁରୁତ୍ୱପୂର୍ଣ୍ଣ ଦିଗକୁ ଅଣଦେଖା କରାଯାଇଛି ବୋଲି ଏଜେନ୍ସି ଦାବି କରିଛି। ଜେଏମଏମ ନେତା ସୋରେନଙ୍କ ବିରୋଧରେ ମଜବୁତ ପ୍ରମାଣ ରହିଛି ଏବଂ ତାଙ୍କ ଜାମିନ ଅନୁଚିତ ବୋଲି ଇଡି ଦାବି କରିଛି।
ସୁପ୍ରିମକୋର୍ଟ ଖୁବ ଶୀଘ୍ର ଶୁଣାଣି କରିବେ:
ଜାମିନ ଆଦେଶକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟ ଖୁବ ଶୀଘ୍ର ଇଡିର ଆବେଦନ ଶୁଣାଣି କରିବେ। ଏହାର ଫଳାଫଳ ହେମନ୍ତ ସୋରେନଙ୍କ ପାଇଁ ଗୁରୁତ୍ୱପୂର୍ଣ୍ଣ ହେବ ଏବଂ ଝାଡଖଣ୍ଡର ରାଜନୈତିକ ଦୃଶ୍ୟ ଉପରେ ଏହାର ମହତ୍ତ୍ଵପୂର୍ଣ୍ଣ ପ୍ରଭାବ ପଡିପାରେ। ଜୁନ୍ ୨୮ ତାରିଖରେ ଝାଡଖଣ୍ଡର ମୁଖ୍ୟମନ୍ତ୍ରୀ ସୋରେନ୍ ରାଞ୍ଚିର ବିର୍ସା ମୁଣ୍ଡା ଜେଲରୁ ବାହାରିଥିଲେ ଏବଂ ମୁକ୍ତ ହେବା ପରେ ପୂର୍ବତନ ମୁଖ୍ୟମନ୍ତ୍ରୀ ତଥା ଜେଏମ୍ଏମ୍ ନେତା ଚମ୍ପାଇ ସୋରେନ୍ ତାଙ୍କ ପଦରୁ ଇସ୍ତଫା ଦେଇଥିଲେ। ଏହା ପରେ ହେମନ୍ତ ସୋରେନ ବିଧାନସଭାର ପ୍ଲୋର ଟେଷ୍ଟ ଜିତିବା ପରେ ସେ ପୁଣିଥରେ ମୁଖ୍ୟମନ୍ତ୍ରୀ ହୋଇଥିଲେ।
ଶ୍ରୀନଗର: ସୋମବାର ଜାମ୍ମୁ କାଶ୍ମୀର କଠୁଆରେ ଭାରତୀୟ ସେନା ଗାଡି ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ୫ ଯବାନ ସହିଦ ହୋଇଛନ୍ତି। ବର୍ତ୍ତମାନ କାଶ୍ମୀର ଟାଇଗର ନାମକ ଏକ ଆତଙ୍କବାଦୀ ସଂଗଠନ କଠୁଆ ଆତଙ୍କବାଦୀ ଆକ୍ରମଣର ନିଜକୁ ଦାୟୀ କରିଛି। ଆତଙ୍କବାଦୀ ସଂଗଠନ ଦ୍ଵାରା ଜାରି ବିବୃତ୍ତିରେ କୁହାଯାଇଛି ଯେ, ଏହି ଆକ୍ରମଣରେ ସମ୍ପୃକ୍ତ ଆତଙ୍କବାଦୀମାନେ ଏମ୪ ଆକ୍ରମଣକାରୀ ରାଇଫଲ, ଗ୍ରେନେଡ ଏବଂ ଅନ୍ୟାନ୍ୟ ଅସ୍ତ୍ର ବ୍ୟବହାର କରିଛନ୍ତି।
ଆତଙ୍କବାଦୀ ସଂଗଠନ ଆଗାମୀ ଦିନରେ ଅଧିକ ଆକ୍ରମଣ କରିବା ବିଷୟରେ ମଧ୍ୟ ଧମକ ଦେଇଛି। କାଶ୍ମୀର ଟାଇଗର ନାମକ ଆତଙ୍କବାଦୀ ସଂଗଠନ ପକ୍ଷରୁ କୁହାଯାଇଛି ଯେ, ଜୁନ୍ ୨୬ ତାରିଖରେ ଡୋଡାଠାରେ ନିହତ ତିନି ଆତଙ୍କବାଦୀଙ୍କ ମୃତ୍ୟୁ ପାଇଁ ଏହା ପ୍ରତିଶୋଧ ଅଟେ। ଜମ୍ମୁ କାଶ୍ମୀରର କଠୁଆ ଜିଲ୍ଲାର ଏକ ଆକ୍ରମଣରେ ଆତଙ୍କବାଦୀମାନେ ଏକ ସେନା ଗାଡି ଉପରକୁ ଗୁଳି ଚଳାଇ ଗ୍ରେନେଡ ସାହାଯ୍ୟରେ ଆକ୍ରମଣ କରିଥିଲେ। ଏହି ଆକ୍ରମଣରେ ୫ ଯବାନ ସହିଦ ହୋଇଥିବା ବେଳେ ୫ ଯବାନ ଆହତ ହୋଇଥିଲେ।
ନୂଆଦିଲ୍ଲୀ: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରୁଷର ମସ୍କୋରେ ପହଞ୍ଚିଛନ୍ତି। ମସ୍କୋ ବିମାନବନ୍ଦରରେ ପ୍ରଧାନମନ୍ତ୍ରୀ ମୋଦୀଙ୍କୁ ଭବ୍ୟ ସ୍ୱାଗତ କରାଯାଇଛି। ଏହି ସମୟ ମଧ୍ୟରେ ସେଠାରେ ଅନେକ ରୁଷର ନେତା ଏବଂ ସାମରିକ ଅଧିକାରୀ ଉପସ୍ଥିତ ଥିଲେ। ପ୍ରଧାନମନ୍ତ୍ରୀ ମୋଦି ଦୁଇ ଦିନିଆ ସରକାରୀ ଗସ୍ତରେ ଅଛନ୍ତି। ସେ ମସ୍କୋରେ ରାଷ୍ଟ୍ରପତି ପୁଟିନଙ୍କ ସହ ୨୨ ତମ ଭାରତ-ରୁଷ ବାର୍ଷିକ ସମ୍ମିଳନୀରେ ଯୋଗଦେବେ। ତିନି ବର୍ଷ ପରେ ଏହି ଶିଖର ସମ୍ମିଳନୀ ଅନୁଷ୍ଠିତ ହେଉଛି। କରୋନା ମହାମାରୀ ହେତୁ ଏହାକୁ ତିନି ବର୍ଷ ପାଇଁ ସ୍ଥଗିତ ରଖାଯାଇଥିଲା।
ୟୁକ୍ରେନରେ ଚାଲିଥିବା ବିବାଦ ମଧ୍ୟରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଶିଖର ସମ୍ମିଳନୀକୁ ଯିବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ, ଭାରତ ଏକ ଶାନ୍ତିପୂର୍ଣ୍ଣ ତଥା ସ୍ଥିର କ୍ଷେତ୍ର ପାଇଁ ସହଯୋଗୀ ଭୂମିକା ଗ୍ରହଣ କରିବାକୁ ଚାହୁଁଛି। ଜୁଲାଇ ୯ ତାରିଖରେ ମସ୍କୋରେ ଅନୁଷ୍ଠିତ ୨୨ ତମ ଭାରତ-ରୁଷ ସମ୍ମିଳନୀ ପୂର୍ବରୁ ଆଜି ରାତିରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନ ଭାରତୀୟ ପ୍ରଧାନମନ୍ତ୍ରୀଙ୍କ ସହ ବ୍ୟକ୍ତିଗତ ରାତ୍ରୀ ଭୋଜନ କରିବେ।
ନୂଆଦିଲ୍ଲୀ: ପଶ୍ଚିମବଙ୍ଗର ମମତା ସରକାରଙ୍କୁ ଆଜି ସୁପ୍ରିମକୋର୍ଟ ଏକ ବଡ ଝଟକା ଦେଇଛନ୍ତି। କଲିକତା ହାଇକୋର୍ଟଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରାଯାଇଥିବା ବଙ୍ଗଳା ସରକାରଙ୍କ ଆବେଦନକୁ ସୁପ୍ରିମକୋର୍ଟ ଖାରଜ କରିଛନ୍ତି। ଏହି ନିଷ୍ପତ୍ତିରେ ହାଇକୋର୍ଟ ମହିଳାଙ୍କ ଯୌନ ଶୋଷଣ, ଜମି ଦଖଲ ଏବଂ ସନ୍ଦେଶଖାଲିରେ ରାସନ ଦୁର୍ନୀତି ସହ ଜଡିତ ସମସ୍ତ ମାମଲାରେ ସିବିଆଇ ତଦନ୍ତ ନିର୍ଦ୍ଦେଶ ଦେଇଛନ୍ତି।
କଲିକତା ହାଇକୋର୍ଟଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରୁଥିବା ଆବେଦନକୁ ଖାରଜ କରିବାବେଳେ ମମତା ସରକାରଙ୍କ ମନୋଭାବ ଉପରେ ସୁପ୍ରିମକୋର୍ଟମଧ୍ୟ ପ୍ରଶ୍ନ ଉଠାଇଛନ୍ତି। ସୁପ୍ରିମକୋର୍ଟ କହିଛନ୍ତି ସରକାର କାହିଁକି ଜଣେ ବ୍ୟକ୍ତିଙ୍କୁ ବଞ୍ଚାଇବାକୁ ଚେଷ୍ଟା କରୁଛନ୍ତି?
ସିବିଆଇ ତଦନ୍ତ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି:
ପ୍ରକୃତରେ ସନ୍ଦେଶଖାଲିର ବହିଷ୍କୃତ ଟିଏମସି ନେତା ଶାହାଜାହାନ ଶେଖଙ୍କୁ ଯୌନ ଉତ୍ପୀଡ଼ନ ଏବଂ ଜମି ଦଖଲ ଅଭିଯୋଗ ହୋଇଥିଲା। ଏହି ପ୍ରସଙ୍ଗରେ ବିରୋଧୀ ମମତା ସରକାରଙ୍କୁ କଡ଼ା ଟାର୍ଗେଟ କରିଥିଲେ। ସିବିଆଇ ତଦନ୍ତ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ସୁପ୍ରିମକୋର୍ଟରେ ସନ୍ଦେଶଖାଲୀ ମାମଲାରେ ସିବିଆଇ ତଦନ୍ତ ନିର୍ଦ୍ଦେଶ ଦେଇଥିବା ହାଇକୋର୍ଟଙ୍କ ନିଷ୍ପତ୍ତିକୁ ମମତା ବାନାର୍ଜୀ ଚ୍ୟାଲେଞ୍ଜ କରିଥିଲେ।
ଏହାପୂର୍ବରୁ ଏପ୍ରିଲ ୨୯ ତାରିଖରେ ସୁପ୍ରିମକୋର୍ଟରେ ଏହି ମାମଲାର ଶୁଣାଣି ହୋଇଥିଲା। ତା’ପରେ ଜଷ୍ଟିସ୍ ଗଭଇ କହିଥିଲେ ଯେ, ଜଣେ ବ୍ୟକ୍ତିଙ୍କୁ ବଞ୍ଚାଇବା ପାଇଁ ରାଜ୍ୟ ସରକାର କାହିଁକି ଆବେଦନକାରୀ ଭାବରେ ଆସିଛନ୍ତି? ଏହା ଉପରେ ମମତା ସରକାରଙ୍କ ଓକିଲ ଜୟଦୀପ ଗୁପ୍ତା କହିଛନ୍ତି ଯେ, ରାଜ୍ୟ ସରକାରଙ୍କ ନିରନ୍ତର କାର୍ଯ୍ୟାନୁଷ୍ଠାନ ସତ୍ତ୍ୱେ ଏହି ମନ୍ତବ୍ୟ ଆସିଛି।
ନୂଆଦିଲ୍ଲୀ: ଆଜି ବିଧାନସଭାରେ ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନ ଆସ୍ଥା ଭୋଟ୍ ଜିତିଛନ୍ତି। ଆସ୍ଥା ଭୋଟ୍ ସପକ୍ଷରେ ୪୫ ଭୋଟ୍ ଦିଆଯାଇଥିବାବେଳେ ବିରୋଧୀ ଶୂନ୍ୟ ଭୋଟ୍ ପାଇଛି। ଭୋଟ୍ ସମୟରେ ବିଜେପି ବିଧାୟକମାନେକକ୍ଷ ତ୍ୟାଗ କରିଥିଲେ।
ମତଦାନ ପୂର୍ବରୁ ଫ୍ଲୋର ଟେଷ୍ଟରେ ହୋଇଥିବା ଆଲୋଚନାକୁ ଜବାବ ଦେଉଥିବାବେଳେ ହେମନ୍ତ ସୋରେନ ବିଜେପିକୁ କଡା ଟାର୍ଗେଟ କରିଥିଲେ। ସେ କେନ୍ଦ୍ରୀୟ ଏଜେନ୍ସିର ଅପବ୍ୟବହାର କରିଥିବା ଅଭିଯୋଗ କରିଛନ୍ତି।
ହେମନ୍ତ ସୋରେନଙ୍କ ଭାଷଣ ସମୟରେ ବିଜେପି ବିଧାୟକମାନେ ହଟ୍ଟଗୋଳ କରିଥିଲେ। ହେମନ୍ତ ସୋରେନ୍ କହିଥିଲେ ଯେ, ସେମାନଙ୍କର ନା ବିଚାର ଅଛି କି ଏଜେଣ୍ଡା ଅଛି। ସେମାନଙ୍କର କେନ୍ଦ୍ରୀୟ ଏଜେନ୍ସି ଅଛି। ଯଦି ବିଧାୟକଙ୍କ ସଂଖ୍ୟାର ଅଧା ମଧ୍ୟ ଏକାଠି ହୁଅନ୍ତି, ତେବେ ଏହା ଏକ ବଡ଼ କଥା ହେ। ଲୋକସଭା ନିର୍ବାଚନରେ ନିଜର ଚେହେରା ଦେଖାଇଛନ୍ତି, ଏବେ ରାଜ୍ୟ ନିର୍ବାଚନ ବାକି ଅଛି। ଗ୍ରାଣ୍ଡ ଆଲାଇନ୍ସ ଏକାଠି ଲଢିବ ଏବଂ ସେମାନଙ୍କୁ କଡା ଜବାବ ଦିଆଯିବ। ସେମାନଙ୍କର ଷଡଯନ୍ତ୍ର କାମ କରିବ ନାହିଁ।
ବିଜେପି ଉପରେ ଆକ୍ରମଣ:
ଶ୍ରୀ ସୋରେନ୍ କହିଛନ୍ତି ଯେ, “ମୁଁ ଆଇନଗତ ପ୍ରକ୍ରିୟା ମାଧ୍ୟମରେ ଏଠାକୁ ଆସିଛି। ତେବେ ବିରୋଧୀମାନେ ମୋତେ ଏହି ଭୂମିକାରେ କିପରି ଅନୁଭବ କରୁଛନ୍ତି ତାହା ଏହାର ଆଚରଣରେ ଦୃଶ୍ୟମାନ ହେଉଛି। ସେମାନେ କେବଳ ରାଜନୈତିକ ଲାଭ ଉଠାଇବାକୁ ଚେଷ୍ଟା କରୁଛନ୍ତି।
ସେ କହିଛନ୍ତି ଯେ, ମୁଁ ନିର୍ଭୟରେ ସରକାର ଚଳାଉଥିବା ତଥା ସରକାରଙ୍କୁ ବଞ୍ଚାଇଥିବା ଚମ୍ପାଇ ସୋରେନଙ୍କୁ ଧନ୍ୟବାଦ ଜଣାଉଛି। ଏହି ଲୋକମାନେ (ବିଜେପି) ଘୋଡା ବ୍ୟବସାୟ କରୁଥିଲେ।
ଉଲ୍ଲେଖ ଯୋଗ୍ୟ ଯେ, ହେମନ୍ତ ସୋରେନ ତାଙ୍କ ଘନିଷ୍ଠ ସହଯୋଗୀ ଚମ୍ପାଇ ସୋରେନ ଏହି ପଦରୁ ଇସ୍ତଫା ଦେବାର ଗୋଟିଏ ଦିନ ପରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ।
ଝାଡଡଖଣ୍ଡର ୮୧ ସଦସ୍ୟ ବିଶିଷ୍ଟ ବିଧାନସଭାରେ ବର୍ତ୍ତମାନ ୭୬ ଜଣ ବିଧାୟକ ଅଛନ୍ତି। ଜୁଲାଇ ୩ ତାରିଖରେ ହେମନ୍ତ ସୋରେନ ସରକାର ଗଠନ ପାଇଁ ଦାବି କରିଥିଲେ। ଏହା ପରେ ଶାସକ ଜେଏମଏମ-କଂଗ୍ରେସ-ଆରଜେଡି ମେଣ୍ଟ ୪୪ ଜଣ ବିଧାୟକଙ୍କ ସମର୍ଥନ ତାଲିକା ରାଜ୍ୟପାଳଙ୍କ ନିକଟରେ ଦାଖଲ କରିଥିଲେ।
ନୂଆଦିଲ୍ଲୀ: ଅପମାନଜନକ ଭାଷା ବ୍ୟବହାର କରି ତୃଣମୂଳ କଂଗ୍ରେସ (ଟିଏମସି) ସାଂସଦ ମହୁଆ ମୋଇତ୍ରାଙ୍କ ବିରୋଧରେ ଏକ ଏଫଆଇଆର ପଞ୍ଜିକୃତ ହୋଇଛି। ଭାରତୀୟ ଜଷ୍ଟିସ୍ କୋଡ୍ (ବିଏନ୍ଏସ୍) ର ଧାରା ୭୯ ଅନୁଯାୟୀ ଏକ ମାମଲା ରୁଜୁ ହୋଇଛି, ଯାହା ଜଣେ ମହିଳାଙ୍କ ସମ୍ମାନକୁ ଅପମାନିତ କରୁଥିବା ମାମଲା ଅଟେ। ସୋସିଆଲ ମିଡିଆ ସାଇଟର ଏକ ପୋଷ୍ଟରେ ମହିଳା ଆୟୁକ୍ତ ଅଧ୍ୟକ୍ଷା ରେଖା ଶର୍ମାଙ୍କ ଉପରେ ଅଶ୍ଳୀଳ ମନ୍ତବ୍ୟ ଦେଇଥିବା ଅଭିଯୋଗ ହୋଇଛି।
ମହିଳା ଆୟୋଗ ଶୁକ୍ରବାର ଦିନ ଦିଲ୍ଲୀ ପୋଲିସ ନିକଟରେ ଅଭିଯୋଗ କରିଥିଲେ। ସ୍ପେଶାଲ୍ ସେଲ୍ ଆଜି ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଦିଲ୍ଲୀ ପୋଲିସ୍ ସ୍ପେଶାଲ୍ ସେଲର ଇଣ୍ଟେଲିଜେନ୍ସ ଫ୍ୟୁଜନ୍ ଆଣ୍ଡ ଷ୍ଟ୍ରାଟେଜିକ୍ ଅପରେସନ୍ସ (ଆଇଏଫଏସଏ) ୟୁନିଟ୍ ବର୍ତ୍ତମାନ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ହ୍ୟାଣ୍ଡେଲ ବିଷୟରେ ସୂଚନା ପାଇବ, ଯେଉଁଠାରୁ ରେଖା ଶର୍ମାଙ୍କ ବିରୋଧରେ ଅପମାନଜନକ ଭାଷା ବ୍ୟବହାର କରାଯାଇଥିଲା।
ଘଟଣା କଣ?:
ବାସ୍ତବରେ ହାଥ୍ରାସ ଦୁର୍ଘଟଣା ସମ୍ପର୍କରେ ମହିଳା ଆୟୋଗ ଅଧ୍ୟକ୍ଷା ରେଖା ଶର୍ମା ଘଟଣାସ୍ଥଳରେ ପହଞ୍ଚିଥିଲେ। ସୋସିଆଲ ମିଡିଆରେ ଏହାର ଏକ ଭିଡିଓ ଆସିଛି। ଗୁରୁବାର ଦିନ, ମହୁଆ ମୋଇତ୍ରା ରେଖା ଶର୍ମାଙ୍କ ହାଥ୍ରାସ୍ ଦଳାଚକଡା ସାଇଟରେ ପହଞ୍ଚିବା ଭିଡିଓ ଉପରେ ମନ୍ତବ୍ୟ ଦେଇଛନ୍ତି। ଭିଡିଓରେ ଜଣେ ବ୍ୟକ୍ତି ରେଖା ଶର୍ମାଙ୍କ ପଛରେ ବୁଲୁଥିବାର ଏବଂ ତାଙ୍କ ଉପରେ ଏକ ଛତା ଧରିଥିବାର ଦେଖାଯାଇଛି। ସୋସିଆଲ ମିଡିଆ ପ୍ଲାଟଫର୍ମ X ରେ ଏହି ଭିଡିଓ ସେୟାର କରାଯାଇଛି ଯେଉଁଥିରେ ସୋସିଆଲ ମିଡିଆ ବ୍ୟବହାରକାରୀ ଏକ ପ୍ରଶ୍ନ ଉଠାଇଛନ୍ତି ଏବଂ ରେଖା ଶର୍ମା କାହିଁକି ନିଜ ଛତା ନେଇ ପାରିବେ ନାହିଁ ବୋଲି ଲେଖିଛନ୍ତି।
ମହୁଆ ମୋଇତ୍ରା କ’ଣ କହିଥିଲେ?:
ଏହି ମନ୍ତବ୍ୟର ଉତ୍ତରରେ ମହୁଆ ମୋଇତ୍ରା କହିଛନ୍ତି ଯେ, ସେ (ରେଖା ଶର୍ମା) ତାଙ୍କ ମାଲିକଙ୍କ ପାଇଜାମା ପରିଚାଳନାରେ ବ୍ୟସ୍ତ ଅଛନ୍ତି। ବର୍ତ୍ତମାନ ଏହାକୁ ନେଇ ଏକ ବିବାଦ ଲାଗି ରହିଛି। ଏହାକୁ ନେଇ ମାମଲା ରୁଜୁ ହୋଇଛି ଏବଂ ଦିଲ୍ଲୀର ସ୍ପେଶାଲ୍ ସେଲ୍ ଏହାର ତଦନ୍ତ କରୁଛି।
ନୂଆଦିଲ୍ଲୀ: କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଆଜି ଟ୍ୱିଟରରେ ପୋଷ୍ଟ କରି ସଂସଦର ଆଗାମୀ ବଜେଟ୍ ଅଧିବେଶନ ଘୋଷଣା କରିଛନ୍ତି। କିରେନ ରିଜିଜୁ କହିଛନ୍ତି ଯେ, ଭାରତ ସରକାରଙ୍କ ସୁପାରିଶ କ୍ରମେ ମାନ୍ୟବର ରାଷ୍ଟ୍ରପତି ଜୁଲାଇ ୨୨ ତାରିଖରେ ସଂସଦରେ ବଜେଟ୍ ଅଧିବେଶନ ଡାକିବାକୁ ଅନୁମୋଦନ କରିଛନ୍ତି। ସେ କହିଛନ୍ତି ଯେ, ଏଥର ବଜେଟ୍ ଅଧିବେଶନ ଜୁଲାଇ ୨୨ ତାରିଖରୁ ଆରମ୍ଭ ହେବ। ଅଗଷ୍ଟ ୧୨ ତାରିଖ ପର୍ଯ୍ୟନ୍ତ ବଜେଟ୍ ଅଧିବେଶନ ଜାରି ରହିବ। ଏଥି ସହ ଜୁଲାଇ ୨୩ ତାରିଖରେ ଲୋକସଭାରେ ବଜେଟ୍ ଉପସ୍ଥାପନ କରାଯିବ ବୋଲି ଶ୍ରୀ ରିଜିଜୁ କହିଛନ୍ତି।
ସାଧାରଣ ନିର୍ବାଚନ ବର୍ଷ ହୋଇଥିବାରୁ ଅର୍ଥମନ୍ତ୍ରୀ ନିର୍ମଳା ସୀତାରମଣ ଫେବୃଆରୀରେ ଅନ୍ତରୀଣ ବଜେଟ୍ ଉପସ୍ଥାପନ କରିଥିଲେ। ସେ ଇତିହାସରେ ପ୍ରଥମ ଅର୍ଥମନ୍ତ୍ରୀ ହେବେ, ଯିଏ କ୍ରମାଗତ ସପ୍ତମ ବଜେଟ୍ ଉପସ୍ଥାପନ କରିବେ। ଆଶା କରାଯାଉଛି ଯେ, ମୋଦୀ ୩.o ସରକାରଙ୍କ ବିକଶିତ ଭାରତ ଉପରେ ଧ୍ୟାନ ଦେଇ ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୫ ଆର୍ଥିକ ବର୍ଷ ପାଇଁ ବଜେଟ୍ ଉପସ୍ଥାପନ କରିବେ।
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ନିକଟରେ କହିଥିଲେ ଯେ, ଦେଶର ନାଗରିକଙ୍କ ଜୀବନରେ ଉନ୍ନତି ଆଣିବା ପାଇଁ କେନ୍ଦ୍ର ସରକାର ଉତ୍ସର୍ଗୀକୃତ ଏବଂ ଏଥିପାଇଁ ନିରନ୍ତର ଉଦ୍ୟମ ଜାରି ରଖିବେ। ୨୦୨୪ ଲୋକସଭା ନିର୍ବାଚନ ପରେ ଜୁନ୍ ୨୪ ତାରିଖରୁ ସଂସଦର ଏକ ସ୍ୱତନ୍ତ୍ର ଅଧିବେଶନ ଆୟୋଜିତ ହୋଇଥିଲା। ଯେଉଁଠାରେ ନୂତନ ସଂସଦର ସଦସ୍ୟମାନେ ଶପଥ ଗ୍ରହଣ କରିଥିଲେ ଏବଂ ଜୁନ୍ ୨୭ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସଂସଦର ମିଳିତ ଅଧିବେଶନକୁ ସମ୍ବୋଧିତ କରିଥିଲେ।
ନୂଆଦିଲ୍ଲୀ: ନ୍ୟାସନାଲ ବୋର୍ଡ ଅଫ୍ ମେଡିକାଲ ସାଇନ୍ସ (NBEMS) NEET PG ପରୀକ୍ଷାର ନୂତନ ତାରିଖ ଘୋଷଣା କରିଛି। ବର୍ତ୍ତମାନ 11 ଅଗଷ୍ଟ 2024 ରେ ଦୁଇଟି ସିଫ୍ଟରେ ପରୀକ୍ଷା କରାଯିବ। ପ୍ରାର୍ଥୀମାନେ ଅଫିସିଆଲ୍ ସାଇଟ୍ natboard.edu.in ରେ ସଂଶୋଧିତ କାର୍ଯ୍ୟସୂଚୀ ଯାଞ୍ଚ କରିପାରିବେ। କାର୍ଯ୍ୟସୂଚୀ ଯାଞ୍ଚ କରିବାକୁ, ପ୍ରାର୍ଥୀମାନେ ଏଠାରେ ଦିଆଯାଇଥିବା ପଦକ୍ଷେପଗୁଡ଼ିକୁ ମଧ୍ୟ ଅନୁସରଣ କରିପାରିବେ।
NBEMS ଦ୍ଵାରା ଜାରି କରାଯାଇଥିବା ବିଜ୍ଞପ୍ତିରେ କୁହାଯାଇଛି ଯେ, ବର୍ତ୍ତମାନ ଅଗଷ୍ଟ 11 ରେ NEET PG ପରୀକ୍ଷା କରାଯିବ। ଏହି ପରୀକ୍ଷା ଦୁଇଟି ସିଫ୍ଟରେ କରାଯିବ। କଟ୍ ଅଫ୍ ତାରିଖ କେବଳ 15 ଅଗଷ୍ଟ ରହିବ। ପରୀକ୍ଷା ସମ୍ବନ୍ଧୀୟ ଅପଡେଟଗୁଡିକ ପାଇଁ, ପ୍ରାର୍ଥୀମାନେ ସରକାରୀ ସାଇଟର ସାହାଯ୍ୟ ନେବା ଉଚିତ୍।
ନୂଆଦିଲ୍ଲୀ: ଝାଡଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) କାର୍ଯ୍ୟକାରୀ ସଭାପତି ହେମନ୍ତ ସୋରେନ ତୃତୀୟ ଥର ପାଇଁ ଝାଡଖଣ୍ଡର ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ଆଜି ରାଜ ଭବନରେ ରାଜ୍ୟପାଳ ତାଙ୍କୁ ଶପଥ ଗ୍ରହଣ କରାଇଛନ୍ତି। ଏହାପୂର୍ବରୁ ବୁଧବାର ଦିନ ଇଣ୍ଡିଆ ଆଲାଇନ୍ସର ନେତା ଏବଂ ବିଧାୟକ ଦଳ ବୈଠକରେ ଏହା ଉପରେ ନିଷ୍ପତ୍ତି ନିଆଯାଇଥିଲା।
ମୁଖ୍ୟମନ୍ତ୍ରୀ ଚମ୍ପାଇ ସୋରେନଙ୍କ ରାଞ୍ଚି ବାସଭବନରେ ଏହି ବୈଠକ ଡକାଯାଇଥିଲା। ଏଥିରେ ହେମନ୍ତ ସୋରେନଙ୍କୁ ଜେଏମଏମ ବିଧାୟକ ଦଳର ନେତା ଭାବରେ ଚୟନ କରିବାକୁ ସର୍ବସମ୍ମତି କ୍ରମେ ନିଷ୍ପତ୍ତି ନିଆଯାଇଥିଲା। ଏହି ବୈଠକରେ ଉପସ୍ଥିତ ଥିବା କଂଗ୍ରେସ ବିଧାୟକ ଇରଫାନ ଅନସାରୀ କହିଥିଲେ ଯେ, ହେମନ୍ତ ସୋରେନ ମୁଖ୍ୟମନ୍ତ୍ରୀ ହେବେ।
ନୂଆଦିଲ୍ଲୀ: ବିରୋଧୀଦଳର ନେତା ରାହୁଲ ଗାନ୍ଧୀ ବୁଧବାର ଦିନ ଏକ ଭିଡିଓ ବାର୍ତ୍ତା ଜାରି କରି ଅଗ୍ନିବୀର ଯୋଜନା ସମ୍ପର୍କରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ଏହି ସମୟରେ ଶହୀଦ ଅଜୟ କୁମାରଙ୍କ ବିଷୟରେ ଉଲ୍ଲେଖ କରିବାବେଳେ ସେ ପ୍ରତିରକ୍ଷା ମନ୍ତ୍ରୀଙ୍କୁ ସଂସଦରେ ମିଛ ବୋଲି ଅଭିଯୋଗ କରିଥିଲେ। ଏହି ଭିଡିଓରେ ଶହୀଦ ଅଜୟ କୁମାରଙ୍କ ପିତା ମଧ୍ୟ ନଜର ଆସିଛନ୍ତି, ଯିଏ କହୁଛନ୍ତି ଯେ ସହାୟତା ରାଶିରୁ ସେ ଗୋଟିଏ ଟଙ୍କା ମଧ୍ୟ ପାଇ ନାହାଁନ୍ତି। ବର୍ତ୍ତମାନ ଭାରତୀୟ ସେନାର ସ୍ପଷ୍ଟୀକରଣ ସାମ୍ନାକୁ ଆସିଛି।
ଶହୀଦ ଅଜୟଙ୍କ ପରିବାର ଏପର୍ଯ୍ୟନ୍ତ କେତେ ଟଙ୍କା ପାଇଛନ୍ତି?:
ଭାରତୀୟ ସେନା ଟ୍ୱିଟରରେ ପୋଷ୍ଟ କରିଛି ଯେ, “ସୋସିଆଲ ମିଡିଆରେ କିଛି ପୋଷ୍ଟରୁ ଜଣାପଡିଛି ଯେ ଡ୍ୟୁଟି ଲାଇନରେ ବଳିଦାନ ଦେଇଥିବା ଅଗ୍ନିବୀର ଅଜୟ କୁମାରଙ୍କ ପରିବାର ସଦସ୍ୟଙ୍କୁ କ୍ଷତିପୂରଣ ପ୍ରଦାନ କରାଯାଇ ନାହିଁ। ତାଙ୍କର ଅନ୍ତିମ ସଂସ୍କାର ସମ୍ପୂର୍ଣ୍ଣ ସାମରିକ ସମ୍ମାନ ସହିତ କରାଯାଇଥିଲା। ଅଗ୍ନିବୀର ଅଜୟଙ୍କ ପରିବାରକୁ ୯୮.୩୯ ଲକ୍ଷ ଟଙ୍କା ପ୍ରଦାନ କରାଯାଇସାରିଛି।”
ଭାରତୀୟ ସେନାର ସ୍ପଷ୍ଟୀକରଣ:
ଭାରତୀୟ ସେନା କହିଛି ଜେଆର, “ଅଗ୍ନିବୀର ଯୋଜନାର ବ୍ୟବସ୍ଥା ଅନୁଯାୟୀ ପ୍ରାୟ ୬୭ ଲକ୍ଷ ଟଙ୍କା ସହାୟତା ଏବଂ ଅନ୍ୟାନ୍ୟ ସୁବିଧା ବିଚାରାଧୀନ ଅଛି, ଯାହା ପୋଲିସ ଯାଞ୍ଚ ପରେ ତୁରନ୍ତ ବ୍ୟାଙ୍କ ଆକାଉଣ୍ଟକୁ ହସ୍ତାନ୍ତର ହେବ। ଏହିପରି ଭାବରେ ମୋଟ ୧ କୋଟି ୬୫ ଲକ୍ଷ ଟଙ୍କା ସେମାନଙ୍କୁ ଦିଆଯିବ।” ରାହୁଲ ଗାନ୍ଧୀଙ୍କ ଭିଡିଓ ବାର୍ତ୍ତାର ଦୁଇ ଘଣ୍ଟା ମଧ୍ୟରେ ସେନାର ଏହି ସ୍ପଷ୍ଟୀକରଣ ଆସିଛି।
ଭାରତୀୟ ସେନାର ସ୍ପଷ୍ଟୀକରଣ ପରେ ପ୍ରତିରକ୍ଷା ମନ୍ତ୍ରୀଙ୍କ ପ୍ରତିକ୍ରିୟା ମଧ୍ୟ ସାମ୍ନାକୁ ଆସିଛି। ପ୍ରତିରକ୍ଷା ମନ୍ତ୍ରୀଙ୍କ କାର୍ଯ୍ୟାଳୟ ଟ୍ୱିଟରରେ ପୋଷ୍ଟ କରି କହିଛି ଯେ, ଅଗ୍ନିବୀରଙ୍କ କଲ୍ୟାଣ ପାଇଁ ଭାରତୀୟ ସେନା ପ୍ରତିବଦ୍ଧ।
ଏହାପୂର୍ବରୁ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କ ଭିଡିଓରେ ଶହୀଦ ଅଜୟ କୁମାରଙ୍କ ପିତା କହିଥିଲେ ଯେ, “ରାଜନାଥ ସିଂ ଏକ ବିବୃତ୍ତି ଦେଇଛନ୍ତି ଯେ ଶହୀଦଙ୍କ ପରିବାରକୁ ୧ କୋଟି ଟଙ୍କା ମିଳିଛି। ଆମେ କକୌଣସି ବାର୍ତ୍ତା ପାଇ ନାହୁଁ କି ଟଙ୍କା ପାଇନାହୁଁ।” ଏହା ପରେ ରାହୁଲ ଗାନ୍ଧୀ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ସଂସଦରେ ମିଥ୍ୟା ଅଭିଯୋଗ କରିଥିଲେ।
ଲୋକସଭାରେ ବିରୋଧୀଦଳର ନେତା ରାହୁଲ ଗାନ୍ଧୀ ତାଙ୍କ ଭିଡିଓରେ କହିଛନ୍ତି ଯେ, ସତ୍ୟର ସୁରକ୍ଷା ହେଉଛି ପ୍ରତ୍ୟେକ ଧର୍ମର ଆଧାର, କିନ୍ତୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ସଂସଦରେ ମିଥ୍ୟା କହିଛନ୍ତି। ଶହୀଦ ଅଗ୍ନିବୀର ଅଜୟ ସିଂଙ୍କ ପରିବାରକୁ ଦିଆଯାଇଥିବା ସହାୟତା ବିଷୟରେ ତାଙ୍କ ପିତା ସତ୍ୟତା କହିଛନ୍ତି। ପ୍ରତିରକ୍ଷା ମନ୍ତ୍ରୀ ସଂସଦ, ଦେଶ, ସେନା ଏବଂ ଅଗ୍ନିବୀର ଅଜୟ ସିଂଙ୍କ ପରିବାରକୁ କ୍ଷମା ମାଗିବା ଉଚିତ୍।
ନୂଆଦିଲ୍ଲୀ: ଆଜି ରାଜ୍ୟସଭାରେ ରାଷ୍ଟ୍ରପତିଙ୍କ ଅଭିଭାଷଣରେ ଧନ୍ୟବାଦ ପ୍ରସ୍ତାବ ଉପରେ ପ୍ରଧାନମନ୍ତ୍ରୀ ମୋଦୀ ଆଲୋଚନା କରୁଛନ୍ତି। ଗୋଟିଏ ଦିନ ପୂର୍ବରୁ ସେ ଲୋକସଭାରେ ଧନ୍ୟବାଦ ପ୍ରସ୍ତାବ ଉପରେ ଆଲୋଚନାକୁ ଉତ୍ତର ଦେଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟସଭାରେ କହିଛନ୍ତି ଯେ, ‘ତୃତୀୟ ଥର ପାଇଁ ସୁଯୋଗ ପାଇବା ଐତିହାସିକ। ସାଂସଦମାନେ ଗୃହର ସମ୍ମାନ ବୃଦ୍ଧି କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ, “ଗତ ଦୁଇ-ଅଢେଇ ଦିନ ମଧ୍ୟରେ ପ୍ରାୟ ୭୦ ସାଂସଦ ଏହି ଆଲୋଚନାରେ ଭାଗ ନେଇଥିଲେ। ରାଷ୍ଟ୍ରପତିଙ୍କ ଅଭିଭାଷଣର ବ୍ୟାଖ୍ୟା କରିବାରେ ଆପଣମାନଙ୍କ ଅବଦାନ ପାଇଁ ମୁଁ ସମସ୍ତଙ୍କୁ କୃତଜ୍ଞତା ଜଣାଉଛି।”
କଂଗ୍ରେସକୁ ଟାର୍ଗେଟ:
କଂଗ୍ରେସ ଉପରେ ଆକ୍ରମଣ କରି ସେ କହିଛନ୍ତି ଯେ, ‘ଭାରତର ସ୍ୱାଧୀନତା ଇତିହାସରେ ଆମର ସଂସଦୀୟ ଗଣତାନ୍ତ୍ରିକ ଯାତ୍ରାରେ, ଅନେକ ଦଶନ୍ଧି ପରେ ଦେଶର ଲୋକମାନେ ସରକାରଙ୍କୁ କ୍ରମାଗତ ତୃତୀୟ ଥର ସେବା କରିବାର ସୁଯୋଗ ଦେଇଛନ୍ତି। ୬୦ ବର୍ଷ ପରେ ଏହା ଘଟିଛି ଯେ, ସରକାର ୧୦ ବର୍ଷ କ୍ଷମତାରେ ରହିବା ପରେ ପୁଣି ଫେରିଛି। ଏହା ଏକ ସାଧାରଣ କଥା ନୁହେଁ। କିଛି ଲୋକ ଜାଣିଶୁଣି ଜନସାଧାରଣଙ୍କ ଦ୍ୱାରା ଦିଆଯାଇଥିବା ଏହି ନିଷ୍ପତ୍ତିକୁ ଖରାପ କରିବାକୁ ଚେଷ୍ଟା କରିଛନ୍ତି। ଆମ ସରକାରର ୧୦ ବର୍ଷ ବିତିଗଲାଣି, ୨୦ ବର୍ଷ ବାକି ଅଛି। ଆମ ସରକାରର ଏକ ତୃତୀୟାଂଶ ସଂପୂର୍ଣ୍ଣ ହୋଇଛି, ଦୁଇ ତୃତୀୟାଂଶ ବାକି ଅଛି।
ନୂଆଦିଲ୍ଲୀ: ଲୋକସଭାର ପ୍ରଥମ ଅଧିବେଶନରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଆଲୋଚନା ବେଳେ ବିରୋଧୀ ଦଳର ନେତା ରାହୁଲ ଗାନ୍ଧୀ ସୋମବାର ଦିନ ଅଗ୍ନିପଥ ଯୋଜନା ଉପରେ ପ୍ରଶ୍ନ ଉଠାଇଛନ୍ତି। ଗୃହରେ ରାହୁଲ ଗାନ୍ଧୀ କହିଛନ୍ତି ଯେ, କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନା ଅନ୍ତର୍ଗତ ଶହୀଦ ମାନ୍ୟତା ଦିଆଯାଉ ନାହିଁ। ଏହା ବ୍ୟତୀତ ଶହୀଦ ଅଗ୍ନିବୀରଙ୍କ ପରିବାରକୁ କ୍ଷତିପୂରଣ ମଧ୍ୟ ଦିଆଯାଉ ନାହିଁ।
ରାହୁଲ ଗାନ୍ଧୀଙ୍କ ଏହି ଦାବି ପରେ ବର୍ତ୍ତମାନ ଶହୀଦ ଅଗ୍ନିବୀର ଅକ୍ଷୟ ଗୱାଟେଙ୍କ ପିତା ଏକ ବଡ଼ ଖୁଲାସା କରିଛନ୍ତି। ମହାରାଷ୍ଟ୍ରର ବୁଲଢାଣାର ପ୍ରଥମ ଅଗ୍ନିବୀର ଶହୀଦ ଅକ୍ଷୟ ଗୱାଟେଙ୍କ ପିତା ଲକ୍ଷ୍ମଣ ଗୱାଟେ ନିଶ୍ଚିତ କରିଛନ୍ତି ଯେ, ତାଙ୍କୁ ମୋଟ ୧ କୋଟି ୧୦ ଲକ୍ଷ ଟଙ୍କା କ୍ଷତିପୂରଣ ମିଳିଛି।
ସୋମବାର ରାହୁଲ ଗାନ୍ଧୀ ଏହି ପ୍ରସଙ୍ଗରେ ଗୃହରେ ଉଠାଇଥିବା ବେଳେ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ତୁରନ୍ତ ଏହାର ଜବାବ ଦେଇଛନ୍ତି। ରାଜନାଥ ସିଂ କହିଛନ୍ତି ଯେ, ଶହୀଦ ଅଗ୍ନିବୀରଙ୍କ ପରିବାରକୁ ସହାୟତା ଦିଆଯାଉଛି। ବିଶ୍ୱର ସର୍ବୋଚ୍ଚ ଯୁଦ୍ଧକ୍ଷେତ୍ର ସିଆଚେନ୍ ଗ୍ଲାସିଅରରେ ନିଯୁକ୍ତ ଥିବା ଅଗ୍ନିବୀର୍ ଅକ୍ଷୟ ଗୱାଟେ ଦେଶ ସେବା କରିବା ସମୟରେ ଶହୀଦ ହୋଇଥିଲେ।
ତାଙ୍କ ବଳିଦାନ ପରେ ଶହୀଦ ଅକ୍ଷୟ ଗୱାଟେଙ୍କୁ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା। ଅଗ୍ନିବୀର ଅକ୍ଷୟ ମହାରାଷ୍ଟ୍ରର ବୁଲଢାଣା ତାଲୁକର ପିମ୍ପଲାଗାଓଁ ସରାୟ ଗାଁର ବାସିନ୍ଦା ଥିଲେ। ଗତ ବର୍ଷ ଅକ୍ଟୋବରରେ, ସିଆଚେନରେ ନିଯୁକ୍ତ ହୋଇଥିବା କୋଡିଏ ବର୍ଷ ବୟସ୍କା ଗୱାଟେ ହଠାତ୍ ହୃଦଘାତ ହେତୁ ଅସୁସ୍ଥ ହୋଇ ଚିକିତ୍ସା ସମୟରେ ମୃତ୍ୟୁ ବରଣ କରିଥିଲେ।
ଅଗ୍ନିବୀରଙ୍କ ପରିବାର କେତେ ସାହାଯ୍ୟ ପାଆନ୍ତି?:
ଆର୍ମି ୱେବସାଇଟ୍ ଅନୁଯାୟୀ, ଯଦି ଅଗ୍ନିବୀର ଡ୍ୟୁଟିରେ ମୃତ୍ୟୁ ବରଣ କରନ୍ତି, ତେବେ ତାଙ୍କୁ ୪୮ ଲକ୍ଷ ଟଙ୍କା ବୀମା, ୪୪ ଲକ୍ଷ ଟଙ୍କା ଅନୁକମ୍ପା ରାଶି, ଚାରି ବର୍ଷ ପାଇଁ ପୂର୍ଣ୍ଣ ବେତନ, ସେବା ପାଣ୍ଠି ଏବଂ ସରକାରରେ ଜମା ହୋଇଥିବା ରାଶି ମିଳିବ।
ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସମସ୍ୟା ହ୍ରାସ ପାଉନାହିଁ। ଦିଲ୍ଲୀ ଅବକାରୀ ନୀତି ମାମଲାରେ ତିହାର ଜେଲରେ ଥିବା ଆମ୍ ଆଦମୀ ପାର୍ଟିର ସଂଯୋଜକ କେଜ୍ରିୱାଲଙ୍କୁ ସିବିଆଇ ସ୍ୱତନ୍ତ୍ର କୋର୍ଟ ୧୪ ଦିନ ପାଇଁ ନ୍ୟାୟିକ ହେପାଜତକୁ ପଠାଇଛନ୍ତି।
ତାଙ୍କର ୩ ଦିନିଆ ସିବିଆଇ ହେପାଜତ ଶେଷ ହେବା ପରେ କେନ୍ଦ୍ରୀୟ ତଦନ୍ତ ବ୍ୟୁରୋ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ୧୪ ଦିନିଆ ନ୍ୟାୟିକ ହେପାଜତ ଦାବି କରିଛି। ରାଉସ୍ ଆଭେନ୍ୟୁର ସ୍ୱତନ୍ତ୍ର ସିବିଆଇ କୋର୍ଟ ଅରବିନ୍ଦ କେଜ୍ରିୱାଲଙ୍କୁ ଜୁଲାଇ ୧୨ ପର୍ଯ୍ୟନ୍ତ ନ୍ୟାୟିକ ହେପାଜତ ପାଇଁ ତିହାର ଜେଲକୁ ପଠାଇଛନ୍ତି।
ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଜୁନ୍ ୨୬ ତାରିଖରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଗିରଫ କରିଥିଲା। ତାଙ୍କୁ କୋର୍ଟରେ ହାଜର କରିବା ପରେ ତାଙ୍କୁ ତିନି ଦିନ ପାଇଁ ସିବିଆଇ ହେପାଜତକୁ ପଠାଯାଇଥିଲା। ଯେତେବେଳେ ସିବିଆଇ କେଜ୍ରିୱାଲଙ୍କୁ ଗିରଫ କରିଥିଲା, ସେତେବେଳେ ସେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ୱାରା ଅନୁସନ୍ଧାନ କରାଯାଉଥିବା ଦିଲ୍ଲୀ ଅବକାରୀ ନୀତି ସମ୍ପର୍କିତ ଅର୍ଥ ହେରେଫେରେ ମାମଲାରେ ବନ୍ଦୀ ଥିଲେ।