ନୂଆଦିଲ୍ଲୀ, ବିଗତ ଶହେ ଦିନରେ 15 ଲକ୍ଷ କୋଟି ଟଙ୍କାର କ୍ଷତି। ଏହି କ୍ଷତିର ହିସାବ କେବଳ ଖୁଚୁରା ବଜାର କ୍ଷେତ୍ରରେ। କରୋନା ମହାମାରୀ ଯୋଗୁଁ ଭାରତୀୟ ଅର୍ଥନୀତିର ପ୍ରତିଟି କ୍ଷେତ୍ରକୁ ବ୍ୟାପକ କ୍ଷତିର ସମ୍ମୁଖୀନ ହେବାକୁ ପଡ଼ିଛି। ଅଖିଳ ଭାରତ ବାଣିଜ୍ୟିକ ମହାସଂଘ CAIT ଦେଇଥିବା ଏକ ବିବୃତିରେ ଏହା ଦର୍ଶାଇଛି।
ମହାସଂଘ କହିଛି ଯେ, ଦେଶବ୍ୟାପୀ ବ୍ୟବସାୟୀମାନେ ତିନି ମାସ ହେଲା ଠିକ୍ ଭାବେ ବ୍ୟବସାୟ କରି ନପାରି ସମ୍ପୂର୍ଣ୍ଣ ଭାବେ ଭାଙ୍ଗି ପଡିଛନ୍ତି। କର୍ମଚାରୀ ଅଭାବ, କାରବାରରେ ମାନ୍ଦା, ଆର୍ଥିକ ନିଅଣ୍ଟ ବ୍ୟବସାୟୀମାନଙ୍କ ମନୋବଳ ଭାଙ୍ଗି ଦେଇଛି। ଏ ଦୁର୍ଦ୍ଦିନରେ ସରକାରଙ୍କ ପକ୍ଷରୁ ଯାହା ବି ସହଯୋଗ ମିଳିବା କଥା ତାହା ମିଳୁନଥିବାରୁ ବ୍ୟବସାୟ କରି ଚଳୁଥିବା ଲୋକଙ୍କ ମନୋବଳ ଭାଙ୍ଗି ଗଲାଣି।
ପୂର୍ବରୁ ଏଭଳି ସଂକଟ ଦେଇ କେବେ ବି କେହି ଗତି କରି ନଥିଲେ। ଏହି ଧାରା ଜାରି ରହିଲେ ଦେଶରେ 20 ପ୍ରତିଶତ ଦୋକାନ, ବ୍ୟବସାୟ ପ୍ରତିଷ୍ଠାନ ବନ୍ଦ ହୋଇଯିବ ବୋଲି ସଂଗଠନର ସାଧାରଣ ସମ୍ପାଦକ ପ୍ରବୀଣ ଖଣ୍ଡେଲୱାଲ କହିଛନ୍ତି।