କେନ୍ଦ୍ର ଇସ୍ପାତ ମନ୍ତ୍ରୀ ଚୌଧୁରୀ ବୀରେନ୍ଦ୍ର ସିଂ ରବିବାର କେନ୍ଦ୍ରମନ୍ତ୍ରୀ ପଦ ଏବଂ ରାଜ୍ୟସଭା ସାଂସଦ ପଦରୁ ଅବ୍ୟାହତି ନେବେ ବୋଲି ଘୋଷଣା କରିଛନ୍ତି। ରବିବାର ନିଜ ବାସଭବନରେ ଗଣମାଧ୍ୟମ ଅଧିକାରୀଙ୍କୁ ଏହି ସୂଚନା ଦେଇଛନ୍ତି ଶ୍ରୀ ସିଂ। ସୂଚନାଯୋଗ୍ୟ ଯେ, ଶ୍ରୀ ସିଂଙ୍କ ପୁତ୍ର ବ୍ରିଜେନ୍ଦ୍ର ସିଂଙ୍କୁ ବିଜେପି ପକ୍ଷରୁ ହରିୟାଣାର ହିସାର ଲୋକସଭା ଆସନ ପାଇଁ ପ୍ରାର୍ଥୀ କରାଯାଇଛି। ଏ ନେଇ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହାଙ୍କୁ ସୂଚନା ଦେଇଥିବା କହିଛନ୍ତି ଶ୍ରୀ ସିଂ। ଇସ୍ତଫା ପ୍ରଦାନ ନେଇ ଶ୍ରୀ ସିଂ କହିଛନ୍ତି, ବିଜେପି କଦାପି ରାଜନୀତିରେ ବଂଶବାଦକୁ ପ୍ରଶୟ ଦେଇନଥାଏ ତେଣୁ ମୋ ପୁଅ ବିଜେପିରୁ ସାଂସଦ ପ୍ରାର୍ଥୀ ହୋଇଥିବାରୁ ମୁଁ ରାଜନୀତିରୁ ସନ୍ନ୍ୟାସ ନେବା ଉଚିତ୍। ୨୦୧୪ରେ ଶ୍ରୀ ସିଂ କଂଗ୍ରେସ ଛାଡି ବିଜେପିରେ ଯୋଗ ଦେଇଥିଲେ। ପ୍ରଥମେ ସ୍ବଚ୍ଛତା,ଜଳଯୋଗାଣ ଏବଂ ପଞ୍ଚାୟତିରାଜ ବିଭାଗରେ କେନ୍ଦ୍ରମନ୍ତ୍ରୀ ରହିବା ପରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ମଧ୍ୟ ରହିଥିଲେ। ୨୦୧୬ରେ ଶ୍ରୀ ସିଂ ଇସ୍ପାତ ମନ୍ତ୍ରଣାଳୟ ସମ୍ଭାଳିଥିଲେ।
