ସାଗରିକା
ମହାରାଷ୍ଟ୍ରର ୧୯ତମ ମୁଖ୍ୟମନ୍ତ୍ରୀ ରୁପେ ଆଜି ଶପଥ ନେବେ ଉଦ୍ଧବ ଠାକରେ । ଆଜି ସନ୍ଧ୍ୟା ଶିବାଜୀ ପାର୍କରେ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ । ଶିବସେନା-କଂଗ୍ରେସ-ଏନସିପି ମିଳିତ ଭାବରେ ‘ମହାରାଷ୍ଟ୍ର ବିକାଶ ଅଘାଡ଼ି’ ମେଣ୍ଟ ଗଠନ କରିଛନ୍ତି । ଏହି ମେଣ୍ଟର ନେତା ଭାବେ ଆଜି ଉଦ୍ଧବ ଠାକ୍ରେ ମୁଖ୍ୟମନ୍ତ୍ରୀ ରୂପେ ଶପଥ ଗ୍ରହଣ କରିବେ । ମାସେ କାଳ ଲାଗି ରହିଥିବା ରାଜନୈତିକ ସଂକଟ ପରେ ରାଜ୍ୟ ତା’ର ଆଗାମୀ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିବାକୁ ଲାଗିପଡିଛି । ତେବେ ଆସନ୍ତୁ ଜାଣିବା ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ଇତିହାସ ଓ ପୃଷ୍ଠଭୂମି ସମ୍ପର୍କରେ କିଛି କଥା-
୧୯୬୦ରେ ମହାରାଷ୍ଟ୍ର ସୌରାଷ୍ଟ୍ର ବା ବମ୍ବେ ପ୍ରଦେଶ (ଗୁଜରାଟ ଓ ମହାରାଷ୍ଟ୍ର)ରୁ ଅଲଗା ରାଜ୍ୟ ଭାବେ ମାନ୍ୟତା ପାଇଥିଲା । ସେହି ସମୟରେ ବମ୍ବେ ପ୍ରଦେଶରେ ଦୁଇ ମୁଖ୍ୟମନ୍ତ୍ରୀ ରହୁଥିଲେ। ପରେ ପରେ ବମ୍ବେ ପ୍ରଦେଶ ଅଲଗା ହୋଇ ଗୁଜୁରାଟ ଓ ମହାରାଷ୍ଟ୍ର ଦୁଇଟି ରାଜ୍ୟ ହୋଇଥିଲେ ।
ବମ୍ବେ ପ୍ରଦେଶର ପ୍ରଥମ ମୁଖ୍ୟମନ୍ତ୍ରୀ ରହିଥିଲେ ମୋରାରଜୀ ଦେଶାଇ । ସେ ୧୯୫୦ରେ ମୁଖ୍ୟମନ୍ତ୍ରୀ ହୋଇଥିଲେ । ୩୧ ଅକ୍ଟୋବର ୧୯୫୬ ପର୍ଯ୍ୟନ୍ତ ଏହି ପଦବୀରେ ରହିଥିଲେ । ଏହି ସମୟରେ ରାଜ୍ୟ ପୁନର୍ଗଠନର ଦାବି ଉଠିଥିଲା । ଏହା ପରେ ବମ୍ବେ ପ୍ରଦେଶରେ ଯଶଓ୍ବନ୍ତ ଚୌହାନ ମୁଖ୍ୟମନ୍ତ୍ରୀ ହୋଇଥିଲେ। ଯିଏ ଅଳ୍ପ ସମୟ ପାଇଁ ଏହି ପଦବୀରେ ରହିଥିଲେ ବି ଦୁଇ ଥର ମୁଖ୍ୟମନ୍ତ୍ରୀ ହୋଇଛନ୍ତି । ୧୯୬୦ରେ ମହାରାଷ୍ଟ୍ର ଓ ଗୁଜୁରାଟ ଦୁଇ ଅଲଗା ଅଲଗା ରାଜ୍ୟ ହୋଇଥିଲା । ୧୯୬୦ରୁ ୨୦୧୯ ବର୍ଷ ମଧ୍ୟରେ ୫୯ ବର୍ଷ ମଧ୍ୟରେ ମହାରାଷ୍ଟ୍ରରେ ଅନେକ ମୁଖ୍ୟମନ୍ତ୍ରୀ ଆସିଛନ୍ତି ଓ ଯାଇଛନ୍ତି । ଏହି କ୍ରମରେ ସବୁଠାରୁ ଅଧିକ ସମୟ ପାଇଁ ମୁଖ୍ୟମନ୍ତ୍ରୀ ପଦବୀରେ ରହିଛନ୍ତି ଏନସିପି ନେତା ଶରଦ ପାଓ୍ବାର । ପାଖାପାଖି ଚାରି ଥର ମୁଖ୍ୟମନ୍ତ୍ରୀ ହୋଇଥିବାବେଳେ ସବୁଠାରୁ କମ୍ ଦିନ ପାଇଁ ଦେବେନ୍ଦ୍ର ଫଡ୍ନବୀସ୍ ରହିଛନ୍ତି । ୨୦୧୪ରେ ପାଞ୍ଚବର୍ଷ ମୁଖ୍ୟମନ୍ତ୍ରୀ ରୂପେ କାର୍ଯ୍ୟକରିଥିବା ଦେବେନ୍ଦ୍ର ଫଡ୍ନଭୀସ୍ ୨୦୧୯ରେ ମାତ୍ର ୪ ଦିନ ପାଇଁ ମୁଖ୍ୟମନ୍ତ୍ରୀ ହୋଇଥିଲେ ।
ମହାରାଷ୍ଟ୍ରର ମୁଖ୍ୟମନ୍ତ୍ରୀମାନଙ୍କ କାର୍ଯ୍ୟକାଳ :
- ଯଶଓ୍ବନ୍ତ ରାଓ ଚଭନ ୧୯୬୦ରୁ ମୁଖ୍ୟମନ୍ତ୍ରୀ ହୋଇଥିବାବେଳେ ୧୯ ନଭେମ୍ବର ୧୯୬୨ ପର୍ଯ୍ୟନ୍ତ କାର୍ଯ୍ୟ କରିଥିଲେ ।
- ମାରୋତରାଓ୍ବ କନ୍ନମବାର ୧୯୬୨ରେ ମୁଖ୍ୟମନ୍ତ୍ରୀ କାର୍ଯ୍ୟଭାର ସମ୍ଭାଳିଥିବାବେଳେ ୧୯୬୩ ନଭେମ୍ବର ୨୪ ପର୍ଯ୍ୟନ୍ତ ଏହି ପଦବୀରେ ରହିଥିଲେ ।
- ଆରକେ ସାୱନ୍ତ ୧୯୬୩ ମସିହାରେ ମୁଖମନ୍ତ୍ରୀ ହୋଇ ୧୯୬୩ ଡିସେମ୍ବର ୪ ପର୍ଯ୍ୟନ୍ତ ରହିଥିଲେ ।
- ଯଶଓ୍ବନ୍ତ ରାଓ ଚଭନ ତିନିଥର ମୁଖ୍ୟମନ୍ତ୍ରୀ ରହିଥିଲେ । ୧୯୬୩, ୧୯୬୭ ଓ ୧୯୭୨ ପର୍ଯ୍ୟନ୍ତ ରହିଥିଲେ ।
- ଶଙ୍କରରାଓ ଚୌହ୍ବାଣ ମଧ୍ୟ ତିନିଥର ମୁଖ୍ୟମନ୍ତ୍ରୀ ରହିଥିଲେ । ୧୯୭୫, ୧୯୭୭ ଓ ୧୯୮୬ ମସିହାରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ପଦବୀ ସମ୍ଭାଳିଥିଲେ ।
- ବସନ୍ତଦାଦା ପାଟିଲ୍ ଦୁଇ ଥର ମୁଖ୍ୟମନ୍ତ୍ରୀ ପଦବୀ ସମ୍ଭାଳିଥିଲେ । ୧୯୭୮ ଓ ୧୯୮୩ରେ ସେ ଏହି ପଦବୀ ସମ୍ଭାଳିଥିଲେ ।
- ଏନ୍ସିପି ପ୍ରମୁଖ ଶରଦ ପାଓ୍ବାର ମହାରାଷ୍ଟ୍ରର ଚାରି ଥର ମୁଖ୍ୟମନ୍ତ୍ରୀ ହୋଇଛନ୍ତି । ୧୯୭୮, ୧୯୮୮, ୧୯୯୦ ଓ ୧୯୯୩ରେ ସେ ଏହି ପଦବୀ ସମ୍ଭାଳିଥିଲେ ।
- ଅବଦୁଲ୍ ରହମାନ୍ ଅନ୍ତୁଲେ ଜୁନ୍ ୯ ୧୯୮୦ରୁ ୧୨ ଜାନୁଆରୀ ୧୯୮୨ ପର୍ଯ୍ୟନ୍ତ ରହିଥିଲେ ।
- ବାବାସାହେବ ଭୋସେଲ ଜାନୁଆରୀ ୨୧, ୧୯୮୨ରେ ମୁଖ୍ୟମନ୍ତ୍ରୀ ହୋଇ ଫେବୃଆରୀ ୧,୧୯୮୩ ପର୍ଯ୍ୟନ୍ତ ଦାୟିତ୍ବରେ ରହିଥିଲେ ।
- ଶିବାଜୀରାଓ ପାଟିଲ୍ ଜୁନ୍ ୩, ୧୯୮୫ରୁ ମାର୍ଚ୍ଚ ୬, ୧୯୮୬ ପର୍ଯ୍ୟନ୍ତ ଏହି ପଦବୀରେ ରହିଥିଲେ ।
- ସୁଧାକରରାଓ ନାଏକ୍ ୧୯୯୧ରୁ ୧୯୯୩ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ରହିଥିଲେ ।
- ମନୋହର ଯୋଶୀ ଶିବସେନା -ବିଜେପି ମେଣ୍ଟର ପ୍ରଥମ ନେତା ଭାବେ ୧୯୯୫ରୁ ୧୯୯୯ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ଦାୟିତ୍ବ ସମ୍ଭାଳିଥିଲେ ।
- ନାରାୟଣ ରାଣେ ଫେବୃଆରୀ ୧୯୯୯ରୁ ଅକ୍ଟୋବର ୧୭, ୧୯୯୯ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ରହିଥିଲେ ।
- ବିଳାସରାଓ ଦେଶମୁଖ ଦୁଇଥର ଏହି ପ୍ରଦେଶର ମୁଖ୍ୟମନ୍ତ୍ରୀ ରୂପେ ରହିଥିଲେ । ପ୍ରଥମଥର ୧୯୯୯ ମସିହାରେ ମୁଖ୍ୟମନ୍ତ୍ରୀ ହୋଇଥିବାବେଳେ ଦ୍ବିତୀୟ ୨୦୦୪ ମସିହାରେ ମୁଖ୍ୟମନ୍ତ୍ରୀ ଦାୟିତ୍ବ ନିର୍ବାହ କରିଥିଲେ ।
- ସୁଶୀଲ୍ କୁମାର ସିନ୍ଧେ ଫେବୃଆରୀ ୧୮, ୨୦୦୩ରୁ ଅକ୍ଟୋବର ୩୦, ୨୦୦୪ ପର୍ଯ୍ୟନ୍ତ ଏହି ପଦବୀରେ ରହିଥିଲେ।
- ଅଶୋକ ଚୌହ୍ବାଣ ଦୁଇ ଥର ମହାରାଷ୍ଟ୍ରରେ ମୁଖ୍ୟମନ୍ତ୍ରୀ ରହିଥିଲେ । ପ୍ରଥମଥର ୨୦୦୯ ମସିହାରେ ଓ ପରବର୍ତ୍ତୀ ସମୟରେ ୨୦୧୦ ସମୟରେ ମୁଖ୍ୟମନ୍ତ୍ରୀ ହୋଇଥିଲେ ।
- ପୃଥ୍ବୀରାଜ ଚୌହ୍ବାଣ ନଭେମ୍ବର ୨୦୦୪ରୁ ଡିସେମ୍ବର ୨୦୧୪ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ପଦବୀରେ ରହିଥିଲେ ।
- ଦେବେନ୍ଦ୍ର ଫଡନଭିସ୍ ଦୁଇ ଦୁଇଥର ମୁଖ୍ୟମନ୍ତ୍ରୀ ରହିଛନ୍ତି । ୨୦୧୪ରେ ପାଞ୍ଚ ବର୍ଷ ପାଇଁ ମୁଖ୍ୟମନ୍ତ୍ରୀ ପଦବୀ ସମ୍ଭାଳିଥିବାବେଳେ ୨୦୧୯ରେ ମାତ୍ର ୪ ଦିନ ପାଇଁ ମୁଖ୍ୟମନ୍ତ୍ରୀ ଦାୟିତ୍ବ ସମ୍ଭାଳିଥିଲେ ।
- ମହାରାଷ୍ଟ୍ରରେ ଆଗାମୀ ମୁଖ୍ୟମନ୍ତ୍ରୀଙ୍କ ତାଲିକାରେ ଶିବସେନା ପ୍ରମୁଖ ଉଦ୍ଧବ ଠାକ୍ରେଙ୍କ ନାମ ସାମିଲ୍ ହୋଇଛି । ସେ ୨୮ ନଭେମ୍ବର ୨୦୧୮ରେ ରାଜ୍ୟର ୧୯ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ ।