ନୂଆଦିଲ୍ଲୀ: ଆୟକର ବିଭାଗ ପୁଣି ଥରେ କଂଗ୍ରେସ ପାର୍ଟିକୁ ନୋଟିସ ପଠାଇଛି। ଏହି ନୋଟିସରେ ଦଳଠାରୁ ୧୭୦୦ କୋଟି ଟଙ୍କା ମଗାଯାଇଛି। ସୂଚନାନୁସାରେ, ଆୟକର ବିଭାଗର ଡିମାଣ୍ଡ ନୋଟିସ ୨୦୧୭-୧୮ ରୁ ୨୦୨୦-୨୧ ବର୍ଷ ପାଇଁ ଅଟେ। ୧୭୦୦ କୋଟି ଟଙ୍କାରେ ଜରିମାନା ଏବଂ ସୁଧ ଅନ୍ତର୍ଭୁକ୍ତ। ଆୟକର ବିଭାଗର ନୋଟିସ ୨୦୨୪ ଲୋକସଭା ନିର୍ବାଚନ ସମୟରେ କଂଗ୍ରେସର ସମସ୍ୟାକୁ ଆହୁରି ବଢାଇ ଦେଇଛି। ୨୦୧୭-୨୦୨୧ ପାଇଁ ଆୟକର ବିଭାଗର ଜରିମାନାର ପୁନଃ ଯାଞ୍ଚ ପାଇଁ କଂଗ୍ରେସ ଦିଲ୍ଲୀ ହାଇକୋର୍ଟରେ ଏକ ପିଟିସନ ଦାଖଲ କରିଥିଲା, କିନ୍ତୁ କୋର୍ଟ କଂଗ୍ରେସର ଆବେଦନକୁ ଖାରଜ କରିଥିଲେ। ଏହା ପରେ ପାର୍ଟିକୁ ନୋଟିସ ପଠାଯାଇଛି।
ବର୍ତ୍ତମାନ କଂଗ୍ରେସ ଦଳ ଆଉ ତିନି ବର୍ଷର ଆୟର ତଦନ୍ତ ଶେଷ କରିବାକୁ ଅପେକ୍ଷା କରିଛି। ଏହି ତଦନ୍ତ ରବିବାର ସୁଦ୍ଧା ଶେଷ ହେବ। ହାଇକୋର୍ଟରେ ଶୁଣାଣି ବେଳେ କଂଗ୍ରେସ ଓକିଲ ତଥା ରାଜ୍ୟସଭା ସାଂସଦ ବିବେକ ତନଖା ଆୟକର ବିଭାଗର କାର୍ଯ୍ୟାନୁଷ୍ଠାନ ଉପରେ ସ୍ଥଗିତ ରଖିବାକୁ ଦାବି କରିଛନ୍ତି। ସେ କହିଛନ୍ତି ଯେ, ଆୟକର ବିଭାଗର କାର୍ଯ୍ୟାନୁଷ୍ଠାନ ଅନୁଚିତ ଏବଂ ଗଣତନ୍ତ୍ର ବିରୋଧୀ। କଂଗ୍ରେସ ଅଭିଯୋଗ କରିଛି ଯେ, ଲୋକସଭା ନିର୍ବାଚନ ସମୟରେ ମୁଖ୍ୟ ବିରୋଧୀ ଦଳକୁ ଜାଣିଶୁଣି ଟାର୍ଗେଟ କରାଯାଉଛି।
ଆୟକର ବିଭାଗ ଦିଲ୍ଲୀରେ ଅବସ୍ଥିତ କଂଗ୍ରେସ ପାର୍ଟିର ବ୍ୟାଙ୍କ ଆକାଉଣ୍ଟରୁ ୧୩୫ କୋଟି ଟଙ୍କା ଜବତ କରିସାରିଛି। କଂଗ୍ରେସ ନିଶ୍ଚିତ ଭାବରେ ୨୦୧୮-୧୯ ପାଇଁ ସର୍ତ୍ତ ପୂରଣ କରିବାରେ ସକ୍ଷମ ନୁହେଁ। ଆୟକର ବିଭାଗ କୋର୍ଟରେ କହିଛି ଯେ, ମୂଲ୍ୟାଙ୍କନରେ ୫୨୦ କୋଟି ଟଙ୍କା ଅନ୍ତର୍ଭୂକ୍ତ କରାଯାଇ ନାହିଁ। ବିଭିନ୍ନ ସ୍ଥାନରେ ଚଢୁଆ ମାଧ୍ୟମରେ ଆୟକର ବିଭାଗ ଏପରି ଅନେକ ପ୍ରମାଣ ପାଇଛି, ଯାହା ସ୍ପଷ୍ଟ ଭାବରେ ଦର୍ଶାଉଛି ଯେ ନଗଦ ଟଙ୍କା ମାଧ୍ୟମରେ କାରବାର ହୋଇଛି। ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କମଲ ନାଥଙ୍କ ଘନିଷ୍ଠ ସମ୍ପର୍କୀୟମାନେ ମଧ୍ୟ ଏଥିରେ ସାମିଲ ହୋଇଥିଲେ। ଆୟକର ବିଭାଗ କହିଛି ଯେ, କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡି.କେ ଶିବକୁମାର ଏବଂ ଏକ କମ୍ପାନୀ ସହିତ କଂଗ୍ରେସ ପାର୍ଟିର କାରବାର ସାମ୍ନାକୁ ଆସିଛି, ଯାହା ନିୟମର ଉଲ୍ଲଂଘନ ଅଟେ।
