ମୁମ୍ବାଇ: ମହାରାଷ୍ଟ୍ରର ମୁଖ୍ୟମନ୍ତ୍ରୀ କିଏ ହେବେ? ଆଜି ଏହାର ପରଦା ଉଠିବ। ଶିବସେନା ସଭାପତି ଏକନାଥ ସିନ୍ଦେ କହିଛନ୍ତି ଯେ, ସୋମବାର ଦିନ ମୁଖ୍ୟମନ୍ତ୍ରୀ ନିଷ୍ପତ୍ତି ନିଆଯିବ ଏବଂ ନିଷ୍ପତ୍ତି ଯାହା ହେଉନା କାହିଁକି ତାଙ୍କ ଦଳ ସର୍ତ୍ତବିହୀନ ସମର୍ଥନ ଦେଇଛନ୍ତି। ଏଥି ସହିତ ଏହା ମଧ୍ୟ ଆଲୋଚନା ହେଉଛି ଯେ, ମୁଖ୍ୟମନ୍ତ୍ରୀ ପଦ ପାଇଁ ଦେବେନ୍ଦ୍ର ଫଡନାଭିସଙ୍କ ନାମ ଚୂଡାନ୍ତ ହୋଇଛି।
ରବିବାର ଦିନ ବିଜେପିର ଜଣେ ବରିଷ୍ଠ ନେତା କହିଛନ୍ତି ଯେ, ମହାରାଷ୍ଟ୍ରର ନୂତନ ମୁଖ୍ୟମନ୍ତ୍ରୀ ଭାବରେ ଦେବେନ୍ଦ୍ର ଫଡନାଭିସଙ୍କ ନାମ ଚୂଡାନ୍ତ ହୋଇଛି। ବିଜେପି ବିଧାୟକ ଦଳର ନୂତନ ନେତା ବାଛିବା ପାଇଁ ବୈଠକ ଡିସେମ୍ବର ୨ କିମ୍ବା ୩ ତାରିଖରେ ଅନୁଷ୍ଠିତ ହେବ।
ଏକନାଥ ସିନ୍ଦେ କ’ଣ କହିଥିଲେ?:
ମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ଯେ, ମହାୟୁତୀ ବୈଠକରେ ଗୃହମନ୍ତ୍ରୀ ପଦ ସମେତ ସମସ୍ତ ପ୍ରସଙ୍ଗ ଉପରେ ଆଲୋଚନା ହେବା ପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ। ସେ କହିଛନ୍ତି ଯେ, ମହାୟୁତୀକୁ ରାଜ୍ୟବାସୀ ସ୍ପଷ୍ଟ ସଂଖ୍ୟାଗରିଷ୍ଠତା ଦେଇଛନ୍ତି ଏବଂ ସେମାନଙ୍କର ଆଶା ପୂରଣ କରୁଥିବା ଏକ ସ୍ଥିର ସରକାର ଯୋଗାଇବା ଆମର ପ୍ରାଥମିକତା। ସାତାରାର ଦାରେ ଗାଁରୁ ମୁମ୍ବାଇ ଫେରିବା ପୂର୍ବରୁ ସେ ଗଣମାଧ୍ୟମ ସହ କଥା ହୋଇ ନିଜର ମତ ରଖିଥିଲେ।
