କେଦାର ମିଶ୍ର
ନିର୍ବାଚନ ସମୟରେ ନୂଆ ନୂଆ ପଦ ଗଢିବାର ଅଭ୍ୟାସ ରାଜନୈତିକ ଦଳମାନଙ୍କର ରହିଛି। ତେବେ ନରେନ୍ଦ୍ର ମୋଦୀଙ୍କ ନେତୃତ୍ଵରେ ବିଜେପି ସରକାର ଆସିବା ପରେ ଏମିତି ପଦ ଗଠନ, ଗୋଟେ ପ୍ରକାର ଫେସନରେ ପରିଣତ ହୋଇଛି। ଯେମିତି “ଅଛେ ଦିନ” । ଯେମିତି ପ୍ରତି ବ୍ୟାଙ୍କ ଖାତାରେ ୧୫ ଲକ୍ଷ ଟଙ୍କା। ଯେମିତି ନୋଟବନ୍ଦୀରେ କଳାଧନ ଉପରେ ସର୍ଜିକାଲ ଷ୍ଟ୍ରାଇକ। କିମ୍ବା ଗୁଜରାଟ ମଡେଲ। ଶୁଣିବା ଲାଗି ଏସବୁ ବହୁତ ଭଲ ଶବ୍ଦ। ହେଲେ ବାସ୍ତବ କ୍ଷେତ୍ରରେ ଏହାର କୌଣସି ଉପଯୋଗ ନାଇଁ। ଏବେ ଯେଉଁ ସବୁ ରାଜ୍ୟରେ ବିଜେପି ବା ବିଜେପି ସମର୍ଥିତ ସରକାର ନାହିଁ, ସେଠି ବିଜେପି କହୁଛି, ବିକାଶ ଲାଗି ଡବଲ ଇଞ୍ଜିନର ସରକାର ଦରକାର । ଅର୍ଥାତ କେନ୍ଦ୍ର ଓ ରାଜ୍ୟରେ ବିଜେପି ସରକାର। ବିକାଶ ହେବାକୁ ହେଲେ ଏହା ଏକମାତ୍ର ଆବଶ୍ୟକତା ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାଷଣ ଦେଇ ଚାଲିଛନ୍ତି। ଏ ପ୍ରକାର ଭାଷଣ ଦେଲାବେଳେ ନିଜର ଇତିହାସ ବୋଧେ ନରେନ୍ଦ୍ର ମୋଦୀଙ୍କର ମନେ ନାହିଁ ! ୨୦୧୪ ରେ ମୋଦୀ ଯେଉଁ ଗୁଜରାଟ ମଡେଲ ଦେଖାଇ ଭୋଟ ମାଗୁଥିଲେ ସେ ଗୁଜରାଟ ମଡ଼େଲର ସରକାର ଡବଲ ଇଞ୍ଜିନ ବାଲା ଥିଲା ନା ଗୋଟିଏ ଇଞ୍ଜିନରେ ଚାଲୁଥିଲା? କେନ୍ଦ୍ରର କଂଗ୍ରେସ ସରକାର ବିରୋଧରେ ନରେନ୍ଦ୍ର ମୋଦୀ ଯେଉଁ ଗୁଜରାଟ ମଡେଲ ତିଆରି କରିଥିଲେ ତାହା ଛଳନା ଥିଲା କି ?
ଆମର ସଙ୍ଘୀୟ ବ୍ୟବସ୍ଥାରେ କେନ୍ଦ୍ର ଓ ରାଜ୍ୟ ସରକାର ଯେ କୌଣସି ଦଳରୁ ଆସିଲେ ମଧ୍ୟ ସମ୍ବିଧାନର ନିୟମ ଅନୁଯାୟୀ ପରସ୍ପରକୁ ସହଯୋଗ କରିବାକୁ ସେମାନେ ବାଧ୍ୟ। ଯଦି କେହି କହୁଛି ଯେ ଦୁଇଟି ଯାକ ସରକାର ଗୋଟିଏ ଦଳର ହେଲେ ଯାଇ ବାସ୍ତବ ବିକାଶ ହେବ, ସେ ମିଛ କହୁଛି ନଚେତ ସମ୍ବିଧାନର ଅବମାନନା କରୁଛି। ପ୍ରଧାନମନ୍ତ୍ରୀ ପଦରେ ଥିବା ବ୍ୟକ୍ତି ଏ ଦୁଇଟାରୁ କୌଣସି ଗୋଟିଏ କରିବା ଆମ ଗଣତନ୍ତ୍ର ପାଇଁ ବିପଦ। ଓଡିଶା ଆସି ପ୍ରଧାନମନ୍ତ୍ରୀ ବାରମ୍ବାର ଡବଲ ଇଞ୍ଜିନର ସରକାର କଥା କହୁଛନ୍ତି। ତେବେ କଣ ସେ ଡବଲ ଇଞ୍ଜିନ ଓ ସେଥିରେ ଆମର ସଙ୍ଘୀୟ ଗଣତନ୍ତ୍ର ପ୍ରତି କି ବିପଦ ସୃଷ୍ଟି ହେବ, ତାକୁ ନେଇ ବ୍ୟାପକ ଚର୍ଚ୍ଚା ହେବା ଉଚିତ।
ତେବେ ଡବଲ ଇଞ୍ଜିନର ବିତର୍କରେ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୁଇଟି ପ୍ରମୁଖ ପ୍ରସଙ୍ଗ ଯୋଡିଛନ୍ତି। ସରକାରର ଡବଲ ଇଞ୍ଜିନ କହିଲେ ଗୋଟିଏ ପଟେ ସରକାର ଓ ଅପର ପକ୍ଷରେ ସଶକ୍ତ ମହିଳା ସଂଗଠନ ବୋଲି ସେ କହିଛନ୍ତି। ଏହା ସହିତ ଗତକାଲି ଦଶପଲ୍ଲାଠାରେ ନିର୍ବାଚନୀ ସଭାରେ ଭାଷଣ ଦେଇ ମୁଖ୍ୟମନ୍ତ୍ରୀ ପଚାରିଛନ୍ତି ଯେ, ବିଜେପିର ଗୋଟେ ଇଞ୍ଜିନ ଆସି ଖାଲି ବଡ ବଡ କଥା କହୁଛନ୍ତି, ହେଲେ ତାଙ୍କର ଅନ୍ୟ ଇଞ୍ଜିନ ଟି କିଏ? ଏଠି ବିଜେପି ରାଜ୍ୟ ନେତୃତ୍ୱ ଉପରେ ନବୀନ ସିଧାସଳଖ ପ୍ରହାର କରିଛନ୍ତି। ଓଡିଶା ଇଞ୍ଜିନର ସଜ୍ଞା ଓ ସ୍ଵରୂପ ବିଷୟରେ ବିଜେପି ଲୋକଙ୍କୁ ଜବାବ ଦେଉ ବୋଲି ଗୋଟେ ଧାରଣା ଲୋକଙ୍କ ଭିତରେ ନବୀନ ବାବୁ ଛାଡି ଦେଇଛନ୍ତି। ଏବେ ବିଜେପି ଭିତରେ ମାଳ ମାଳ ଅସନ୍ତୁଷ୍ଟ ନେତାଙ୍କ ଭିଡ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏଠି ନିଜକୁ ଅଘୋଷିତ ନେତା ବୋଲି ଦେଖେଇ ହେଉଥିଲେ ମଧ୍ୟ ତାଙ୍କୁ ନେତା ବୋଲି ମାନିବାକୁ କେହି ପ୍ରସ୍ତୁତ ନୁହନ୍ତି। ଇତି ମଧ୍ୟରେ ବିଜେଡ଼ିର ଅନେକ ଘରଭଙ୍ଗା ନେତା ବିଜେପିରେ ପ୍ରବେଶ କରିଛନ୍ତି। ସେମାନେ ଏବେ ବିଜେପି ନେତୃତ୍ୱ ହାତେଇବାକୁ ହମ ହମ ହେଉଛନ୍ତି। ବିଜେପିରେ ଏବେ ବହୁତ ନେତା, ହେଲେ ନେତୃତ୍ୱ କେବଳ ହାୱା ହାତରେ ରହିଛି। ବିନା ସ୍ପଷ୍ଟ ନେତୃତ୍ବରେ ବିଜେପି ଏଠି ନିର୍ବାଚନ ଜିତିଯିବ ବୋଲି ଭାବୁଛି। ବିଜେପି ନେତା ଓ ସମର୍ଥକମାନେ ସ୍ଵୀକାର କରୁଛନ୍ତି ଯେ, ଓଡିଶାରେ ଜିତିବା ଭଳି ସଂଗଠନ ଓ ଶକ୍ତି ବିଜେପିର ନାହିଁ। କେବଳ ମୋଦୀ ହାୱା ମାଧ୍ୟମରେ ବିଜେପି କିଛି ଲୋକସଭା ଆସନ ପାଇଯିବ ବୋଲି ସେମାନେ ଭାବୁଛନ୍ତି।
ଏଠି କହିରଖିବା ଉଚିତ ହେବ ଯେ, ୨୦୧୪ ରେ ସାରା ଦେଶରେ ଯେଉଁ ମୋଦୀ ହାୱା ଥିଲା ତାହା ଏଥର ବିଲକୁଲ ନାହିଁ। ବରଂ ହିନ୍ଦୀ କ୍ଷେତ୍ରରେ ଏବେ ବିଜେପିର ବିପର୍ଯୟ ଆରମ୍ଭ ହୋଇଯାଇଛି। ସେଥିରେ ମୋଦୀ ହାୱା ଓଡିଶାରେ କାମ ଦେବ ବୋଲି ଭାବିବା ସତ୍ୟର ଅପଳାପ ହେବ। ଗତଥର ମଧ୍ୟ ବଲାଙ୍ଗୀର, ବାଲେଶ୍ଵର, କଳାହାଣ୍ଡି, ଭୁବନେଶ୍ୱର, କେନ୍ଦୁଝର ଓ ମୟୂରଭଞ୍ଜ ଆସନରେ ବିଜେପି ଜିତୁଛି ବୋଲି ପ୍ରବଳ ହାୱା ସୃଷ୍ଟି ହୋଇଥିଲା, ଯାହାକି ଫଳ ବାହାରିଲା ବେଳକୁ ଫୁସକି ଯାଇଥିଲା। ଏଥର ସେ ପ୍ରକାର ହାୱା ସତରେ କାମ ଦେଉଛି କି ନାଇଁ, ତାହା ଆସନ୍ତା ମଇ ୨୩ ତାରିଖରେ ଜଣା ପଡିବ। ନବୀନ ପଟ୍ଟନାୟକ ଏବେ ଡବଲ ଇଞ୍ଜିନ ବିତର୍କକୁ ଡେଇଁପଡି ବିଜେପିର ସବୁଠୁ ବଡ କ୍ଷତକୁ ଚାହାଲି ଦେଇଛନ୍ତି। ବିନା ଡବଲ ଇଞ୍ଜିନର ସରକାରରେ ଦକ୍ଷିଣ ଭାରତୀୟ ରାଜ୍ୟ ଗୁଡିକ ବିକାଶର ଉଚ୍ଚତା ରେ ପହଞ୍ଚିପାରିଛନ୍ତି। ରାଜ୍ୟ ସରକାର କେନ୍ଦ୍ର ସରକାରଙ୍କ ଅଧସ୍ତନ ହେବା ଅପେକ୍ଷା ଏକ ଶକ୍ତିଶାଳୀ ଓ ସ୍ଵାଧୀନ ରାଜ୍ୟ ସରକାର ରାଜ୍ୟର ବିକାଶରେ ବେଶୀ ସହାୟକ ହୋଇ ପାରିବେ। ତାମିଲନାଡୁ ଓ କେରଳରେ ଦୀର୍ଘ ବର୍ଷ ଧରି ଗୋଟିଏ ଇଞ୍ଜିନର ସରକାର ରହିଛି ଓ ସେ ସରକାର ଭଲ କାମ କରିଛି। ବରଂ ଏବେ ବିଜେପି ଶାସିତ ରାଜ୍ୟ ଗୁଡିକ ଅନେକାଂଶରେ ବିକାଶ ସୂଚକାଙ୍କରେ ପଛୁଆ ରହିଛନ୍ତି। ତେଣୁ ବିକାଶ ଲାଗି ଡବଲ ଇଞ୍ଜିନର ସରକାର କେବଳ ଏକ ଛଳନା।
ଲୋକେ ଠିକ ଜାଣନ୍ତି, କେଉଁ ଇଞ୍ଜିନ ଲଗାଇ ସେମାନେ ନିଜର ସରକାରକୁ ଚଳାଇବେ।
