ନୂଆଦିଲ୍ଲୀ: ଲୋକସଭା ନିର୍ବାଚନ ଅନୁଷ୍ଠିତ ହୋଇଯାଇଛି। ତୃତୀୟ ଥର ପାଇଁ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହୋଇଛନ୍ତି, ସରକାର ଗଠନ ହୋଇଛି, ମନ୍ତ୍ରଣାଳୟ ମଧ୍ୟ ବଣ୍ଟନ ହୋଇଛି। ହେଲେ ଲୋକସଭାର ବାଚସ୍ପତି କିଏ ହେବେ ତାହା ଉପରେ ସମସ୍ତଙ୍କ ନଜର ରହିଛି। ସଂସଦର ସ୍ୱତନ୍ତ୍ର ଅଧିବେଶନ ଜୁନ୍ ୨୪ ତାରିଖରୁ ଆରମ୍ଭ ହୋଇପାରେ ଏବଂ ଏହା ସହିତ ବାଚସ୍ପତି ନିର୍ବାଚନ ବିଷୟରେ ଆଲୋଚନା ମଧ୍ୟ ଆରମ୍ଭ ହୋଇଛି। ବାଚସ୍ପତି ପଦ ପାଇଁ ନିର୍ବାଚନ ଜୁନ୍ ୨୬ ତାରିଖରେ ହେବାର ସମ୍ଭାବନା ରହିଛି। ଏଥର ଭାରତୀୟ ଜନତା ପାର୍ଟି ସଂଖ୍ୟାଗରିଷ୍ଠତା ଅତିକ୍ରମ କରିପାରି ନାହିଁ, ତେଣୁ ସହଯୋଗୀମାନଙ୍କ ସହ ଏନଡିଏ ସରକାର ଗଠନ କରିଛି। ବିଜେପି ପରେ ଚନ୍ଦ୍ରବାବୁ ନାଇଡୁଙ୍କ ତେଲୁଗୁ ଦେଶମ ପାର୍ଟି (ଟିଡିପି) ଏବଂ ନୀତୀଶ କୁମାରଙ୍କ ଜନତା ଦଳ (ୟୁନାଇଟେଡ୍)ମେଣ୍ଟର ସର୍ବବୃହତ ଦଳ ଭାବେ ଉଭା ହୋଇଛନ୍ତି, ତେଣୁ ବାଚସ୍ପତି ପଦ ପାଇଁ ଦ୍ୱନ୍ଦ୍ୱ ବହୁତ ବୃଦ୍ଧି ପାଉଛି।
ମନ୍ତ୍ରଣାଳୟର ବିଭାଜନ ପୂର୍ବରୁ ମଧ୍ୟ ଟିଡିପି ବାଚସ୍ପତି ପଦ ପାଇଁ ଦାବି କରିସାରିଛି। ଏଥି ସହ ଜେଡିୟୁ ମଧ୍ୟ ଏହି ପଦବୀ ପାଇଁ ଦାବି କରୁଛି। ଏହି ସମୟରେ ବିଜେପି ବାଚସ୍ପତି ପଦବୀ ନିଜ ହାତରେ ରଖିବ ବୋଲି କୁହାଯାଉଛି ଏବଂ ଏହି ଏହି ଦୌଡରେ ଆନ୍ଧ୍ରପ୍ରଦେଶ ବିଜେପି ସଭାପତି ଡଗୁବତୀ ପୁରନ୍ଦେଶ୍ୱରୀଙ୍କ ନାମ ଆଗରେ ରହିଛି ବୋଲି ମଧ୍ୟ ଆଲୋଚନା ଚାଲିଛି। ଏଥର ପୁରନ୍ଦେଶ୍ୱରୀ ରାଜହମଣ୍ଡ୍ରି ଲୋକସଭା ଆସନରୁ ନିର୍ବାଚନରେ ବିଜୟୀ ହୋଇଛନ୍ତି। ସୂଚନାନୁସାରେ, ଦଳ ଅନୁଭବ କରୁଛି ଯେ, ଯଦି ପୁରନ୍ଦେଶ୍ୱରୀଙ୍କୁ ସ୍ପିକର କରାଯାଏ, ତେବେ ଟିଡିପି ଏବଂ ଚନ୍ଦ୍ରବାବୁ ନାଇଡୁ ଏହା ଉପରେ କୌଣସି ଆପତ୍ତି ଉଠାଇବେ ନାହିଁ। ଲୋକସଭା ନିର୍ବାଚନରେ ରାଜ୍ୟରେ ଟିଡିପି ଏବଂ ଜନସେନାଙ୍କ ସହ ବିଜେପିର ମେଣ୍ଟରେ ଡଗୁବତୀ ପୁରନ୍ଦେଶ୍ୱରୀ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ଏବଂ ଜନସାଧାରଣ ମଧ୍ୟ ଏହି ମେଣ୍ଟ ଉପରେ ଆସ୍ଥା ପ୍ରକଟ କରିଥିଲେ।
ଡଗୁବତୀ ପୁରନ୍ଦେଶ୍ୱରୀ କିଏ?:
ପୂର୍ବତନ ମୁଖ୍ୟମନ୍ତ୍ରୀ ଏନଟି ରାମା ରାଓଙ୍କ ଝିଅ ତଥା ଚନ୍ଦ୍ରବାବୁ ନାଇଡୁଙ୍କ ପତ୍ନୀ ନାରା ଭୁବନେଶ୍ୱରୀଙ୍କ ଭଉଣୀ ଡଗୁବତୀ ପୁରନ୍ଦେଶ୍ୱରୀ। ଆନ୍ଧ୍ରପ୍ରଦେଶ ବିଜେପି ମୁଖ୍ୟ ହେବା ବ୍ୟତୀତ ସେ ତିନିଥର ସାଂସଦ ରହିଛନ୍ତି। ୨୦୦୪ ଏବଂ ୨୦୦୯ ରେ ସେ କଂଗ୍ରେସ ଟିକେଟ୍ ରେ ବାପତଲା ଏବଂ ବିଶାଖାପାଟନମ୍ ରୁ ନିର୍ବାଚନ ଲଢିଥିଲେ। କଂଗ୍ରେସରେ ଯୋଗଦେବା ପୂର୍ବରୁ ସେ ଏବଂ ତାଙ୍କ ସ୍ୱାମୀ ଡଗୁବତୀ ଭେଙ୍କଟେଶ୍ଵରା ରାଓ ପ୍ରଥମେ ଚନ୍ଦ୍ରବାବୁ ନାଇଡୁଙ୍କ ସହ ଥିଲେ ଏବଂ ୧୯୯୬ ମସିହାରେ ଟିଡିପିରେ କ୍ଷମତା ବଦଳିବା ପରେ ଏନଟି ରାମା ରାଓଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇ ଦେଇଥିଲେ।
ଏହି ଘଟଣା ପରେ ଚନ୍ଦ୍ରବାବୁ ନାଇଡୁ ପୁରା ଟିଡିପିକୁ ତାଙ୍କ ଅଧୀନରେ ଆଣି ପୁରୁନ୍ଦେଶ୍ୱରୀ ଏବଂ ଭେଙ୍କଟେଶ୍ୱରାଙ୍କୁ ପୃଥକ କରିଥିଲେ। ଏହି ଘଟଣାରେ କ୍ରୋଧିତ ହୋଇ ପୁରନ୍ଦେଶ୍ୱରୀ ରାଜନୀତିରେ ପ୍ରବେଶ କରିବାକୁ ନିଷ୍ପତ୍ତି ନେଇଥିଲେ ଏବଂ କଂଗ୍ରେସରେ ଯୋଗ ଦେଇଥିଲେ। ସେ କଂଗ୍ରେସ ଟିକେଟରେ ଦୁଇଥର ସାଂସଦ ହୋଇଥିଲେ ଏବଂ ୟୁପିଏ ସରକାରରେ ମନମୋହନ ସିଂଙ୍କ କ୍ୟାବିନେଟରେ କେନ୍ଦ୍ର ରାଜ୍ୟ ମନ୍ତ୍ରୀ ଦାୟିତ୍ୱ ତୁଲାଇଥିଲେ। ତେବେ ଆନ୍ଧ୍ରପ୍ରଦେଶକୁ ବିଭାଜନ କରିବାକୁ କଂଗ୍ରେସ ସରକାରଙ୍କ ନିଷ୍ପତ୍ତିରେ ଅସନ୍ତୁଷ୍ଟ ହୋଇ ସେ ବିଜେପିରେ ଯୋଗ ଦେଇ ଦଳର ଜାତୀୟ ସାଧାରଣ ସମ୍ପାଦକ ହୋଇଥିଲେ। ପରେ ତାଙ୍କୁ ଦଳର ମହିଳା ଶାଖାର ଜାତୀୟ ସଭାପତି ମଧ୍ୟ କରାଯାଇଥିଲା।
ଯଦି ବିଜେପି ଡଗୁବତୀ ପୁରନ୍ଦେଶ୍ୱରୀଙ୍କୁ ବାଚସ୍ପତି କରେ, ତେବେ ଚନ୍ଦ୍ରବାବୁ ନାଇଡୁ ତାଙ୍କୁ ବିରୋଧ କରିବାର ସମ୍ଭାବନା କମ୍। ପ୍ରଥମତଃ ସେ ତାଙ୍କର ସମ୍ପର୍କୀୟ। ଯଦିଓ ସେ କେବେ ନାଇଡୁଙ୍କ ସମର୍ଥକ ହୋଇନାହାଁନ୍ତି, ସେ ଲୋକସଭା ଓ ବିଧାନସଭା ନିର୍ବାଚନରେ ବିଜେପି-ଟିଡିପି ମେଣ୍ଟରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ଏଥି ସହିତ ସେ ଏନଟି ରାମା ରାଓଙ୍କ ସରକାରକୁ ହଟାଇବା ସମୟରେ ଚନ୍ଦ୍ରବାବୁ ନାଇଡୁଙ୍କୁ ସମର୍ଥନ କରିଥିଲେ।