ଦେଶବ୍ୟାପୀ ବିଭିନ୍ନ ଗଣମାଧ୍ୟମ ପକ୍ଷରୁ କରାଯାଇଥିବା ଏକ୍ସିଟ୍ ପୋଲ୍ ରିପୋର୍ଟରେ ବିଜେପି ନେତୃତ୍ବାଧୀନ ଏନ୍ଡିଏ ମେଣ୍ଟକୁ ବହୁମତ ମିଳିବା ପରେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି କଂଗ୍ରେସ ମହା ସଚିବ ପ୍ରିୟଙ୍କା ଗାନ୍ଧୀ ଭଦ୍ରା। ଏହି ଏକ୍ସିଟ୍ ପୋଲ୍ ରିପୋର୍ଟରେ ଭ୍ରମିତ ନହୋଇ ନିର୍ବାଚନୀ ଫଳାଫଳକୁ ଅପେକ୍ଷା କରିବା ପାଇଁ ଦଳୀୟ କର୍ମୀଙ୍କୁ ନିବେଦନ କରିଛନ୍ତି ପୂର୍ବ ଉତ୍ତର ପ୍ରଦେଶ ଦାୟିତ୍ବରେ ରହିଥିବା ପ୍ରିୟଙ୍କା। ଏପରି ସର୍ବେକ୍ଷଣ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଏବଂ ଏହା ଦ୍ବାରା ପ୍ରଭାବିତ ନହେବା ପାଇଁ ପ୍ରିୟଙ୍କା କହିଛନ୍ତି। କର୍ମୀ ମାନେ ଏପରି ଗୁଜବରେ ପ୍ରଭାବିତ ନହୋଇ ନିଜ ବୁଥ୍ ପାଇଁ ନିଜର ଦାୟିତ୍ବ ସଠିକ୍ ଭାବରେ ନିର୍ବାହ କରନ୍ତୁ ବୋଲି ପ୍ରିୟଙ୍କା କହିଛନ୍ତି। ନିଜ ନିଜ ବୁଥର ଷ୍ଟ୍ରଙ୍ଗ ରୁମ୍ ଏବଂ ଭୋଟ ଗଣତି କେନ୍ଦ୍ରରେ ଆପଣ ମାନେ ଜାଗ୍ରତ ରହିବା ଫଳରେ ଇଭିଏମ୍ରେ କୌଣସି ପ୍ରକାରର ତ୍ରୁଟି ହୋଇ ପାରିବ ନାହିଁ ବୋଲି ନିଜ ବାର୍ତ୍ତାରେ କହିଛନ୍ତି ପ୍ରିୟଙ୍କା । ଉଲ୍ଲେଖଯୋଗ୍ୟ ଯେ, ସମସ୍ତ ସର୍ବକ୍ଷଣରେ ଏନ୍ଡିଏକୁ ୩୦୦ରୁ ଅଧିକ ଆସନ ପ୍ରଦାନ କରାଯାଇଥିବା ବେଳେ କେବଳ ଏବିପି ପକ୍ଷରୁ କରାଯାଇଥିବା ସର୍ବେକ୍ଷଣରେ ୨୮୨ ଆସନ ପ୍ରଦାନ କରାଯାଇଥିଲା।
