ନୂଆଦିଲ୍ଲୀ: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଜି ଦାବି କରିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ NITI ଆୟୋଗ ବବୈଠକରେ ତାଙ୍କ ମାଇକ୍ ମ୍ୟୁଟ୍ କରାଯାଇଛି। ଏହି ବୈଠକରେ ତାଙ୍କୁ କହିବାକୁ ଅନୁମତି ଦିଆଯାଇନଥିବା ସେ ଦାବି କରିଛନ୍ତି। ମୁଖ୍ୟମନ୍ତ୍ରୀ ବାନାର୍ଜୀଙ୍କ ଏହି ଦାବିର ସତ୍ୟତା ସାମ୍ନାକୁ ଆସିଛି।
ପ୍ରେସ୍ ସୂଚନା ବ୍ୟୁରୋ (PIB) ଫ୍ୟାକ୍ଟ ଚେକ୍ ଅନୁଯାୟୀ, ଏହି ଦାବିରେ କୌଣସି ସତ୍ୟତା ନାହିଁ ଏବଂ ଏହା ବିଭ୍ରାନ୍ତିକର। ତାଙ୍କ କଥା ସମୟ ସମାପ୍ତ ହୋଇଯାଇଥିଲା ଏବଂ ଜଣାଇବା ପାଇଁ ଘଣ୍ଟି ମଧ୍ୟ ବାଜିନଥିଲା। ବର୍ଣ୍ଣାନୁକ୍ରମିକ ଭାବରେ ମଧ୍ୟାହ୍ନ ଭୋଜନ ପରେ ମମତା ବାନାର୍ଜୀଙ୍କ ପର୍ଯ୍ୟାୟ ଆସିଥିଲା, କିନ୍ତୁ ପଶ୍ଚିମବଙ୍ଗ ସରକାରଙ୍କ ସରକାରୀ ଅନୁରୋଧ କ୍ରମେ ତାଙ୍କୁ ସପ୍ତମ ବକ୍ତା ଭାବରେ ଅନ୍ତର୍ଭୁକ୍ତ କରାଯାଇଥିଲା କାରଣ ତାଙ୍କୁ ଶୀଘ୍ର ଫେରିବାର ଥିଲା।
ମମତା ବାନାର୍ଜୀ କ’ଣ ଦାବି କରିଛନ୍ତି?:
ଦେଶର ରାଜଧାନୀ ଦିଲ୍ଲୀରେ ଆୟୋଜିତ NITI ଆୟୋଗ ବୈଠକରେ ମମତା ବାନାର୍ଜୀ ‘ରାଜନୈତିକ ଭେଦଭାବ’ ଅଭିଯୋଗ କରି କହିଛନ୍ତି ଯେ, ତାଙ୍କ ମାଇକ୍ରୋଫୋନ୍ ମ୍ୟୁଟ୍ ହୋଇଯାଇଥିଲା ଏବଂ ତାଙ୍କୁ ପାଞ୍ଚ ମିନିଟରୁ ଅଧିକ ସମୟ କହିବାକୁ ଅନୁମତି ଦିଆଯାଇ ନ ଥିବାବେଳେ ଅନ୍ୟ ମୁଖ୍ୟମନ୍ତ୍ରୀଙ୍କୁ ଅଧିକ ସମୟ ଦିଆଯାଇଥିଲା।
ସେ କହିଛନ୍ତି, “ମୁଁ ବୈଠକରୁ ବାହାରିଆସିଲି। ଚନ୍ଦ୍ରବାବୁ ନାଇଡୁଙ୍କୁ କହିବାକୁ ୨୦ ମିନିଟ୍ ସମୟ ଦିଆଯାଇଥିଲା, ଆସାମ, ଗୋଆ ଏବଂ ଛତିଶଗଡର ମୁଖ୍ୟମନ୍ତ୍ରୀମାନେ ୧୦-୧୨ ମିନିଟ୍ କଥା ହୋଇଥିଲେ। ମୋତେ ମାତ୍ର ପାଞ୍ଚ ମିନିଟ୍ ପରେ ମୋର ମାଇକ ବନ୍ଦ କରାଯାଇଥିଲା। ଆପଣମାନେ ମୋତେ କାହିଁକି ଅଟକାଇଲେ? କାହିଁକି ଭେଦଭାବ କରୁଛନ୍ତି? ମୁଁ ବୈଠକରେ ଭାଗ ନେଇଛି, ଏଥିପାଇଁ ଆପଣ ଖୁସି ହେବା କଥା। ଏହା ଛଡା ଆପଣଙ୍କ ସରକାରକୁ ଅଧିକ ମହତ୍ତ୍ଵ ଦେଉଛନ୍ତି। ଏହା କେବଳ ବଙ୍ଗଳା ନୁହେଁ, ସମସ୍ତ ଆଞ୍ଚଳିକ ଦଳକୁ ଏହା ଅପମାନ। ଏହା କରିବା ଅନୁଚିତ।
