ନୂଆଦିଲ୍ଲୀ: ଦଲ ଖାଲସାର ପ୍ରତିଷ୍ଠାତା ତଥା ୧୯୮୧ ମସିହାରେ ଜର୍ଣ୍ଣେଲ ସିଂ ଭିଣ୍ଡରୱାଲେଙ୍କ ଗିରଫଦାରୀକୁ ବିରୋଧ କରି ବିମାନ ଅପହରଣ ଅଭିଯୁକ୍ତ ଗଜିନ୍ଦର ସିଂଙ୍କର ପାକିସ୍ତାନରେ ଦେହାନ୍ତ ହୋଇଛି। ସୂଚନାନୁସାରେ, ଖାଲିସ୍ତାନ ସମର୍ଥକ ନେତା ଗଜିନ୍ଦର ସିଂ ହୃଦଘାତରେ ପୀଡିତ ଥିଲେ ଏବଂ ଦୀର୍ଘ ସମୟ ଧରି ଡାକ୍ତରଖାନାରେ ଭର୍ତ୍ତି ହୋଇଥିଲେ। ବିଚ୍ଛିନ୍ନତାବାଦୀମାନେ ତାଙ୍କ ମୃତ୍ୟୁକୁ ନିଶ୍ଚିତ କରିଛନ୍ତି।
ଭାରତୀୟ ସୁରକ୍ଷା ଏଜେନ୍ସି ୧୯୯୬ ମସିହାରୁ ଗଜିନ୍ଦର ସିଂଙ୍କୁ ଖୋଜିବାରେ ନିୟୋଜିତ ଥିଲେ, ଏହା ପରେ ସେ ଜର୍ମାନୀକୁ ପଳାଇଥିଲେ। ଭାରତ ଆପତ୍ତି ଉଠାଇବା ପରେ ତାଙ୍କୁ ଜର୍ମାନୀରେ ପ୍ରବେଶ କରିବାକୁ ବାରଣ କରାଯାଇଥିଲା। ଏହା ପରେ ସେ ପାକିସ୍ତାନ ଆସିଥିଲେ।
ଜଣେ ବିଚ୍ଛିନ୍ନତାବାଦୀ ୨୦୨୧ ମସିହାରେ ସୋସିଆଲ ମିଡିଆରେ ଗଜିନ୍ଦର ସିଂଙ୍କ ଫଟୋ ସେୟାର କରିଥିଲେ। ଏହି ପୋଷ୍ଟ ପରେ ହିଁ ପାକିସ୍ତାନରେ ତାଙ୍କର ଉପସ୍ଥିତି ନିଶ୍ଚିତ ହୋଇଥିଲା। ଏହି ପୋଷ୍ଟ ପରେ ଜଣାପଡିଥିଲା ଯେ, ସେ ପାକିସ୍ତାନର ପଞ୍ଜାବ ପ୍ରଦେଶର ହସଲ ଅବଦାଲର ଗୁରୁଦ୍ୱାର ପଞ୍ଜାବ ସାହିବରେ ଅଛନ୍ତି।
୨୦୨୦ ରେ ଗଜିନ୍ଦର ସିଂଙ୍କୁ ମୋଷ୍ଟ ୱାଣ୍ଟେଡ଼ ଆତଙ୍କବାଦୀ ତାଲିକାରେ ଅନ୍ତର୍ଭୁକ୍ତ ହୋଇଥିଲେ। ୨୯ ସେପ୍ଟେମ୍ବର ୧୯୮୧ ରେ ଇଣ୍ଡିଆନ୍ ଏୟାରଲାଇନ୍ସର ବିମାନକୁ ଅପହରଣ କରିଥିବା ବ୍ୟକ୍ତିଙ୍କ ମଧ୍ୟରୁ ଗଜିନ୍ଦର ଅନ୍ୟତମ। ଏହି ବିମାନ ଦିଲ୍ଲୀରୁ ଅମୃତସର ଯାଉଥିଲା। ଏହି ବିମାନ ଲାହୋରରେ ଅବତରଣ କରିବାକୁ ବାଧ୍ୟ ହୋଇଥିଲା। ଏହା ପରେ ଆତଙ୍କବାଦୀମାନେ ଜର୍ଣ୍ଣେଲ ସିଂ ଭିଣ୍ଡରୱାଲେ ଏବଂ ଅନ୍ୟ ଉଗ୍ରବାଦୀଙ୍କ ମୁକ୍ତି ସହିତ ଭାରତ ସରକାରଙ୍କ ଠାରୁ ୫ ଲକ୍ଷ ଆମେରିକୀୟ ଡଲାର ଦାବି କରିଥିଲେ।