ନୋଇଡା : ଦେଶରେ କରୋନା ସଂକ୍ରମଣ ମାମଲା ବେଶ୍ ଦ୍ରୁତ ଗତିରେ ବଢିଚାଲିଛି । ଭାରତରେ ଏପର୍ଯ୍ୟନ୍ତ ମୋଟ୍ 8,356 ସଂକ୍ରମିତ ହୋଇଥିବାବେଳେ 273 ଜଣଙ୍କର ମୃତ୍ୟୁ ହୋଇସାରିଛି। ଏପର୍ଯ୍ୟନ୍ତ ଏହି ରୋଗର କୌଣସି ନିଦାନ ମିଳିପାରିନାହିଁ । କରୋନା ବଞ୍ଚିବା ପାଇଁ ଏକମାତ୍ର ଉପାୟ ହେଉଛି ସୋସିଆଲ୍ ଡିଷ୍ଟାନ୍ସିଂ ବା ସାମାଜିକ ଦୂରତ୍ବ । ଦେଶରେ କରୋନା ସହ ମୁକାବିଲା କରିବା ପାଇଁ ସାରା ଦେଶରେ ଲକ୍ ଡାଉନ୍ ଜାରି କରାଯାଇଛି ।
ସରକାର ମଧ୍ୟ ଲୋକଙ୍କୁ ଘରେ ରହିବା ପାଇଁ ଅପିଲ୍ କରୁଛନ୍ତି । ଲକ୍ ଡାଉନ୍ ଓ ସାମାଜିକ ଦୂରତ୍ବକୁ ପାଳନ କରିବା ପାଇଁ ଅନୁରୋଧ କରୁଛନ୍ତି। କିନ୍ତୁ କିଛି ଲୋକେ ଏହି ଆଦେଶକୁ ମାନୁନଥିବାର ଦେଖାଯାଉଛି । ଉତ୍ତରପ୍ରେଦଶର ଗୌତମବୁଦ୍ଧ ନଗରରେ ଜଣେ ଲକ୍ ଡାଉନ୍ ନିୟମକୁ ଉଲ୍ଲଂଘନ କରିବା ବେଶ୍ ମହଙ୍ଗା ସାବ୍ୟସ୍ତ ହୋଇଛନ୍ତି । ଲକ୍ ଡାଉନ୍ ନିୟମ ଉଲ୍ଲଂଘନ କରିବା ପରେ ସେ ଏବେ କ୍ବାରେଣ୍ଟାଇନ୍ରେ ରହିଛନ୍ତି ।
ମିଳିଥିବା ସୂଚନା ଅନୁସାରେ ଗୌତମବୁଦ୍ଧ ନଗରରେ ରହୁଥିବା ଜଣେ ଯୁବକ ତାଙ୍କ ଗାର୍ଲଫ୍ରେଣ୍ଡଙ୍କୁ ଦେଖା କରିବାକୁ ଯାଇଥିଲେ। ତାଙ୍କ ଗାର୍ଲଫ୍ରେଣ୍ଡଙ୍କ ନିକଟରେ କରୋନା ପଜିଟିଭ୍ ଚିହ୍ନଟ ହେବା ପରେ ସମ୍ପୃକ୍ତ ଯୁବକ ଏବଂ ତାଙ୍କ ପରିବାରକୁ କ୍ବାରେଣ୍ଟାଇନ୍ରେ ରଖାଯାଇଛି। ଯୁବତୀ ଜଣକ କରୋନା ପଜିଟିଭ୍ ଚିହ୍ନଟ ହେବା ପରେ ତାଙ୍କ ସମ୍ପର୍କରେ ଯୁବକ ଜଣକ ଆସିଥିବାବେଳେ ଜଣାପଡିଥିଲା । ଏହାପରେ ଯୁବକ ଏବଂ ତାଙ୍କ ସମ୍ପୂର୍ଣ୍ଣ ପରିବାରକୁ ଆଇସୋଲେଟ୍ରେ ରଖାଯାଇଛି ।
ଲକ୍ ଡାଉନ୍ ସମୟରେ ଦୁହେଁ ଏହି ନିୟମକୁ ନ ମାନି ଦୁହେଁ ଦୁଇଜଣଙ୍କୁ ସାକ୍ଷାତ କରିଥିଲେ। ଏବେ ପୂରା ପରିବାର ଉପରେ କରୋନାର ବିପଦ ଘନେଇଛି । ସରକାରୀ ନିୟମକୁ ଭାଙ୍ଗିବା ତାଙ୍କ ପାଇଁ ବେଶ୍ ମହଙ୍ଗା ସାବ୍ୟସ୍ତ ହୋଇଛି ।
ସୂଚନାଯୋଗ୍ୟ ଉତ୍ତରପ୍ରଦେଶରେ କରୋନା ସଂକ୍ରମିତଙ୍କ ସଂଖ୍ୟା 452ରେ ପହଞ୍ଚିଥିବାବେଳେ ମୃତ୍ୟୁସଂଖ୍ୟା 5ରେ ପହଞ୍ଚିଛି । ୟୁପିରେ 15ଟିଜିଲ୍ଲାରେ ହଟସ୍ପଟ୍ ଚିହ୍ନିତ କରାଯାଇଛି । ଏହି ଅଞ୍ଚଳରେ 10,61,000 ଲୋକ ରୁହନ୍ତି । (ଏଜେନ୍ସି)