ନୂଆଦିଲ୍ଲୀ, ୧୨/୧୨: ହାଇଦ୍ରାବାଦଠାରେ ଭେଟେନାରୀ ଡାକ୍ତରାଣୀଙ୍କୁ ଗଣଦୁଷ୍କର୍ମ ଓ ହତ୍ୟା ମାମଲାରେ ହୋଇଥିବା ଏନକାଉଣ୍ଟର ଉପରେ ସୁପ୍ରିମକୋର୍ଟରେ ଶୁଣାଣୀ ଆରମ୍ଭ ହୋଇଛି। ଏନକାଉଣ୍ଟର କରିଥିବା ପୋଲିସଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବୀ କରାଯାଇଥିବା ମାମଲାରେ ପ୍ରଧାନ ବିଚାରପତି ଜଷ୍ଟିସ ଏସଏ ବୋବଡେ ଏହି ମାମଲାର ସ୍ୱତନ୍ତ୍ର ଯାଂଚ କରାଯିବା ଆବଶ୍ୟକତା ରହିଛି ବୋଲି କହିଛନ୍ତି। ଲୋକଙ୍କୁ ସତ୍ୟ ଜାଣିବାର ଅଧିକାର ରହିଛି। ଆମେ ଏହି ମାମଲାର ନିଷ୍ପକ୍ଷ ତଦନ୍ତ ଚାହୁଁଛୁ। ସୁପ୍ରିମ୍କୋର୍ଟ ଏହି ମାମଲା ପାଇଁ ତିନି ସଦ୍ୟସୀୟ ତଦନ୍ତ କମିଟି ଗଠନର ନିର୍ଦ୍ଦେଶ ଦେଇଛନ୍ତି। ପୂର୍ବତନ ସୁପ୍ରିମ୍କୋର୍ଟ ବିଚାରପତି ବିଏସ୍ ସିରପୁରକରଙ୍କ ନେତୃତ୍ବରେ ତିନିଜଣିଆ କମିଟି ଗଠନ କରିବାକୁ ନିଷ୍ପତ୍ତି ନିଆଯାଇଛି। ଏହି କମିଟିରେ ଅନ୍ୟତମ ସଦସ୍ୟ ଭାବେ ବମ୍ବେ ହାଇକୋର୍ଟର ଅବସରପ୍ରାପ୍ତ ବିଚାରପତି ରେଖା ବଲଦୋଟା ଓ ସିବିଆଇର ପୂର୍ବ ନିର୍ଦ୍ଦେଶକ କାର୍ତ୍ତିକେୟନ୍ ସାମିଲ୍ ରହିଛନ୍ତି। ଏହି କମିଟି ୬ ମାସ ମଧ୍ୟରେ ନିଜ ରିପୋର୍ଟ ଉପସ୍ଥାପନା କରିବେ। ଏହି ମାମଲାର ଅନ୍ତିମ ନିର୍ଦ୍ଦେଶ ନ ଆସିବା ପୂର୍ଯ୍ୟନ୍ତ ପ୍ରିଣ୍ଟ ଓ ଇଲୋକ୍ଟ୍ରୋନିକ ଗଣମାଧ୍ୟମ ଉପରେ ଏହି ମାମଲା ସମ୍ପର୍କିତ କୌଣସି ଖବର ପ୍ରସାର ଓ ପ୍ରଚାର ଉପରେ ପ୍ରତିବନ୍ଧକ ରହିଛି। (ଏଜେନ୍ସି)
