ନୂଆଦିଲ୍ଲୀ: ୱେବ୍ ସିରିଜ୍ ‘ଆଇସି 814: କାନ୍ଦହାର ହାଇଜାକ୍’ କୁ ନେଇ ଅନେକ ବିବାଦ ଦେଖାଦେଇଥିଲା। ଏହି ସିରିଜରେ ଆତଙ୍କବାଦୀଙ୍କ ପ୍ରକୃତ ପରିଚୟ ଲୁଚାଇଥିବା ଅଭିଯୋଗ ହୋଇଥିଲା। ଯାହା ପରେ ନେଟଫ୍ଲିକ୍ସ ‘ଆଇସି 814: କାନ୍ଦହାର ହାଇଜାକ୍’ ର ଘୋଷଣାରେ ଆତଙ୍କବାଦୀଙ୍କ ନାମ ବଦଳାଇଛି। ବର୍ତ୍ତମାନ ଏହି ସିରିଜ୍ ର ଅଭିନେତ୍ରୀ ଦିୟା ମିର୍ଜା ଏହା ଉପରେ ପ୍ରତିକ୍ରିୟା ପ୍ରକାଶ କରିଛନ୍ତି ଏବଂ କହିଛନ୍ତି ଯେ, ସବୁକିଛି ବାସ୍ତବ ଅଟେ।
ଏକ ସାକ୍ଷାତକାରରେ ଦିୟା ମିର୍ଜା କହିଛନ୍ତି ଯେ ‘ମୁଁ ଭାବୁଛି ଉଦ୍ଦେଶ୍ୟ ହେଉଛି ଗୁରୁତ୍ୱପୂର୍ଣ୍ଣ। ମୁଁ ଭାବୁନାହିଁ ଯେ ଶୋ’ର ଉଦ୍ଦେଶ୍ୟ କୌଣସି ବିବାଦ ସୃଷ୍ଟି କରିବା। ଏହା ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ଜିନିଷ ଏବଂ ଏହା ହେଉଛି ଆମର ସତ୍ୟ। ଦ୍ୱିତୀୟ କଥା ହେଉଛି ମୁଁ ଭାବୁଛି ଯାହା ଉପରେ ପ୍ରଶ୍ନ କରାଯାଉଛି, ତାହା ଯାଞ୍ଚଯୋଗ୍ୟ ଏବଂ ବାସ୍ତବ ଅଟେ। ଆପଣ ଏହା ଉପରେ କିପରି ଯୁକ୍ତି କରିବ? ‘
ପୁରା ବିବାଦ କ’ଣ ଥିଲା?:
‘ଆଇସି 814: କାନ୍ଦହାର ହାଇଜାକ୍’ରେ ଦିୟା ମିର୍ଜା ଇଣ୍ଡିଆ ହେଡଲାଇନ୍ସ ସମ୍ପାଦକ ଶାଲିନି ଭୂମିକାରେ ଅଭିନୟ କରିଛନ୍ତି। ଏହି ୱେବ୍ ସିରିଜ୍ 1999 ର ଘଟଣା ଉପରେ ଆଧାରିତ ଯେତେବେଳେ କାଠମାଣ୍ଡୁରୁ ବିମାନ ଉଡ଼ାଣ ପରେ ଇଣ୍ଡିଆନ୍ ଏୟାରଲାଇନ୍ସର ବିମାନ IC 814 କୁ ପାଞ୍ଚ ଜଣ ଲୋକ ଅପହରଣ କରି ନେଇଥିଲେ। ସେହି ସମୟରେ ବିମାନରେ ପାଇଲଟଙ୍କ ସହ 176 ଜଣ ଯାତ୍ରୀ ଏବଂ 15 ଜଣ କ୍ରୁ ସଦସ୍ୟ ଥିଲେ। ଏହି ଆତଙ୍କବାଦୀମାନେ ଇସଲାମିକ ସଂଗଠନର ଥିଲେ। କିନ୍ତୁ ୱେବ୍ ସିରିଜରେ ଏହି ଆତଙ୍କବାଦୀଙ୍କ ନାମ ‘ଭୋଲା’ ଏବଂ ‘ଶଙ୍କର’ ଭାବରେ ଦର୍ଶାଯାଇଥିଲା, ଯେଉଁଥିପାଇଁ ବିବାଦ ଦେଖାଦେଇଥିଲା। ଅବଶ୍ୟ, ପରେ ନିର୍ମାତାମାନେ ଏହି ନାମଗୁଡ଼ିକରେ ପରିବର୍ତ୍ତନ କରିଛନ୍ତି।
‘ଆଇସି 814: କାନ୍ଦହାର ହାଇଜାକ୍’ ଷ୍ଟାର୍ କାଷ୍ଟ୍
ଅନୁଭବ ସିହ୍ନାଙ୍କ ନିର୍ଦ୍ଦେଶିତ ୱେବ୍ ସିରିଜ୍ ‘ଆଇସି 814: କାନ୍ଦହାର ହାଇଜାକ୍’ 29 ଅଗଷ୍ଟ 2024 ରେ ନେଟଫ୍ଲିକ୍ସରେ ପ୍ରସାରିତ ହୋଇଥିଲା। ଏହି ଧାରାବାହିକରେ ବିଜୟ ବର୍ମା, ନସିରୁଦ୍ଦିନ ଶାହା, ପଙ୍କଜ କପୁର, ଦିୟା ମିର୍ଜା ଏବଂ ଅରବିନ୍ଦ ସ୍ୱାମୀ ମୁଖ୍ୟ ଭୂମିକାରେ ଅଛନ୍ତି।