ମୁମ୍ବାଇ: ଜୟପୁରରୁ ମୁମ୍ବାଇ ଅଭିମୁଖେ ଯାଉଥିବା ଇଣ୍ଡିଗୋ ବିମାନରେ ଏକ ଧମକପୂର୍ଣ୍ଣ ଚିଠି ମିଳିବା ପରେ ଉତ୍ତେଜନା ଦେଖାଦେଇଛି। ସତର୍କତାମୂଳକ ପଦକ୍ଷେପ ଭାବରେ ସୋମବାର ରାତି 8:43 ରେ ମୁମ୍ବାଇ ବିମାନବନ୍ଦରରେ ସମ୍ପୂର୍ଣ୍ଣ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଥିଲା ଏବଂ ବିମାନଟି ନିରାପଦରେ ଅବତରଣ କରିଥିଲା। ବିମାନଟି ରାତି ପ୍ରାୟ 8:50 ରେ ଅବତରଣ କରିଥିଲା ଏବଂ ବିମାନଟି ସୁରକ୍ଷା ପ୍ରୋଟୋକଲ ଅନୁଯାୟୀ ସୁରକ୍ଷିତ ସ୍ଥାନରେ ପାର୍କିଂ କରାଯାଇଛି। ବର୍ତ୍ତମାନ ବିମାନର ଅନୁସନ୍ଧାନ କରାଯାଉଛି। ବିମାନ ବନ୍ଦର କାର୍ଯ୍ୟ ଉପରେ କୌଣସି ପ୍ରଭାବ ପଡିନାହିଁ।
ଛତ୍ରପତି ଶିବାଜୀ ଅନ୍ତର୍ଜାତୀୟ ବିମାନବନ୍ଦର (CSMIA) ବିମାନ ସେବା ଏବଂ ସୁରକ୍ଷା ଏଜେନ୍ସି ସହିତ ସକ୍ରିୟ ଭାବରେ ସମନ୍ୱୟ ରକ୍ଷା କରୁଛି। CSMIA କହିଛି ଯେ ଯାତ୍ରୀ ଏବଂ କର୍ମଚାରୀଙ୍କ ସୁରକ୍ଷା ଆମର ସର୍ବୋଚ୍ଚ ପ୍ରାଥମିକତା।
ସୂତ୍ରରୁ ପ୍ରକାଶ ଯେ, ବିମାନରେ 225 ଜଣ ଯାତ୍ରୀ ଥିଲେ। ବିମାନର ଶୌଚାଳୟରେ ଏକ ବୋମା ଧମକ ନୋଟ୍ ମିଳିଥିଲା, ଯେକାରଣରୁ ବିମାନଟିକୁ ଜରୁରୀ ଅବତରଣ କରିବାକୁ ପଡ଼ିଲା।
