ପୁନେ : ଶିବସେନାର ବରିଷ୍ଠ ନେତା ସଞ୍ଜୟ ରାଉତ ଏକ ଆଶ୍ଚର୍ଯ୍ୟଜନକ ତଥ୍ୟ ଦେଇଛନ୍ତି । ବୁଧବାର ଏକ ସାକ୍ଷାତକାର ଅବସରରେ ରାଉତ କହିଛନ୍ତି ଇନ୍ଦିରା ଗାନ୍ଧୀ ଗ୍ୟାଙ୍ଗଷ୍ଟର କରିମ୍ ଲାଲାଙ୍କୁ ଭେଟୁଥିଲେ । ମୁମ୍ବାଇର ମଦ ମାଫିଆ ତଥା ଗ୍ୟାଙ୍ଗଷ୍ଟର କରିମ୍ ଲାଲାଙ୍କୁ ଭୂତପୂର୍ବ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଏକାଧିକ ଥର ଭେଟିଛନ୍ତି । ଦକ୍ଷିଣ ମୁମ୍ବାଇର ପ୍ୟୋଧିନୀରେ ଲାଲାଙ୍କୁ ଇନ୍ଦିରା ଭେଟୁଥିଲେ । ଲାଲା 1960ରୁ 1980 ପର୍ଯ୍ୟନ୍ତ ବେଆଇନ ମଦ କାରବାରରେ ସମ୍ପୃକ୍ତ ରହିଥିବା ବେଳେ 2002ରେ ତାର ଦେହାନ୍ତ ହୋଇଥିଲା । ଏହା ସହିତ ମୁମ୍ବାଇରେ ଗ୍ୟାଙ୍ଗଷ୍ଟାରଙ୍କ ପ୍ରାଦୁର୍ଭାବ ସମ୍ପର୍କରେ ବର୍ଣ୍ଣନା କରିଥିଲେ ରାଉତ । ପୂର୍ବରୁ ସାମ୍ବାଦିକ ରହିଥିବା ରାଉତ ଦାଉଦ୍ ଇବ୍ରାହିମ୍, ଛୋଟା ସକିଲ୍, ଶରଦ ସେଟ୍ଟୀ ଏବଂ ହାଜି ମସ୍ତାନ ସମ୍ପର୍କରେ କହିଥିଲେ । ହାଜି ମସ୍ତାନ ମହାରାଷ୍ଟ୍ର ସଚିବାଳୟକୁ ଆସୁଥିବା ସମୟରେ ସମ୍ପୂର୍ଣ୍ଣ ମନ୍ତ୍ରାଳୟ ତଳକୁ ଆସି ଦେଖୁଥିବା ସମ୍ପର୍କରେ ରାଉତ ମତ ଦେଇଥିଲେ । (ଏଜେନ୍ସୀ)
