ନୂଆଦିଲ୍ଲୀ: ଇରାନରେ ହମାସ ମୁଖ୍ୟ ଇସମାଇଲ ହାନିଆଙ୍କୁ ହତ୍ୟା କରାଯାଇଛି। ଏହି ଆକ୍ରମଣ ପାଇଁ ହମାସ ଇସ୍ରାଏଲକୁ ଦାୟୀ କରିଛି। ତେବେ ଏପର୍ଯ୍ୟନ୍ତ ଇସ୍ରାଏଲ ପକ୍ଷରୁ କୌଣସି ବିବୃତ୍ତି ଦିଆଯାଇ ନାହିଁ। ଇରାନର ରାଷ୍ଟ୍ରପତି ମାସୁଦ ପେଜେଶକିୟନଙ୍କ ଶପଥ ଗ୍ରହଣ ଉତ୍ସବରେ ଯୋଗଦେବା ପାଇଁ ଇସମାଇଲ ତେହେରାନରେ ପହଞ୍ଚିଥିଲେ।
ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (ଆଇଆରଜିସି) ଏକ ବିବୃତ୍ତିରେ ନିଶ୍ଚିତ କରିଛି ଯେ, ତେହେରାନରେ ହାନିୟା ରହୁଥିବା ବାସଭବନ ଉପରେ ଆକ୍ରମଣ କରାଯାଇଥିଲା। ଏହି ଆକ୍ରମଣରେ ହମାସର ମୁଖ୍ୟ ଇସମାଇଲ ହାନିୟା ଏବଂ ତାଙ୍କର ଜଣେ ରକ୍ଷୀଙ୍କର ମୃତ୍ୟୁ ଘଟିଛି।
ହାନିୟାଙ୍କ ମୃତ୍ୟୁ ବିଷୟରେ ହମାସ କ’ଣ କହିଲା?:
ଇସ୍ରାଏଲର ଏୟାର ଷ୍ଟ୍ରାଇକରେ ହମାସର ନେତା ହାନିୟାଙ୍କୁ ହତ୍ୟା କରାଯାଇଥିବା ହମାସ ଅଭିଯୋଗ କରିଛି। ଇରାନର ରିଭୋଲ୍ୟୁସନାରୀ ଗାର୍ଡ କର୍ପସ କହିଛି ଯେ, ଏହି ଆକ୍ରମଣର ଅନୁସନ୍ଧାନ ଜାରି ରହିଛି, ଏହା କିପରି ଘଟିଲା … ବର୍ତ୍ତମାନ କିଛି କୁହାଯାଇପାରିବ ନାହିଁ। କେବଳ ଏତିକି ନୁହେଁ, ହମାସ ଇସ୍ରାଏଲକୁ ମଧ୍ୟ ଧମକ ଦେଇଛି। ହମାସ କହିଛି ଯେ, ହାନିୟାଙ୍କ ମୃତ୍ୟୁ ବୃଥା ଯିବ ନାହିଁ। ଏହାର ପ୍ରତିଶୋଧ ନିଆଯିବ। ହମାସ ଏହି ଆକ୍ରମଣକୁ ଭୀରୁତାର କାର୍ଯ୍ୟ ବୋଲି କହିଛି।
ଗତ ବର୍ଷ ଅକ୍ଟୋବର ୭ ତାରିଖରେ ହମାସ ଇସ୍ରାଏଲ ଉପରେ ଆକ୍ରମଣ କରିଥିଲା। ଏହି ଆକ୍ରମଣରେ ୧୨୦୦ ଜଣଙ୍କର ମୃତ୍ୟୁ ହୋଇଥିଲା। ୨୫୦ ଲୋକଙ୍କୁ ବନ୍ଧକ ରଖାଯାଇଥିଲା। ସେବେଠାରୁ ଇସ୍ରାଏଲ ପାଲେଷ୍ଟାଇନର ହମାସ ଯୋଦ୍ଧା ଏବଂ ନେତାଙ୍କ ବିରୋଧରେ ଲଗାତାର ଆକ୍ରମଣ କରିଆସୁଛି। ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଅକ୍ଟୋବରରୁ ହୋଇଥିବା ଆକ୍ରମଣ ପରଠାରୁ ୩୯,୩୬୦ ରୁ ଅଧିକ ପାଲେଷ୍ଟାଇନୀୟଙ୍କର ମୃତ୍ୟୁ ଘଟିଛି ଏବଂ ୯୦,୯୦୦ ରୁ ଅଧିକ ଆହତ ହୋଇଛନ୍ତି।