ନୂଆଦିଲ୍ଲୀ: କେରଳର ଏକମାତ୍ର ବିଜେପି ସାଂସଦ ସୁରେଶ ଗୋପୀ ମୋଦୀ କ୍ୟାବିନେଟରୁ ଇସ୍ତଫା ନେଇଥିବା କଳ୍ପନା ଜଳ୍ପନାର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ମୁଁ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇ ନାହିଁ। ସନ୍ଧ୍ୟା ସୁଦ୍ଧା ମନ୍ତ୍ରୀଙ୍କ ପୋର୍ଟଫୋଲିଓ ସମ୍ବନ୍ଧରେ ଏକ ଫୋନ ଆସିବ। ଗୋଟିଏ କିମ୍ବା ଦୁଇ ଦିନ ପରେ ମୁଁ ଗଣମାଧ୍ୟମ ସହିତ କଥା ହେବି।
ବାସ୍ତବରେ ରବିବାର ଦିନ ରାଷ୍ଟ୍ରପତି ଭବନରେ ଆୟୋଜିତ ସମାରୋହରେ ସୁରେଶ ଗୋପୀ ମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। କିନ୍ତୁ ଶପଥ ନେବା ପରେ ସେ ଏକ ଟିଭି ଚ୍ୟାନେଲ ସହ ବାର୍ତ୍ତାଳାପରେ କହିଥିଲେ ଯେ, ‘ମୁଁ ସାଂସଦ ଭାବରେ କାମ କରିବାକୁ ଚାହୁଁଛି। ମୁଁ କ୍ୟାବିନେଟର ଏକ ଅଂଶ ହେବାକୁ ଚାହୁଁନଥିଲି। ମୁଁ କହିଥିଲି ଯେ, ମୁଁ ଏଥିରେ ଆଗ୍ରହୀ ନୁହେଁ। ମୁଁ ଶୀଘ୍ର ଏଥିରୁ ମୁକ୍ତ ହେବି।’
ସୁରେଶ ଗୋପୀ ପ୍ରଥମ ଥର ପାଇଁ କେରଳରେ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ସେ ସିପିଆଇର ସୁନୀଲ କୁମାରଙ୍କୁ ପ୍ରାୟ ୭୫ ହଜାର ଭୋଟରେ ପରାସ୍ତ କରି ତ୍ରିସୁର ଆସନରୁ ଜିତିଥିଲେ।