ନୂଆଦିଲ୍ଲୀ: ଭାରତ ନିର୍ବାଚନ ସହ ଜଡିତ ମାର୍କ ଜୁକରବର୍ଗଙ୍କ ମନ୍ତବ୍ୟକୁ ନେଇ ଫେସବୁକର ପ୍ୟାରେଣ୍ଟ୍ କମ୍ପାନୀ ମେଟା ଅସୁବିଧାରେ ପଡିଥିବା ଜଣାପଡିଛି। ବାସ୍ତବରେ, ମେଟା ପ୍ରତିଷ୍ଠାତା ମାର୍କ ଜୁକରବର୍ଗଙ୍କ ନିର୍ବାଚନ ସମ୍ପର୍କରେ ମନ୍ତବ୍ୟ ହେତୁ ଭାରତର ସଂସଦୀୟ ପ୍ୟାନେଲ କମ୍ପାନୀ ବିରୋଧରେ ସମନ ଜାରି କରିବାକୁ ନିଷ୍ପତ୍ତି ନେଇଛି। ଭୁଲ ତଥ୍ୟ ବିସ୍ତାର କରିବା କାରଣରୁ ମେଟାକୁ ସମନ କରାଯିବ ବୋଲି ବିଜେପି ସାଂସଦ ତଥା ଯୋଗାଯୋଗ ଏବଂ ସୂଚନା ପ୍ରଯୁକ୍ତିବିଦ୍ୟା ଗୃହ ପ୍ୟାନେଲର ଅଧ୍ୟକ୍ଷ ନିଶିକାନ୍ତ ଦୁବେ କହିଛନ୍ତି।
ନିଶିକାନ୍ତ ଦୁବେ X ରେ ଏକ ପୋଷ୍ଟରେ କହିଛନ୍ତି ଯେ, “ଗଣତାନ୍ତ୍ରିକ ଦେଶ ବିଷୟରେ ଭୁଲ ତଥ୍ୟ ଏହାର ଭାବମୂର୍ତ୍ତିକୁ କ୍ଷୁର୍ଣ୍ଣ କରୁଛି। ଏହି ଭୁଲ ପାଇଁ ସଂଗଠନ ସଂସଦ ଏବଂ ଏହାର ଲୋକଙ୍କୁ କ୍ଷମା ମାଗିବା ଉଚିତ।” ଏଥି ସହିତ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ ଟ୍ୱିଟରରେ ଦେଇଥିବା ବିବୃତ୍ତିରେ କହିଛନ୍ତି ଯେ, ୨୦୨୪ ସାଧାରଣ ନିର୍ବାଚନରେ ୬୪ କୋଟିରୁ ଅଧିକ ଭାରତୀୟ ଭୋଟର ଅଂଶଗ୍ରହଣ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ନ୍ୟାସନାଲ ଡେମୋକ୍ରାଟିକ୍ ଆଲାଏନ୍ସ (ଏନଡିଏ) ତୃତୀୟ ଥର କ୍ଷମତା ହାସଲ କଲା।
ମାର୍କ ଜୁକରବର୍ଗ ଏକ ପୋଡକାଷ୍ଟରେ ଦାବି କରିଛନ୍ତି ଯେ, ୨୦୨୪ ନିର୍ବାଚନରେ ଭାରତ ସମେତ ବର୍ତ୍ତମାନର ଅଧିକାଂଶ ସରକାର ପରାଜୟର ସମ୍ମୁଖୀନ ହୋଇଥିଲେ। ଏହା ପରେ ଭାରତ ସରକାର ଏହି ବିବୃତ୍ତିକୁ ବିରୋଧ କରିଥିଲେ ଏବଂ ଏହାକୁ ଭୁଲ ତଥ୍ୟ ବୋଲି କହିଥିଲେ।
ଭୁଲ ତଥ୍ୟକୁ ଏଡ଼ାଇବା ପାଇଁ ଉପଦେଶ:
ମେଟା ଏବଂ ଜୁକରବର୍ଗଙ୍କୁ ଲକ୍ଷ୍ୟ କରି ଶ୍ରୀ ବୈଷ୍ଣବ କହିଛନ୍ତି ଯେ, କୋଭିଡ -୧୯ ସମୟରେ ଭାରତ ୮୦ କୋଟି ଲୋକଙ୍କୁ ମାଗଣା ଖାଦ୍ୟ ଏବଂ ୨୨୦ କୋଟି ଟିକା ଯୋଗାଇ ଦେଇଛି। ତୃତୀୟ ଥର ପାଇଁ ପ୍ରଧାନମନ୍ତ୍ରୀ ମୋଦୀଙ୍କ ବିଜୟ ଜନସାଧାରଣଙ୍କ ବିଶ୍ୱାସ ଏବଂ ଉତ୍ତମ ଶାସନର ପ୍ରମାଣ। ତଥ୍ୟ ଏବଂ ବିଶ୍ୱସନୀୟତା ବଜାୟ ରଖିବା ପାଇଁ ସେ ମେଟା ଏବଂ ଜୁକରବର୍ଗଙ୍କୁ ନିବେଦନ କରିଛନ୍ତି।ପ୍ରକାଶ ଯେ, ସଂସଦୀୟ ପ୍ୟାନେଲ ଦ୍ୱାରା ମେଟା ବିରୋଧରେ ସମନ ଜାରି କରିବା ଦର୍ଶାଏ ଯେ ସରକାର ଏହି ପ୍ରସଙ୍ଗକୁ ଗମ୍ଭୀରତାର ସହ ନେଉଛନ୍ତି।
