ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଦେଶର ସମସ୍ତ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ ବୈଠକ କରିଛନ୍ତି । ଏହି ବୈଠକରେ କରୋନା ଜନିତ ଦେଶରେ ଜାରି ହୋଇଥିବା ଲକ୍ ଡାଉନ୍କୁ ନେଇ ଆଲୋଚନା କରାଯାଇଥିଲା । କରୋନା ସହ ମୁକାବିଲା କରିବା ପାଇଁ କେନ୍ଦ୍ରସରକାର ଦେଶରେ 21 ଦିନିଆ ଲକ୍ ଡାଉନ୍ର ଘୋଷଣା କରିଥିଲେ । ମାର୍ଚ୍ଚ 24 ତାରିଖରେ ଦେଶରେ 21 ଦିନିଆ ଲକ୍ ଡାଉନ୍ ଘୋଷଣା କରାଯାଇଥିଲା । ଏହି ଲକ୍ ଡାଉନ୍ର ଶେଷ ଦିନ ଏପ୍ରିଲ୍ 14 ତାରିଖ ରହିଥିବାବେଳେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ସମସ୍ତ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ ଭିଡିଓ କନ୍ଫରେନ୍ସିଂ ଜରିଆରେ ଆଲୋଚନା କରିଥିଲେ । ସେହିପରି କରୋନା ସହ ଲଢିବା ପାଇଁ ମଧ୍ୟ ସମସ୍ତ ମୁଖ୍ୟମନ୍ତ୍ରୀଙ୍କ ପ୍ରସ୍ତାବ ଉପରେ ଆଲୋଚନା କରାଯାଇଥିଲା। ଏହି ବୈଠକରେ ପ୍ରଧାନମନ୍ତ୍ରୀ ଦେଶରେ ଜାରି ରହିଥିବା ଏପରି ସଂକଟ ସମୟରେ ଉଭୟ କେନ୍ଦ୍ର ଓ ରାଜ୍ୟ କାନ୍ଧ ମିଳାଇ ଚାଲିବା ଉପରେ ଗୁରୁତ୍ବାରୋପ କରିଥିଲେ । କରୋନା ସମ୍ପର୍କରେ ଆଲୋଚନା ବେଳେ ପ୍ରଧାନମନ୍ତ୍ରୀ ସମସ୍ତ ମୁଖ୍ୟମନ୍ତ୍ରୀଙ୍କୁ ପରାମର୍ଶ ଲୋଡିଛନ୍ତି । ମୋତେ ପରାମର୍ଶ ଦିଅନ୍ତୁ ଓ ମୁଁ 24 ଘଣ୍ଟା ଉପଲବ୍ଧ ରହିବି ବୋଲି ପ୍ରଧାନମନ୍ତ୍ରୀ କହିଛନ୍ତି ।
ଏହି ବୈଠକରେ ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜରୀଓ୍ବାଲା ଅପ୍ରେଲ 30 ପର୍ଯ୍ୟନ୍ତ ଲକ୍ ଡାଉନ୍ ଅବଧିକୁ ଘୁଞ୍ଚାଇବା ନେଇ ପ୍ରସ୍ତାବ ରଖିଥିଲେ । କେଜରୀଓ୍ବାଲ କହିଛନ୍ତି ଯେ, ଲକ୍ ଡାଉନ୍ ଅବଧିକୁ ରାଷ୍ଟ୍ରୀୟ ସ୍ତରରେ ବୃଦ୍ଧି କରିବାର ଆବଶ୍ୟକତା ରହିଛି । ରାଜ୍ୟ ସ୍ତରରେ ଏହା କରାଗଲେ ସେତେ ଫଳପ୍ରଦ ହେବ ନାହିଁ ବୋଲି କେଜରୀଓ୍ବାଲ କହିଛନ୍ତି । ଏହି ବୈଠକରେ ପଞ୍ଜାବ ଓ ମହାରାଷ୍ଟ୍ର ଓ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମଧ୍ୟ ଦେଶରେ ଲକ୍ ଡାଉନ୍ ବଢାଇବା ନେଇ ପ୍ରସ୍ତାବ ରଖିଛନ୍ତି । ଏହି ବୈଠକ ପୂର୍ବରୁ ପ୍ରଥମ ରାଜ୍ୟ ଭାବେ ଓଡ଼ିଶା ଲକ୍ ଡାଉନ୍ ଅବଧିକୁ ଏପ୍ରିଲ୍ 30 ପର୍ଯ୍ୟନ୍ତ ବଢାଇବା ନେଇ ନିଷ୍ପତ୍ତି ନେଇଥିବାବେଳେ ଦ୍ବିତୀୟ ରାଜ୍ୟ ଭାବେ ପଞ୍ଜାବ ଏହାକୁ ମେ 1 ତାରିଖ ପର୍ଯ୍ୟନ୍ତ ବୃଦ୍ଧି କରିଛି ।
ପୂର୍ବରୁ ଲକ୍ ଡାଉନର ଅବଧି ଘୁଞ୍ଚାଇବା ନେଇ ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ ସଂକେତ ଦେଇଥିଲେ । ଏହି ବୈଠକରେ 80 ପ୍ରତିଶତ ରାଜନୈତିକ ନେତା ଲକ୍ ଡାଉନ୍ର ଅବଧିକୁ ବୃଦ୍ଧି କରିବା ନେଇ ପ୍ରସ୍ତାବ ରଖିଥିଲେ ।
ସୂଚନାଯୋଗ୍ୟ, ଦେଶରେ କରୋନା ସଂକ୍ରମିତଙ୍କ ସଂଖ୍ୟା 7000 ପାର୍ କରିଥିବାବେଳେ 239ଜଣ ଏହି ରୋଗରେ ମୃତ୍ୟୁବରଣ କରିସାରିଛନ୍ତି । ଆଜି ଏହି ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀମାନେ ମାସ୍କ ପିନ୍ଧିଥିବାର ନଜର ଆସିଥିଲେ । କରୋନା ସତର୍କତା ନେଇ ମାସ୍କ ପିନ୍ଧିବାକୁ ଓଡ଼ିଶାରେ ବାଧ୍ୟତା ମୂଳକ କରାଯାଇଛି । (ଏଜେନ୍ସି)