ନୂଆଦିଲ୍ଲୀ: ହରିୟାଣାର ମୋଷ୍ଟ ୱାଣ୍ଟେଡ୍ ନରେନ୍ଦ୍ର ସିଂଙ୍କ ପ୍ରତ୍ୟର୍ପଣ ମାମଲାରେ ସିବିଆଇ ବଡ଼ ସଫଳତା ହାସଲ କରିଛି। ୟୁଏଇରୁ ଭାରତକୁ ନରେନ୍ଦ୍ର ସିଂଙ୍କୁ ପ୍ରତ୍ୟର୍ପଣ କରିବାରେ ଅନୁସନ୍ଧାନକାରୀ ସଂସ୍ଥା ସଫଳ ହୋଇଛି। ସିବିଆଇର ଗ୍ଲୋବାଲ ଅପରେସନ୍ ସେଣ୍ଟର ଆବୁଧାବି ଇଣ୍ଟରପୋଲ ଏନସିବି ସହିତ ନିରନ୍ତର ଯୋଗାଯୋଗରେ ଥିଲା। ଅଭିଯୁକ୍ତ ନରେନ୍ଦ୍ର ସିଂଙ୍କ ବିରୋଧରେ ରେଡ କର୍ନର ନୋଟିସ ଜାରି ହୋଇସାରିଛି। ହରିୟାଣାର ଟୋହାନା ପୋଲିସ ଷ୍ଟେସନରେ ହତ୍ୟା, ଦଙ୍ଗା ଏବଂ ଉଦ୍ଦେଶ୍ୟମୂଳକ ଭାବେ କ୍ଷତି ଘଟାଇବା ଭଳି ସଙ୍ଗୀନ ଧାରାରେ ନରେନ୍ଦ୍ର ସିଂଙ୍କ ବିରୋଧରେ ମାମଲା ରୁଜୁ ହୋଇଥିଲା।
୨୦୦୯ ମସିହାରେ ହାଇକୋର୍ଟ ନରେନ୍ଦ୍ର ସିଂଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ୨୦୨୩ ମସିହାରେ, ଇଣ୍ଟରପୋଲ ଅଭିଯୁକ୍ତ ନରେନ୍ଦ୍ରଙ୍କ ବିରୋଧରେ ରେଡ କର୍ନର ନୋଟିସ ଜାରି କରିଥିଲା। ଏବେ ତାଙ୍କୁ ଭାରତକୁ ଅଣାଯାଇଛି। ପ୍ରକାଶ ଯେ, ଇଣ୍ଟରପୋଲ ସହଯୋଗରେ ସିବିଆଇ ସମୁଦାୟ ୨୯ ପଳାତକ ଅପରାଧୀଙ୍କୁ ୨୦୨୩ ମସିହାରେ ପ୍ରତ୍ୟର୍ପଣ କରି ଭାରତକୁ ପଠାଇ ଦେଇଛି ଏବଂ ପ୍ରାୟ ୧୦୦ ରେଡ କର୍ନର ନୋଟିସ ଜାରି କରିଛି।