ନୂଆଦିଲ୍ଲୀ, ଗତକାଲି ଭାରତ ରାଜନୈତିକ ଇତିହାସରେ ଆଉ ଏକ ବଡ ଘଟଣା ଯୋଡି ହୋଇଗଲା। ନକ୍ସଲଙ୍କ ଶଣ୍ଢୁଆସୀ ଆକ୍ରମଣରେ ସହିଦ ହେଲେ 22 ଯବାନ। କେତେ ଜଣ ମାଓବାଦୀ ମଲେ ତାହା ବଡ କଥା ନୁହେଁ, ହେଲେ ମାଓବାଦୀଙ୍କ ଯେଉଁ ହମଲା, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଏଥର ମାଓବାଦୀମାନେ ପୂର୍ବରୁ ଏକ ଚକ୍ରବ୍ୟୁହ ରଚନା କରି ସୁରକ୍ଷା କର୍ମୀଙ୍କୁ ଫସେଇ ଦେଇଛନ୍ତି। ଯାହା ପୂର୍ବରୁ କେବେ ଏପରି ଘଟଣା ଘଟି ନ ଥିଲା।
ପ୍ରକୃତ ଘଟଣା ହେଲା ମାଓବାଦୀମାନ ଯବାନଙ୍କୁ ହତ୍ୟା କରିବେ ବୋଲି ପୂର୍ବରୁ ଷଡଯନ୍ତ୍ର କରିଥିଲେ। ସେଥିପାଇଁ ସେମାନେ ନିଜେ ସୁକୁମା ଜଙ୍ଗଲରେ ଲୁଚି ରହିଛନ୍ତି ବୋଲି ଏକ ଖବର ଜାଣିଶୁଣି ପ୍ରଚାର କରିଦେଲେ। ସେହି ଖବର ଗୁଇନ୍ଦା ବିଭାଗ ପାଖରେ ପହଁଚିବା ପରେ ଏକ ବଡ ଅପରସେନର ଯୋଜନା ପ୍ରସ୍ତୁତ କରାଗଲା। ମାଓବାଦୀମାନେ ଜାଣିଶୁଣି ଖବର ଦେଇ ଯବାନମାନଙ୍କୁ ଅପେକ୍ଷା କରି ରହିଲେ। ସେଥିପାଇଁ ସେମାନେ ଏକ ଚକ୍ରବ୍ୟୁହ ରଚନା କଲେ। ସୁକୁମା ବିଜେପୁର ଭୌଗଳିକ ସ୍ଥିତି ଅନୁସାରେ ସେମାନେ ପାହାଡ ଉପରେ ଇଂରାଜୀ ଅକ୍ଷର ‘U’ ପରି ଜଗି ରହିଲେ।
ଏସବୁ ଖବର ଗୁଇନ୍ଦା କିମ୍ବା ଯବାନଙ୍କ ପାଖରେ ନ ଥିଲା। ଫଳରେ ପ୍ରାୟ ଦୁଇ ହଜାର ଯବାନ ସୁକୁମା ଜଙ୍ଗଲ ଭିତରକୁ ମାଓ ଅପରେସନ କରିବେ ବୋଲି ବାହାରି ପଡିଲେ। ଗୁଇନ୍ଦା ସୁଚନା ଅନୁସାରେ ସେମାନେ ଜଙ୍ଗଲ ଭିତରକୁ ପଶି ମାଓ ଆବାସ ସ୍ଥଳ ଆଡକୁ ଅଗ୍ରସର ହେବାକୁ ଲାଗିଲେ। ହେଲେ ସେଠାରେ ପହଞ୍ଚିବା ପୂର୍ବରୁ ଆଗରୁ ଜଗି ରହିଥିବା ମାଓବାଦୀମାନେ ପାହାଡ ଉପରୁ ଶଣ୍ଢୁଆଶୀ ଆକ୍ରମଣ ଆରମ୍ଭ କରିଦେଲେ। ଯବାନମାନେ ନିଜର ବନ୍ଧୁକ ଧରିବା ପାଇଁ ମଧ୍ୟ ସମୟ ପାଇ ପାରିଲେ ନାହିଁ। ତେବେ ସେଠାରେ ପ୍ରାୟ 4 ଘଣ୍ଟା ଧରି ଗୁଳି ବିନିମୟ ହୋଇଥିଲା।
ଏହି ଆକ୍ରମଣରେ ମାଓବାଦୀମାନେ ପାହାଡ ଉପରୁ ରକେଟ ଲଞ୍ଚର ଏବଂ ଏଲଏମଜି ବ୍ୟବହାର କରିଥିବାର ଜଣାପଡିଥିଲା। ଏହି ଆକ୍ରମଣରେ ପ୍ରାୟ 2 ଶହ ମାଓବାଦୀ ସାମିଲ ହୋଇଥିଲେ ବୋଲି ଜଣାପଡିଛି। ସେମାନେ ସମସ୍ତେ ପ୍ରାୟ ସେହି ନିକଟ ଗ୍ରାମର ବୋଲି କୁହାଯାଉଛି। ଏଥିସହିତ ଏହି ଆକ୍ରମଣରେ ମାଓବାଦୀଙ୍କ ତରଫରୁ ତାଙ୍କ ସମର୍ଥକମାନେ ମଧ୍ୟ ବାହାରେ ରହି ଖବର ଦେଉଥିଲେ ବୋଲି ପୋଲିସକୁ ସୂଚନା ମିଳିଛି।
ତେବେ ଏତେ ବଡ ଆକ୍ରମଣ ପଛରେ ଯେ ନେତୃତ୍ୟ ନେଉଥିଲେ ସେ ହେଉଛନ୍ତି ମାଓ କମାଣ୍ଡର ମାଡବି ହିଡିମା। 40 ବର୍ଷ ବୟସର ଏହି ମାଓନେତା ଛତିଶଗଡ ପୋଲିସ ପାଇଁ ମୋଷ୍ଟ ୱାଣ୍ଟେଡ ଭାବେ ରହିଛି।
