ନୂଆଦିଲ୍ଲୀ: ଆଜି ପଞ୍ଜାବ ପୋଲିସ କଂଗ୍ରେସ ବିଧାୟକ ସୁଖପାଲ ସିଂ ଖୈରାଙ୍କୁ ଗିରଫ କରିଛି। ପୋଲିସର ସୂଚନାନୁସାରେ ସୁଖପାଲ ସିଂ ଡ୍ରଗ୍ ଚୋରା ଚାଲାଣ କରୁଥିବା ଅଭିଯୋଗ ହୋଇଛି। ସୁଖପାଲଙ୍କୁ ଗିରଫ କରିବା ପାଇଁ ପଞ୍ଜାବ ପୋଲିସ ସକାଳେ ଏକ ସ୍ୱତନ୍ତ୍ର ଅପରେସନ ଆରମ୍ଭ କରିଥିଲା। ଏହି ଅପରେସନ୍ ଅଧୀନରେ ପଞ୍ଜାବ ପୋଲିସର ଏକ ଟିମ୍ ଖୈରାଙ୍କ ବାସଭବନରେ ପହଞ୍ଚିଥିଲା। NDPS ଅଧିନିୟମ ଅନୁଯାୟୀ ୨୦୧୫ ରେ ପଞ୍ଜୀକୃତ ହୋଇଥିବା ଏକ ପୁରୁଣା ମାମଲାରେ ପୋଲିସ ଫାଜିଲ୍କାର ଜାଲାଲାବାଦରେ ପହଞ୍ଚିଥିଲା।
ଆନ୍ତର୍ଜାତୀୟ ଗ୍ୟାଙ୍ଗକୁ ସମର୍ଥନ କରୁଥିବା ଅଭିଯୋଗ ହୋଇଛି:
ସୁଖପାଲ ସିଂଙ୍କ ବିରୋଧରେ ପ୍ରାଥମିକ ଅଭିଯୋଗ ହେଉଛି ଏକ ଅନ୍ତର୍ଜାତୀୟ ଚୋରା ଚାଲାଣକାରୀଙ୍କୁ ସମର୍ଥନ କରିବା, ରଖିବା ଏବଂ ଡ୍ରଗ୍ ଚୋରା ଚାଲାଣକାରୀଙ୍କଠାରୁ ଆର୍ଥିକ ଲାଭ ଦେବା ସାମିଲ। ଅନୁସନ୍ଧାନକାରୀ ସଂସ୍ଥାର ଚାର୍ଜସିଟ୍ ଅନୁଯାୟୀ, ସୁଖପାଲ ସିଂ ଯାହା ଟଙ୍କା ନେଇଥିଲେ ତାହା ସମ୍ପତ୍ତି କିଣିବାରେ ବ୍ୟବହୃତ ହୋଇଥିବା ଅଭିଯୋଗ ହୋଇଥିଲା। ଅନୁସନ୍ଧାନରୁ ଜଣାପଡିଛି ଯେ ୨୦୧୪ରୁ ୨୦୨୦ ମଧ୍ୟରେ ସୁଖପାଲ ସିଂ ନିଜ ତଥା ତାଙ୍କ ପରିବାର ସଦସ୍ୟଙ୍କ ପାଇଁ ୬.୫ କୋଟିରୁ ଅଧିକ ଖର୍ଚ୍ଚ କରିଥିବା ଅଭିଯୋଗ ହୋଇଛି, ଯାହା ତାଙ୍କ ଘୋଷିତ ଆୟଠାରୁ ଅଧିକ ଥିଲା।
ଗିରଫ ପୂର୍ବରୁ କଂଗ୍ରେସ ନେତା ଫେସବୁକ୍ ଲାଇଭ୍ କରୁଥିଲେ:
ମିଳିଥିବା ସୂଚନା ଅନୁଯାୟୀ, ପୋଲିସ ତାଙ୍କ ଘରେ ପହଞ୍ଚିବା ପରେ କଂଗ୍ରେସ ନେତା ଫେସବୁକ୍ ଲାଇଭ୍ କରୁଥିଲେ। ଭିଡିଓରେ ସୁଖପାଲ ସିଂ ପୋଲିସ ସହ ଯୁକ୍ତିତର୍କ କରୁଥିବା ଦେଖିବାକୁ ମିଳିଛି। ଭିଡିଓରେ ଜଣେ ପୋଲିସ ଅଧିକାରୀ ଡିଏସପି ଅଛୁରୁ ରାମ ଶର୍ମା ସୁଖପାଲ ସିଂଙ୍କୁ କହିଛନ୍ତି ଯେ, ପୁରୁଣା ଡ୍ରଗ୍ ଚୋରା ଚାଲାଣ ମାମଲାରେ ଏକ ଏସଆଇଟି ଗଠନ କରାଯାଇଛି। ଏହି ଭିଡିଓରେ ସୁଖପାଲ ସିଂ ପଞ୍ଜାବ ସରକାରଙ୍କ ବିରୋଧରେ ସ୍ଲୋଗାନ ଦେଇଥିବା ଶୁଣିବାକୁ ମିଳୁଛି। ଏହା ପରେ ପୋଲିସ ତାଙ୍କୁ ଅଟକ ରଖିଥିବାର ନଜର ଆସିଛି।
ସୂଚନାଯୋଗ୍ୟ ଯେ, ସୁଖପାଲ ସିଂ ଗିରଫ ହେବା ପରେ AAP ଏବଂ କଂଗ୍ରେସ ମଧ୍ୟରେ ସମ୍ପର୍କ ଖରାପ ହେବାର ସମ୍ଭାବନା ରହିଛି। ଏହା ‘ଇଣ୍ଡିଆ’ ସହଯୋଗୀ ଦଳ ଉପରେ ମଧ୍ୟ ପ୍ରଭାବ ପକାଇପାରେ। ପ୍ରକାଶ ଯେ ‘ଇଣ୍ଡିଆ’ ମେଣ୍ଟରେ କଂଗ୍ରେସ ଏବଂ ଆମ୍ ଆଦମୀ ପାର୍ଟି ଗୁରୁତ୍ୱପୂର୍ଣ୍ଣ ଦଳ ଅଟନ୍ତି। ପଞ୍ଜାବରେ AAP ସହିତ କୌଣସି ପ୍ରକାରର ମେଣ୍ଟ କିମ୍ବା ଆସନ ବଣ୍ଟନ ବ୍ୟବସ୍ଥାକୁ କଂଗ୍ରେସର ରାଜ୍ୟ ୟୁନିଟ୍ ବିରୋଧ କରିଛି।