ସୀତାରାମ ଅଗ୍ରୱାଲ
ଚିଲିକା: ଆଗାମୀ ବିଧାନସଭା ନିର୍ବାଚନରେ ପ୍ରତିଦ୍ବନ୍ଦିତା କରିବେ ପାରିକୁଦ ରାଜା ସନ୍ତୋଷ କୁମାର ଦେବ। ଦୋଳ ଉତ୍ସବ ଉପଲକ୍ଷେ ରାଜପ୍ରାସାଦରେ ଆୟୋଜିତ କାର୍ଯ୍ୟକ୍ରମରେ ସେ ନିଜ ଆଡୁ ଏହି ଘୋଷଣା କରିଛନ୍ତି। ସେ କହିଛନ୍ତି ଯେ, ଯଦି ବିଜେଡି ଦଳ ଚାହିଁବ, ଯଦି ନବୀନବାବୁ ଚାହିଁବେ ତେବେ ମୁଁ ଲଢେଇ କରିବି। ନବୀନବାବୁଙ୍କ ଯେଉଁ ଶହେ ବର୍ଷର ସ୍ବପ୍ନ ରହିଛି ତାହାକୁ କେବଳ ଆମେ ଯୁବକମାନେ କରିବୁ ବୋଲି ରାଜା କହିଛନ୍ତି।
ତାଙ୍କ ରାଜ ପ୍ରାସାଦରେ ଥିବା ସମର୍ଥକମାନେ ମଧ୍ୟ ଏହାକୁ ନେଇ ବେଶ ଉତ୍ସାହିତ ହୋଇପଡିଛନ୍ତି। ରାଜା ସାହେବ ଚିଲିକାର ମତ୍ସ୍ୟଜୀବୀଙ୍କୁ ବହୁତ ସାହାଯ୍ୟ କରୁଛନ୍ତି। ସେମାନଙ୍କ ସମର୍ଥନ ରହିବ ବୋଲି ସେମାନେ ଦାବୀ କରିଛନ୍ତି।
ବର୍ତ୍ତମାନ ରାଜା ସାହେବ ପାରିକୁଦରେ ଥିବା ବିରାଟ ରାଜପ୍ରସାଦ ଛାଡି ବର୍ତ୍ତମାନ ବାଲୁଗାଁରେ ରହୁଛନ୍ତି। ତେବେ ଚିଲିକା ନିର୍ବାଚନ ମଣ୍ଡଳୀର ବର୍ତ୍ତମାନ ଯାହା ସ୍ଥିତି ରହିଛି ସେଥିରେ ରାଜା ସାହେବ କିପରି ମୁକାବିଲା କରିବେ ତାହାକୁ ନେଇ ସାଧାରଣରେ ସନ୍ଦେହ ପ୍ରକାଶ ପାଇଛି।