Tag: Paris Olympics 2024

ନୂଆଦିଲ୍ଲୀ: ପ୍ୟାରିସ୍ ଅଲିମ୍ପିକ୍ସ ୨୦୨୪ ରେ ଇତିହାସରେ ପ୍ରଥମ ଇଣ୍ଡିଆ ହାଉସର ଉଦଘାଟନୀ ଉତ୍ସବରେ ରିଲାଏନ୍ସ ଫାଉଣ୍ଡେସନର ପ୍ରତିଷ୍ଠାତା ଅଧ୍ୟକ୍ଷ ନୀତା ଅମ୍ବାନୀ ଘୋଷଣା କରିଛନ୍ତି ଯେ “ଭାରତରେ ଅଲିମ୍ପିକ୍ସ ଅନୁଷ୍ଠିତ ହେବାର ଦିନ ବହୁତ ଦୂର ନୁହେଁ। ଏହା ହେଉଛି ସମସ୍ତ ଭାରତୀୟଙ୍କ ବର୍ତ୍ତମାନର ସ୍ୱପ୍ନ”। ନିତା ଅମ୍ବାନୀଙ୍କ ଏହି କଥା ଫ୍ରାନ୍ସର ସ୍ଥାନୀୟ ଗଣମାଧ୍ୟମ ସମେତ ସାରା ବିଶ୍ୱର ଗଣମାଧ୍ୟମରେ ସ୍ଥାନପାଇଛି। ଏହା ବିଦିତ ଯେ ଭାରତର ବିଶିଷ୍ଟ ଶିଳ୍ପପତି ମୁକେଶ ଅମ୍ବାନୀଙ୍କ ପତ୍ନୀ ନୀତା ଅମ୍ବାନୀ କର୍ପୋରେଟ୍ ଜଗତ ସହିତ ଜଡିତ, କିନ୍ତୁ ଖୁବ୍ କମ୍ ଲୋକ ଜାଣିଥିବେ ଯେ ନୀତା ଅମ୍ବାନୀ ମଧ୍ୟ ଭାରତର କ୍ରୀଡ଼ା ଶକ୍ତିର ପ୍ରତିନିଧିତ୍ୱ କରନ୍ତି। ସେ ଆଇଓସି ଅର୍ଥାତ୍ ଆନ୍ତର୍ଜାତୀୟ ଅଲିମ୍ପିକ୍ କମିଟିର ଜଣେ ସଦସ୍ୟା ଏବଂ ତାଙ୍କର ପଦକ୍ଷେପ ତଥା ଆର୍ଥିକ ସହାୟତା ହେତୁ ଇଣ୍ଡିଆ ହାଉସ୍ ଆଜି ପ୍ୟାରିସର ପୋର୍ଟ ଡି ଲା ଭିଲେଟରେ ଗର୍ବର ସହିତ ଠିଆ ହୋଇଛି।

ଆନ୍ତର୍ଜାତୀୟ ସ୍ତରରେ ଭାରତର ବଢୁଥିବା ପ୍ରଭାବ ମଧ୍ୟରେ ଦେଶ ଅଲିମ୍ପିକ୍ସ ବିଷୟରେ ସ୍ୱପ୍ନ ଦେଖିଛି କିନ୍ତୁ ଏହି ସ୍ୱପ୍ନ କିପରି ପୂରଣ ହେବ। ଏଥିପାଇଁ ଚାରୋଟି ଦିଗରେ କାର୍ଯ୍ୟ କରିବାକୁ ପଡିବ, ଦେଶର ଭିତ୍ତିଭୂମି ବିକାଶ, ସୁରକ୍ଷାର ଗ୍ୟାରେଣ୍ଟି, ଆନ୍ତର୍ଜାତୀୟ କ୍ରୀଡା ଫେଡେରେଶନରେ ଅଂଶଗ୍ରହଣ ଏବଂ କ୍ରୀଡା ଭିତ୍ତିଭୂମିର ଉନ୍ନତି। ସରକାର ପ୍ରଥମ ଦୁଇଟି କାର୍ଯ୍ୟର ଗ୍ୟାରେଣ୍ଟି ଦେବେ ଯଥା ଭିତ୍ତିଭୂମି ବିକାଶ ଏବଂ ସୁରକ୍ଷା। କିନ୍ତୁ ଆନ୍ତର୍ଜାତୀୟ କ୍ରୀଡା ଫେଡେରେଶନରେ ଅଂଶଗ୍ରହଣ ଏବଂ କ୍ରୀଡା ଭିତ୍ତିଭୂମିରେ ଉନ୍ନତି ପାଇଁ ସରକାରଙ୍କୁ କର୍ପୋରେଟ୍ ଜଗତ ସହିତ ମିଳିତ ଭାବେ କାର୍ଯ୍ୟ କରିବାକୁ ପଡିବ। ଏହି ଦୁଇଟି ଦିଗରେ ତାଙ୍କ ଦ୍ୱାରା କରାଯାଇଥିବା ଉଲ୍ଲେଖନୀୟ କାର‌୍ୟ୍ୟ ହେତୁ ନୀତା ଅମ୍ବାନୀଙ୍କ ଗୁରୁତ୍ୱ ଆହୁରି ଅଧିକ ହୋଇଛି।

ନୀତା ଅମ୍ବାନୀ ୨୦୧୬ ଠାରୁ ଆଇଓସିର ସଦସ୍ୟା ରହିଆସିଛନ୍ତି। କିଛି ଦିନ ପୂର୍ବରୁ ସେ ଆଠ ବର୍ଷ ପାଇଁ ପୁନଃ ନିର୍ବାଚିତ ହୋଇଛନ୍ତି। ୨୦୨୩ ମସିହାରେ ଭାରତରେ ଆଇଓସି ବୈଠକ ୪୦ ବର୍ଷ ପରେ ମୁମ୍ବାଇର ‘ଜିଓ ୱାର୍ଲ୍ଡ ସେଣ୍ଟର୍’ରେ ଅନୁଷ୍ଠିତ ହୋଇଥିଲା। ଏହାକୁ ଭାରତକୁ ଆଣିବାର ଦାୟିତ୍ୱ ଭାରତୀୟ ଅଲିମ୍ପିକ୍ ଆସୋସିଏସନ୍ ଏବଂ କ୍ରୀଡା ମନ୍ତ୍ରଣାଳୟ ସହିତ ନୀତା ଅମ୍ବାନୀଙ୍କ ଦ୍ୱାରା ନିଆଯାଇଥିଲା। ଯଦି ଭାରତ ୨୦୩୬ ଅଲିମ୍ପିକ୍ସ ଆୟୋଜନ କରିବାକୁ ଦାବି ଉପସ୍ଥାପନ କରେ, ତେବେ ନୀତା ଅମ୍ବାନୀଙ୍କ ଦକ୍ଷତା ବେଶ ଉପଯୋଗୀ ହେବ। ଭାରତକୁ ଅଲିମ୍ପିକ୍ସ ଆଣିବାକୁ ଓକିଲାତି କରିବାରେ ନୀତା ଅମ୍ବାନୀ ଏକା ନୁହଁନ୍ତି। ସମଗ୍ର କର୍ପୋରେଟ୍ ଜଗତ ଅଲିମ୍ପିକ୍ସକୁ ଭାରତ ଆଣିବା ସପକ୍ଷରେ ଥିବା ଜଣାପଡିଛି। ଜେଏସଡବ୍ଲୁ ହେଉ କିମ୍ବା ଟାଟା ଗ୍ରୁପ୍ ହେଉ କିମ୍ବା ଭାରତୀୟ ସରକାରୀ କମ୍ପାନୀ, ସମସ୍ତେ କ୍ରୀଡା ବିସ୍ତାର ଉପରେ ଗୁରୁତ୍ୱ ଦେଉଛନ୍ତି। ଭାରତର ସର୍ବବୃହତ କମ୍ପାନୀ ରିଲାଏନ୍ସ ସହିତ ଜଡିତ ହୋଇ ନୀତାଙ୍କର ମଧ୍ୟ ଭାରତୀୟ ଅଲିମ୍ପିକ୍ ସ୍ୱପ୍ନ ପଛରେ ସମଗ୍ର କର୍ପୋରେଟ୍ ଜଗତକୁ ଏକତ୍ରିତ କରିବାର ଶକ୍ତି ରହିଛି।

ଖେଳାଳିଙ୍କ ତାଲିମ ପାଇଁ ନୀତା ଅମ୍ବାନୀଙ୍କ ରିଲାଏନ୍ସ ଫାଉଣ୍ଡେସନ୍ ମଧ୍ୟ ବ୍ୟାପକ ଖର୍ଚ୍ଚ କରୁଛି। ଅଲିମ୍ପିଆନ୍ ଜ୍ୟୋତି ୟାରାଜୀଙ୍କ ପରି ଅନେକ ଖେଳାଳି ରିଲାଏନ୍ସ ଫାଉଣ୍ଡେସନ୍ ଦ୍ୱାରା ପରିଚାଳିତ ଉଚ୍ଚ ପ୍ରଦର୍ଶନ କେନ୍ଦ୍ରରେ ତାଲିମ ନେଉଛନ୍ତି । ଏହି ଫାଉଣ୍ଡେସନ ସାରା ଦେଶରେ ୨ କୋଟି ୨୦ ଲକ୍ଷରୁ ଅଧିକ ଯୁବ ଭାରତୀୟଙ୍କ ଶିକ୍ଷା ଏବଂ କ୍ରୀଡା ପ୍ରଶିକ୍ଷଣର ଦାୟିତ୍ୱ ନିର୍ବାହ କରୁଛି । ନୀତା ଅମ୍ବାନୀ କୁହନ୍ତି, “ଆମେ ଏକ ବହୁ-କ୍ରୀଡ଼ା ରାଷ୍ଟ୍ରରେ ପରିଣତ ହେଉଛୁ। ଯଦିଓ, କ୍ରିକେଟ୍ ଏକ ଧର୍ମ ହୋଇ ରହିଛି।” ନୀତା ଅମ୍ବାନୀଙ୍କ ପ୍ରିମିୟର ଲିଗ କ୍ଳବ ମୁମ୍ବାଇ ଇଣ୍ଡିଆନ୍ସର ମାଲିକାନା ସମେତ ରିଲାଏନ୍ସ ସମୂହର ସାରା ବିଶ୍ୱରେ ପାଞ୍ଚଟି କ୍ଲବର ମାଲିକାନା ରହିଛି। ଅଲିମ୍ପିକ୍ସରେ ଭାରତୀୟ ଖେଳାଳିଙ୍କ ଉତ୍ସାହ ବୃଦ୍ଧି ପାଇଁ ସେ ପୁରା ସମୟ ପ୍ୟାରିସରେ ରହିବେ । ଏହିସବୁର ପ୍ରଭାବ ଆଗାମୀ କିଛି ବର୍ଷରେ ଦୃଶ୍ୟମାନ ହେବ।

ଭାରତକୁ ଅଲିମ୍ପିକ୍ସ ଆଣିବା ପାଇଁ ସରକାର ମଧ୍ୟ ସମସ୍ତ ଉଦ୍ୟମ କରୁଛନ୍ତି। ଯଦିଓ ଏହା ଏପର୍ଯ୍ୟନ୍ତ ଆନୁଷ୍ଠାନିକ ହୋଇନାହିଁ, ତେବେ ପ୍ରଧାନମନ୍ତ୍ରୀ ମୋଦୀ ୨୦୩୬ ଅଲିମ୍ପିକ୍ସକୁ ଭାରତକୁ ଆଣିବା ବିଷୟରେ ଅନେକ ମଞ୍ଚରେ କହିଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ କାର୍ଯ୍ୟ ଯୋଗୁଁ ଗତ ଚାରି-ପାଞ୍ଚ ବର୍ଷ ମଧ୍ୟରେ ଦେଶର ଭିତ୍ତିଭୂମିରେ ବହୁତ ଉନ୍ନତି ହୋଇଛି ବୋଲି ନୀତା ଅମ୍ବାନୀ କହିଛନ୍ତି। ଭାରତରେ ବର୍ତ୍ତମାନ ଗାଁରୁ ସହରକୁ ପହଞ୍ଚିବା ସହଜ ହୋଇଛି ଏବଂ କ୍ରୀଡା ସୁବିଧା ବହୁଗୁଣିତ ହୋଇଛି।