ଲକ୍ଷ୍ନୌ, 28/12 : ଆନ୍ଦୋଳନ ରତ ଭିଡକୁ ପାକିସ୍ତାନ ପଳେଇଯାଅ ବୋଲି ସମ୍ବୋଧନ କରି ଅଡୁଆରେ ପଡିଛନ୍ତି ମିରଟ ଏସ୍ପି ଅଖିଳେଶ ନାରାୟଣ ସିଂ । ନାଗରିକତ୍ବ ସଂଶୋଧନ ଆଇନକୁ ନେଇ ବିଭିନ୍ନ ସ୍ଥାନରେ ହିଂସା ଦେଖା ଦେଇଥିବା ବେଳେ ମିରଟର ଏହି ଘଟଣା ସମ୍ମୁଖକୁ ଆସିଛି । ଏହି ଘଟଣାକୁ ନେଇ ଏସ୍ପିଙ୍କୁ ବିଭିନ୍ନ ମହଲରୁ ସମାଲୋଚନା କରାଯାଇଥିଲା । ଘଟଣାକୁ ନେଇ ଏସ୍ପି ଶନିବାର ପ୍ରତିକ୍ରିୟା ରଖିଛନ୍ତି । କିଛି ଯୁବକ ପାକିସ୍ତାନ ଜିନ୍ଦାବାଦ ନାରା ଦେଉଥିବାରୁ ସେ ଏପରି କହିବାକୁ ବାଧ୍ୟ ହୋଇଥିଲେ ବୋଲି ମିରଟ ଏସ୍ପି ପ୍ରକାଶ କରିଛନ୍ତି । ଏହା ସହିତ ଆଇଜି ଆଲୋକ ସିଂ ମଧ୍ୟ ମିରଟ୍ ଏସ୍ପିଙ୍କୁ ସମର୍ଥନ କରିଛନ୍ତି । 18ରୁ 25 ବର୍ଷ ବୟସ୍କ ଯୁବକ ମାନେ ପାକିସ୍ତାନ ସପକ୍ଷବାଦୀ ନାରା ଦେଉଥିବା ବେଳେ ପୋଲିସ୍ର ପ୍ରତିକ୍ରିୟା ସଠିକ୍ ରହିଛି ବୋଲି ଆଲୋକ ସିଂ କହିଛନ୍ତି । (ଏଜେନ୍ସୀ)
