ବହୁ ଚର୍ଚ୍ଚିତ ରାଫେଲ୍ ଯୁଦ୍ଧ ବିମାନକୁ ନେଇ ସୁପ୍ରିମକୋର୍ଟରେ ଶୁଣାଣି ହୋଇଛି। ରାଫେଲ ଚୁକ୍ତିର ଗୋପନୀୟ ତଥ୍ୟର ବ୍ୟବହାର ଉପରେ ରୋକ୍ ଲଗାଇବା ପାଇଁ ଏହା ଉପରେ ବିଶେଷାଧିକାର ପାଇଁ କେନ୍ଦ୍ର ସରକାର ଆଜି ସୁପ୍ରିମ୍କୋର୍ଟରେ ନୂତନ ଯୁକ୍ତି ଉପସ୍ଥାପନ କରିଥିବାବେଳେ ସୁପ୍ରିମ୍କୋର୍ଟ ଏହି ମାମଲାରରେ ରାୟ ସଂରକ୍ଷିତ ରଖିଛନ୍ତି। ସମ୍ବିଧାନ ଅଧୀନରେ ଥିବା ‘ରିଜନେବଲ୍ ରେଷ୍ଟ୍ରିକ୍ସନ୍ ଲ’ ଏବଂ ସୂଚନାଧିକାର ଆଇନ ବା ଆରଟିଆଇ ଆକ୍ଟ ଅନୁଯାୟୀ ରିଭ୍ୟୁ ପିଟିସନ୍ ଶୁଣାଣିରୁ ଏହି ଦସ୍ତାବିଜ୍କୁ ବାଦ୍ ଦିଆଯାଇପାରିବ ବୋଲି ସରକାରଙ୍କ ପକ୍ଷରୁ ଆଜି ଯୁକ୍ତି ରଖାଯାଇଥିଲା। କିନ୍ତୁ ଏହାର ଉତ୍ତରରେ କୋର୍ଟ ସରକାରୀ ଓକିଲଙ୍କୁ ପ୍ରଶ୍ନ କରିଥିଲେ, ଆରଟିଆଇ ଆକ୍ଟର ଏକ ଧାରା ରହିଛି ଯେ, ଦୁର୍ନୀତି କ୍ଷେତ୍ରରେ ବ୍ରିଟିଶ ଅମଳର ଅଫିସିଆଲ ସିକ୍ରେଟ୍ ଆଇନକୁ ଅଣଦେଖା କରାଯାଇପାରିବ। ଗୋପନୀୟ ବିଚାର କରାଯାଉଥିବା ଏହି ତଥ୍ୟର ବ୍ୟବହାରରେ ସରକାରଙ୍କ ବିଶେଷାଧିକାର ଦାବି ଭିତ୍ତିରେ ସୁପ୍ରିମ୍କୋର୍ଟ ରାୟ ସଂରକ୍ଷିତ ରଖିଛନ୍ତି। ଆଜିର ଶୁଣାଣି ସମୟରେ ଆଟର୍ଣ୍ଣି ଜେନେରାଲ କେକେ ବେଣୁଗୋପାଳ ରକ୍ଷାମନ୍ତ୍ରାଳୟରୁ ଲିକ ହୋଇଥିବା ଦସ୍ତାବିଜ ଗୁଡିକୁ ପୁର୍ନବିଚାର ଆବେଦନରୁ ହଟାଯାଉ, କାରଣ ସେହି ଦସ୍ତାବିଜ ଗୁଡିକ ଉପରେ ଭାରତ ସରକାରଙ୍କ ଅଧିକାର ରହିଛି ବୋଲି ଯୁକ୍ତି ରଖିଥିଲେ। ଅଫିସିଆଲ ସିକ୍ରେଟ୍ ଆକ୍ଟ ଅନୁଯାୟୀ ପ୍ରତିରକ୍ଷା ମନ୍ତ୍ରଣାଳୟର ତଥ୍ୟ ସୁପ୍ରିମ୍କୋର୍ଟରେ ଉପସ୍ଥାପିତ ହୋଇପାରିବନି ବୋଲି କହିବା ସହିତ ଆଟର୍ଣ୍ଣି ଜେନେରାଲ୍ ଏହି ମାମଲା ବିଶେଷାଧିକାର ଅଧୀନରେ ଆସୁଥିବାରୁ ଏହାର ସାର୍ବଜନୀନ ବ୍ୟବହାର ଉପରେ ରୋକ୍ ଲଗାଯାଉ ବୋଲି ସୁପ୍ରିମ୍କୋର୍ଟଙ୍କୁ କହିଥିଲେ। ତେବେ ଏହି ମାମଲାର ଶୁଣାଣି କରି ମୁଖ୍ୟ ବିଚାରପତି ରଞ୍ଜନ ଗୋଗେଇଙ୍କ ଦ୍ବାରା ଗଠିତ ଖଣ୍ଡପୀଠ କେନ୍ଦ୍ର ଦ୍ବାରା ଉଠାଯାଇଥିବା ପ୍ରାରମ୍ଭିକ ଅଭିଯୋଗର ଶୁଣାଣି କରାଯିବାପରେ ରଫେଲ ଡିଲ ସମ୍ପର୍କିତ ଶୁଣାଣି କରାଯିବ ବୋଲି କହିଛନ୍ତି।
