ଭୁବନେଶ୍ୱର: ଦୁଇଥର ଗ୍ରାମୀ ପୁରସ୍କାରପ୍ରାପ୍ତ ଭାରତୀୟ ସଂଗୀତ ରଚନା ତଥା ପରିବେଶବିଦ୍ ଡକ୍ଟର ରିକି ଜି. କେଜ ପରିବେଶ ତଥା ନିରନ୍ତରତା ଉପରେ ପିଲାମାନଙ୍କ ପାଇଁ ସଂଗୀତ-‘ମାଇଁ ଆର୍ଥ ସଙ୍ଗସ୍’ ଉପରେ ନିଜର ବକ୍ତବ୍ୟ ପ୍ରଦାନ କରିଥିଲେ ।
ଆଜି ଓଡ଼ିଶା ଲୋକାସେବା ଭବନର ସମ୍ମିଳନୀ କକ୍ଷରେ ୨୫ତମ ଓଡିଶା ନଲେଜ୍ ହବ୍ ଲେକଚ୍ର ସିରିଜ୍ ଅନୁଷ୍ଠିତ ହୋଇଯାଇଛି । ଜାନୁଆରୀ, ୨୦୧୬ ଠାରୁ ବିଭିନ୍ନ କ୍ଷେତ୍ରରେ ନୂତନ ତଥା ଉଦୀୟମାନ ଚିନ୍ତାଧାରାକୁ ପ୍ରୋତ୍ସାହିତ କରିବା ପାଇଁ ଓଡିଶା ସରକାର ଓଡ଼ିଶା ନଲେଜ୍ ହବ୍ (ଓକେଏଚ୍) ଲେକଚର ସିରିଜ୍ ଆୟୋଜନ କରିଆସୁଛନ୍ତି ।
ଡକ୍ଟର କେଜ ଓଡିଶାର ସୌନ୍ଦର୍ଯ୍ୟ ଏବଂ ମହାନତାକୁ ପ୍ରଶଂସା କରିଥିଲେ ଏବଂ ତାଙ୍କର ସଂଗୀତ କ୍ୟାରିୟରର ଯାତ୍ରା ଏବଂ ତାଙ୍କ ସଙ୍ଗୀତ ପ୍ରକୃତି ସହିତ କିପରି ଜଡିତ ସେ ବିଷୟରେ ବର୍ଣ୍ଣନା କରିଥିଲେ । ଜଣେ ପରିବେଶବିଦ୍ ଭାବରେ ବନ୍ୟଜନ୍ତୁ ଏବଂ ସେମାନଙ୍କ ବାସସ୍ଥାନକୁ ସୁରକ୍ଷା ଦେବା ଦିଗରେ ସେ ଉଦ୍ୟମ କରିଛନ୍ତି । ଜଳବାୟୁ ପରିବର୍ତ୍ତନ ଉପରେ ସେ ନିଜର ଅଭିଜ୍ଞତା ଉପସ୍ଥାପନ କରିଥିଲେ ।
ସେ କିରିବାଟି ଦ୍ୱୀପ ଦେଶର ଉଦାହରଣ ଦେଇ କହିଥିଲେ ଯେ ବର୍ତ୍ତମାନର କାର୍ବନ ନିର୍ଗମନର ଗତି ସ୍ଥିର ନହେଲେ ଏବଂ ସମୁଦ୍ର ପତ୍ତନ ବଢ଼ିବାରେ ଅଙ୍କୁଶ ନ ଲାଗିଲେ ଏହା ପ୍ରଥମ ଦେଶ ଭାବେ ଜଳମଗ୍ନ ହେବାର ସମ୍ଭାବନା ରହିଛି । ସେ କହିଥିଲେ ଯେ ସଂଗୀତ ଲୋକମାନଙ୍କର ଭାବପ୍ରବଣତାକୁ ସ୍ପର୍ଶ କରେ । ବିଶେଷକରି, ଯୁବକ ଏବଂ ଭାବପ୍ରବଣ ମନକୁ ଆନ୍ଦୋଳିତ କରେ ଏବଂ ସମସ୍ତ ଜୀବଙ୍କ ପ୍ରତି ସେମାନଙ୍କର ମନୋଭାବରେ ପରିବର୍ତ୍ତନ ଆଣେ । ତଦନୁସାରେ, ସେ ନିଜ ଜୀବନକୁ କେବଳ ଜଳବାୟୁ ପରିବର୍ତ୍ତନ, ପରିବେଶ ସଂରକ୍ଷଣ, ସ୍ଥାୟୀ ଏବଂ ଦାୟିତ୍ୱସଂପନ୍ନ ବିକାଶ ବିଷୟରେ ସଚେତନତା ନିମନ୍ତେ କାର୍ଯ୍ୟ କରିବା ପାଇଁ ଉତ୍ସର୍ଗ କରିଛନ୍ତି ।
ମୁଖ୍ୟମନ୍ତ୍ରୀ ଏହି ଲେକ୍ଚରରେ ଯୋଗ ଦେଇଥିଲେ ଏବଂ ଡକ୍ଟର ରିକି ଜି କେଜଙ୍କୁ ତାଙ୍କ ସଙ୍ଗୀତ ମାଧ୍ୟମରେ ପରିବେଶ ପ୍ରତି ସଚେତନତା ସୃଷ୍ଟି ନିମନ୍ତେ କରିଥିବା ପ୍ରଶଂସନୀୟ କାର୍ଯ୍ୟ ପାଇଁ ସାଧୁବାଦ ଜଣାଇଥିଲେ । ସେ ତାଙ୍କୁ ଓଡିଆରେ ସଂଗୀତରେ ସ୍ୱରଦେବାକୁ ଅନୁରୋଧ କରିଥିଲେ ।
ଏହି ଅବସରରେ କୃଷି ଏବଂ କୃଷକ ସଶକ୍ତିକରଣ ମନ୍ତ୍ରୀ, ଯୋଜନା ଏବଂ ସଂଯୋଜନ, ଓଡ଼ିଶା ଦକ୍ଷତା ବିକାଶ ପ୍ରାଧିକରଣର ଅଧ୍ୟକ୍ଷ, ମାନ୍ୟବର ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା, ମୁଖ୍ୟ ଶାସନ ସଚିବ, ଉନ୍ନୟନ କମିଶନର-ତଥା-ଅତିରିକ୍ତ ମୁଖ୍ୟ ଶାସନ ସଚିବ, ବିଭିନ୍ନ ବିଭାଗର ସଚିବ ଏବଂ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ଶିକ୍ଷା, କଳା, ସଂସ୍କୃତି, ସାହିତ୍ୟ, ନୃତ୍ୟ ଏବଂ ସଙ୍ଗୀତ କ୍ଷେତ୍ରର ବିଶିଷ୍ଟ ବ୍ୟକ୍ତିତ୍ୱମାନେ ଏହି ଲେକ୍ଚରରେ ଯୋଗ ଦେଇଥିଲେ । ବିଭିନ୍ନ ଜିଲ୍ଲାର ଜିଲ୍ଲାପାଳ, ଜିଲ୍ଲା ସ୍ତରର କାର୍ଯ୍ୟକର୍ତ୍ତା ଏବଂ ବହୁ ବିଦ୍ୟାଳୟର ଛାତ୍ରଛାତ୍ରୀମାନେ ଏହି ଲେକ୍ଚର୍କୁ ଶୁଣିଥିଲେ । ଏକ ଭାବପୂର୍ଣ୍ଣ ଏବଂ ଆକର୍ଷଣୀୟ ପ୍ରଶୋ୍ନତ୍ତର ଅଧିବେଶନ ସହିତ ଏହି ଲେକ୍ଚର୍ ସମାପ୍ତ ହୋଇଥିଲା ।
