ଭୁବନେଶ୍ବର : ଆଜି 2020 ବର୍ଷର ପ୍ରଥମ ସୂର୍ଯ୍ୟପରାଗ । ବିଶ୍ବର ବିଭିନ୍ନ ଦେଶରେ ଏହା ଦୃଶ୍ୟମାନ ହେଉଛି । ଏହି ସୂର୍ଯ୍ୟପାଗ ଅନ୍ୟ ପରାଗଠାରୁ ସମ୍ପୂର୍ଣ୍ଣ ଭିନ୍ନ । ଜୁନ୍ 21 ତାରିଖ ଅର୍ଥାତ୍ ଆଜି ହେଉଛି ବର୍ଷର ସବୁଠାରୁ ବଡ ଦିନ । ପ୍ରାୟ 900 ବର୍ଷ ପରେ ସୂର୍ଯ୍ୟପରାଗ ସମୟରେ ଏପରି ସଂଯୋଗ ସୃଷ୍ଟି ହୋଇଛି । ଏହି ଗ୍ରହଣ ସମୟରେ ରାହୁ, ବୁଧ ଓ ଚନ୍ଦ୍ରଙ୍କ ସହିତ ସୂର୍ଯ୍ୟଙ୍କ ସଂଯୋଗ ହେବାର ଯୋଗ ବନୁଛି। ଭୁବନେଶ୍ବରରେ ଦିନ 10ଟା 38ରୁ ପରାଗ ସ୍ପର୍ଶ ଆରମ୍ଭ ହୋଇଛି । ଅପରାହ୍ନ 2ଟା9ରେ ସର୍ବମୋକ୍ଷ ହେବା ନେଇ ପ୍ଲାନେଟୋରିୟମ୍ ପକ୍ଷରୁ ସୂଚନା ଦିଆଯାଇଛି ।ଓଡ଼ିଶାର ଅନ୍ୟାନ୍ୟ ସ୍ଥାନରେ ପରାଗ ସ୍ପର୍ଶ ସମୟ 5/7 ମିନିଟ୍ର ଫରକ ରହିବ । 12ଟା 15ରୁ12ଟା 30 ମଧ୍ୟରେ ସର୍ବାଧିକ ଅଂଶ ଦୃଶ୍ୟମାନ ହେବ । ଭୁବନେଶ୍ବରରେ 12ଟା 26ରେ ସର୍ବାଧିକ 65% ଦୃଶ୍ୟମାନ ହେବ । ଖାଲି ଆଖିରେ ପରାଗ ନ ଦେଖିବା ପାଇଁ ସମସ୍ତଙ୍କୁ ପରାମର୍ଶ ଦିଆଯାଇଛି ।
ଭାରତ ସମେତ ନେପାଳ, ପାକିସ୍ତାନ, ସାଉଦି ଆରବ, ୟୁଏଇ, ଏଥୋପିଆ ଆଦି ଅଞ୍ଚଳରେ ଦୃଶ୍ୟମାନ ହେବ । ସେହିପରି ନୂଆଦିଲ୍ଲୀ, କୋଲକାତା, ହାଇଦ୍ରାବାଦ, ବାଙ୍ଗାଲୋର୍, ଲକ୍ଷ୍ନୌ, ଚେନ୍ନାଇ ସିମ୍ଲା ଆଦି କିଛି ପ୍ରସିଦ୍ଧ ସହରରେ ଆଂଶିକ ସୂର୍ଯ୍ୟପରାଗ ଦେଖିବାକୁ ମିଳିବ । ସେହିପରି ଡେରାଡୁନ୍ ଓ ସିର୍ସା ଆଦି ସହରରେ ବଳୟ ସୂର୍ଯ୍ୟପରାଗ ଦେଖିବାକୁ ମିଳିବ । (ଏଜେନ୍ସି)