ମଧ୍ୟପ୍ରଦେଶ : ସରକାର କରୋନା ସହ ମୁକାବିଲା କରିବା ପାଇଁ ସାରା ଦେଶରେ ଲକ୍ଡାଉନ୍ ଜାରି କରିଛନ୍ତି । ଲକ୍ ଡାଉନ୍ ସମୟରେ ବହୁ ରୋଚକ ଘଟଣା ସବୁ ସାମ୍ନାକୁ ଆସୁଛି । ଏହି ଲକ୍ ଡାଉନ୍ ସମୟରେ ପୋଲିସ୍ ଆଇନର ପାଳନ କରିବା ସହିତ ସମାଜସେବା ମଧ୍ୟ କରୁଛି। ଲକ୍ ଡାଉନ୍ ସମୟରେ ପଣ୍ଡିତ ବା ବ୍ରାହ୍ମଣ ନ ମିଳିବାରୁ ଜଣେ ମହିଳା ପୋଲିସ୍ ଅଧିକାରୀ ବାହାଘର କରାଇଥିବାର ଏକ ଘଟଣା ଏବେ ଚର୍ଚ୍ଚାକୁ ଆସିଛି ।
ମଧ୍ୟପ୍ରଦେଶର ନରସିଂହପୁର ଜିଲ୍ଲାରେ ଲକ୍ ଡାଉନ୍ ସମୟରେ ଏକ ଅନନ୍ୟ ବିବାହଘର ଦେଖିବାକୁ ମିଳିଛି । ଯେଉଁଠାରେ ବର ବଧୂଙ୍କ ବାହାଘର କୌଣସି ପୂଜାରୀ ବା ପଣ୍ଡିତ କରିନାହାନ୍ତି ବରଂ ଜଣେ ପୋଲିସ୍ ଅଧିକାରୀ କରିଛନ୍ତି । ପଣ୍ଡିତ ନମିଳିବାରୁ ଝାଟେଶ୍ବର ପୋଲିସ୍ ଚୌକର ଜଣେ ମହିଳା ଏସ୍ଆଇ ଅଞ୍ଜଳି ଅଗ୍ନିହୋତ୍ରୀ ଏହି ଯୋଡିଙ୍କ ବିବାହ କରିଛନ୍ତି ।
ବାହାଘର କରିବା ପାଇଁ ମନ୍ତ୍ରୋଚାରଣ କରିବା ସହିତ କିଛି ମନ୍ତ୍ର ଗୁଗୁଲ୍ ସାହାଯ୍ୟରେ ବୋଲିଥିଲେ । ମନ୍ତ୍ର ପଢିବା ସହିତ ଦୀପ ଲଗାଇବା ଓ ସପ୍ତପଦୀ ନେବା ସମୟରେ ବର ବଧୂଙ୍କ ସାତ ବଚନ ମଧ୍ୟ ପଢାଇଥିଲେ । ସେହିପରି ଆଇନର ପାଳନ କରିବା ପାଇଁ ମଧ୍ୟ ଉପଦେଶ ଦେଇଥିଲେ ।
ନରସିଂହ ପୁର ଜିଲ୍ଲାରେ ରହୁଥିବା ଲକ୍ଷ୍ମଣ ଚୌଧୁରୀ ବିବାହ ପାଇଁ ଜିଲ୍ଲା ପ୍ରଶାସନ ତରଫରୁ ଅନୁମତି ନେଇଥିଲେ । ବିବାହ ଝାଟେଶ୍ବରର ଏକ ପାର୍ବତୀ ମନ୍ଦିରରେ କିଛି ଲୋକଙ୍କୁ ନେଇ ଅନୁଷ୍ଠିତ ହେଉଥିଲା । କିନ୍ତୁ ବ୍ରାହ୍ମଣ ନ ମିଳିବାରୁ ବାହାଘର ହୋଇପାରୁନଥିଲା । ସେଠାରେ ମହିଳା ଏଏସ୍ଆଇ ପହଞ୍ଚି ସେମାନଙ୍କ ବିବାହ ସମ୍ପନ୍ନ କରାଇଥିଲେ । (ଏଜେନ୍ସି)