ନୂଆଦିଲ୍ଲୀ: ଖୁବଶୀଘ୍ର ବିଜୁଳି ବିଲ କାମ ହେବାକୁ ଯାଉଛି। ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବ୍ୟବସ୍ଥା କରିଛନ୍ତି। ଅଯୋଧ୍ୟାରେ ରାମ ମନ୍ଦିର ପ୍ରାଣ ପ୍ରତିଷ୍ଠା ସମାରୋହରୁ ଫେରିବାମାତ୍ରେ ସେ ଏ ନେଇ ଏକ ବଡ଼ ଘୋଷଣା କରିଛନ୍ତି। ପ୍ରଧାନମନ୍ତ୍ରୀ ଏକ ନୂଆ ଯୋଜନା ଘୋଷଣା କରିଛନ୍ତି । ଏହାର ନାମ ହେଉଛି ପ୍ରଧାନମନ୍ତ୍ରୀ ସୂର୍ଯ୍ୟୋଦୟ ଯୋଜନା। ଏଥିପାଇଁ ସରକାର ୧ କୋଟିରୁ ଅଧିକ ଘରେ ଛାତ ଉପରେ ସୋଲାର ପ୍ୟାନେଲ ଲଗାଇବାକୁ ଲକ୍ଷ୍ୟ ରଖିଛନ୍ତି। ଗରିବ ଓ ମଧ୍ୟବିତ୍ତଙ୍କ ବିଜୁଳି ବିଲ ହ୍ରାସ କରିବା ଏହାର ଉଦ୍ଦେଶ୍ୟ। ଏହି ଯୋଜନା ଜରିଆରେ ସରକାର ଶକ୍ତି କ୍ଷେତ୍ରରେ ଆତ୍ମନିର୍ଭରଶୀଳତା ଆଣିବାକୁ ଲକ୍ଷ୍ୟ ରଖିଛନ୍ତି। ପ୍ରଧାନମନ୍ତ୍ରୀ ମୋଦୀ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ପୋଷ୍ଟ କରି ଏହି ଯୋଜନା ବିଷୟରେ ସୂଚନା ଦେଇଛନ୍ତି।
ପ୍ରଧାନମନ୍ତ୍ରୀ ତାଙ୍କ ପୋଷ୍ଟରେ ଲେଖିଛନ୍ତି, ସୂର୍ଯ୍ୟବଂଶୀ ଭଗବାନ ଶ୍ରୀରାମଙ୍କ ଆଲୋକରୁ ପୃଥିବୀର ସମସ୍ତ ଭକ୍ତଙ୍କୁ ସର୍ବଦା ଶକ୍ତି ମିଳିଥାଏ। ଆଜି ଅଯୋଧ୍ୟାରେ ରାମଲାଲାଙ୍କ ପ୍ରାଣପ୍ରତିଷ୍ଠା ଅବସରରେ ମୋର ସଂକଳ୍ପ ଆହୁରି ଦୃଢ଼ ହୋଇଛି ଯେ ଭାରତୀୟମାନଙ୍କୁ ସେମାନଙ୍କ ଘରଛାତ ଉପରେ ନିଜସ୍ୱ ସୌର ବ୍ୟବସ୍ଥା ରହିବା ଉଚିତ। ଅଯୋଧ୍ୟାରୁ ଫେରିବା ପରେ ମୁଁ ପ୍ରଥମ ନିଷ୍ପତ୍ତି ନେଇଛି ଯେ ଆମ ସରକାର ୧ କୋଟି ଘରେ ଛାତ ଉପରେ ସୋଲାର ଲଗାଇବା ଲକ୍ଷ୍ୟ ନେଇ ‘ପ୍ରଧାନମନ୍ତ୍ରୀ ସୂର୍ଯ୍ୟୋଦୟ ଯୋଜନା’ ଆରମ୍ଭ କରିବେ। ଏହାଦ୍ୱାରା କେବଳ ଗରିବ ଓ ମଧ୍ୟବିତ୍ତଙ୍କ ବିଜୁଳି ବିଲ କମିବ ନାହିଁ, ବରଂ ଶକ୍ତି କ୍ଷେତ୍ରରେ ଭାରତ ଆତ୍ମନିର୍ଭରଶୀଳ ହେବ।
କିଏ ଲାଭବାନ ହେବ?
ପ୍ରଧାନମନ୍ତ୍ରୀ ସୂର୍ଯ୍ୟୋଦୟ ଯୋଜନାର ସବୁଠାରୁ ଅଧିକ ହିତାଧିକାରୀ ଗରିବ ଓ ମଧ୍ୟବିତ୍ତବର୍ଗଙ୍କୁ ମିଳିବ ବୋଲି ଆଶା କରାଯାଉଛି। ବର୍ତ୍ତମାନ ତାଙ୍କୁ ତାଙ୍କ ରୋଜଗାରର ଏକ ବଡ଼ ଅଂଶ ବିଜୁଳି ବିଲ ବାବଦରେ ଖର୍ଚ୍ଚ କରିବାକୁ ପଡ଼ୁଛି। ବିଜୁଳି ବିଲକୁ ନେଇ ଦେଶରେ ରାଜନୀତି ମଧ୍ୟ ଜୋର ଧରିଛି। କେତେବେଳେ ବିଲ ଛାଡ଼ ପ୍ରସଙ୍ଗରେ ତ କେତେବେଳେ ମାଗଣା ବିଜୁଳି ପ୍ରସଙ୍ଗରେ ଲୋକଙ୍କୁ ଆକୃଷ୍ଟ କରିବାକୁ ଚେଷ୍ଟା କରାଯାଉଛି। ଏହି ଯୋଜନା ଜରିଆରେ ସରକାର ଏଭଳି ପ୍ରସଙ୍ଗରେ ରାଜନୀତିକୁ ଶେଷ କରିବାର ବାଟ ମଧ୍ୟ ତିଆରି କରିଛନ୍ତି।
କେତେ ପରିମାଣର ଛାତ ଉପରେ ସୋଲାର ଲଗାଯିବ?
ପ୍ରଧାନମନ୍ତ୍ରୀ ସୂର୍ଯ୍ୟୋଦୟ ଯୋଜନା ଘୋଷଣା କରି ପ୍ରଧାନମନ୍ତ୍ରୀ ମୋଦୀ ୧ କୋଟି ଘରେ ଛାତ ଉପରେ ସୋଲାର ଲଗାଇବା କଥା କହିଛନ୍ତି। ତେବେ ଏହାକୁ ପ୍ରଥମେ କେଉଁଠି ଲଗାଯିବ ସେ ନେଇ ସରକାର ଖୁବଶୀଘ୍ର ରୋଡମ୍ୟାପ୍ ଉପସ୍ଥାପନ କରିପାରନ୍ତି।