ନୂଆଦିଲ୍ଲୀ: ୨୦୨୪ ଆଇପିଏଲ୍ ପୂର୍ବରୁ, ସନରାଇଜର୍ସ ହାଇଦ୍ରାବାଦ ଏକ ବଡ ପରିବର୍ତ୍ତନ କରିଛି ଏବଂ ପ୍ୟାଟ୍ କମିନ୍ସଙ୍କୁ ନୂତନ ଅଧିନାୟକ କରିଛି। ଗତ ସଂସ୍କରଣରେ ଅର୍ଥାତ୍ ୨୦୨୩ରେ ଦାୟିତ୍ୱ ଗ୍ରହଣ କରିଥିବା ଏଡେନ ମାର୍କ୍ରାମଙ୍କୁ ଫ୍ରାଞ୍ଚାଇଜ୍ ଛୁଟି କରିଛି। ୨୦୨୪ ଆଇପିଏଲ୍ ପାଇଁ ଆୟୋଜିତ ମିନି ନିଲାମରେ କମିନ୍ସଙ୍କୁ ହାଇଦ୍ରାବାଦ ୨୦.୫୦କୋଟି ଟଙ୍କାରେ କିଣିଥିଲା। ଏହାପରେ କମିନ୍ସ ଆଇପିଏଲ୍ ଇତିହାସରେ ବିକ୍ରି ହୋଇଥିବା ଦ୍ୱିତୀୟ ମହଙ୍ଗା ଖେଳାଳି ହୋଇଥିଲେ।
ବିପୁଳ ପରିମାଣରେ କମିନ୍ସଙ୍କୁ କିଣିଥିବା ସନରାଇଜର୍ସ ହାଇଦ୍ରାବାଦ ବର୍ତ୍ତମାନ ତାଙ୍କୁ ଏକ ନୂତନ ଦାୟିତ୍ଵ ଦେଇଛି ଏବଂ ତାଙ୍କୁ ମାର୍ଚ୍ଚ ୨୨ ତାରିଖରୁ ଆରମ୍ଭ ହେଉଥିବା ୨୦୨୪ ଆଇପିଏଲ୍ ପାଇଁ ଅଧିନାୟକ କରିଛି। ସୋସିଆଲ ମିଡିଆ ଜରିଆରେ ସନରାଇଜର୍ସ ହାଇଦ୍ରାବାଦ ନୂତନ ଅଧିନାୟକ ଘୋଷଣା କରିଛି। ହାଇଦ୍ରାବାଦ ସୋସିଆଲ ମିଡିଆରେ ଏକ ପୋଷ୍ଟ କରି ଲେଖିଛି ଯେ ଆମର ନୂତନ ଅଧିନାୟକ ପାଟ କମିନ୍ସ।
ଗତ ସିଜନରେ ହାଇଦ୍ରାବାଦର ପ୍ରଦର୍ଶନ ସବୁଠାରୁ ଖରାପ ଥିଲା:
ପ୍ରକାଶ ଯେ, ଏଡେନ ମାର୍କ୍ରାମଙ୍କ ଅଧିନାୟକତ୍ୱରେ ଖେଳିବାବେଳେ ୨୦୨୩ ଆଇପିଏଲ୍ ରେ ସନରାଇଜର୍ସ ହାଇଦ୍ରାବାଦ ବହୁତ ଖରାପ ପ୍ରଦର୍ଶନ କରିଥିଲା। ମାର୍କ୍ରାମଙ୍କ ଅଧିନାୟକତ୍ୱରେ ଦଳ ୧୪ ଟି ଲିଗ୍ ମ୍ୟାଚ୍ ମଧ୍ୟରୁ ୪ ଟି ଜିତିପାରିଥିଲା। ଦଳ ପଏଣ୍ଟ ଟେବୁଲରେ ଦଶମ ଅର୍ଥାତ୍ ନିମ୍ନରେ ଥିଲା। ଗତ ସିଜିନର ଖରାପ ପ୍ରଦର୍ଶନକୁ ଦୃଷ୍ଟିରେ ରଖି ଦଳ ପରିଚାଳନା ଏହି ପରିବର୍ତ୍ତନ କରିଛି। କମିନ୍ସ ବର୍ତ୍ତମାନର ଅନ୍ୟତମ ସଫଳ ଅଧିନାୟକ। ତାଙ୍କ ଅଧିନାୟକତ୍ୱରେ କମିନ୍ସ ଅଷ୍ଟ୍ରେଲିଆକୁ ୨୦୨୩ ବିଶ୍ୱକପରେ ଚାମ୍ପିୟନ କରିଥିଲେ।
