ଭୁବନେଶ୍ବର: ଓଡିଶା ମନୋରଂଜନ ଜଗତରେ ଧୂମ ମଚାଇ ଆସୁଛି ଡିସ୍ନି ଷ୍ଟାର ନେଟୱାର୍କର ନୂଆ ଓଡିଆ ଚ୍ୟାନେଲ ‘ଷ୍ଟାର କିରଣ’। ଏହି ବିଗ ବଜେଟ ଚ୍ୟାନେଲ ଜୁନ୍ ପ୍ରଥମ ସପ୍ତାହରେ ଏହାର ପ୍ରସାରଣ ଆରମ୍ଭ କରିବ ବୋଲି ଜଣାପଡିଛି। ଏଥିସହିତ ‘ଷ୍ଟାର କିରଣ ଏଚଡି’ ଚ୍ୟାନେଲ ମଧ୍ୟ ଏକା ସମୟରେ ପ୍ରସାରଣ ହେବ।
ସେଥିପାଇଁ ଭୁବନେଶ୍ବରରେ ଥିବା ‘ଷ୍ଟାର କିରଣ’ ଟିମ ଜୋରଦାର ପ୍ରସ୍ତୁତି ଆରମ୍ଭ କରିଛନ୍ତି। ଓଡିଆ ଦର୍ଶକମାନଙ୍କୁ ନୂତନ ଧରଣର ମନୋରଂଜନ ପ୍ରଦାନ କରିବା ପାଇଁ କଂପାନୀ ତରଫରୁ ଉଦ୍ୟମ ଜାରୀ ରହିଛି। ସେଥିପାଇଁ ପ୍ରାୟ ଚାରି ମାସ ଧରି ଓଡିଶାର ବିଭିନ୍ନ ସ୍ଥାନରେ ହାଇ ବଜେଟ ସୁଟିଂ ଚାଲିଛି।
ପ୍ରଥମ ଥର ପାଇଁ ଓଡିଶାର ଦର୍ଶକମାନେ ଏକ ଏଚଡି ଚ୍ୟାନେଲ ଦେଖିବାର ସୁଯୋଗ ପାଇବେ। ପୂର୍ବରୁ ଜାତୀୟ ସ୍ତରରେ ବିଭିନ୍ନ ମନୋରଂଜନ ଚ୍ୟାନେଲ ଏଚଡି ଫର୍ମାଟରେ ପ୍ରସାରଣ କରୁଛନ୍ତି। ଏପରିକି ଆଞ୍ଚଳିକ ସ୍ତରରେ ମଧ୍ୟ କେତେକ ଚ୍ୟାନେଲ ମଧ୍ୟ ଏଚଡି ଫର୍ମାଟରେ ପ୍ରସାରଣ କରୁଛନ୍ତି। ହେଲେ ଓଡିଶା ଦର୍ଶକ ଏହି ଏଚଡି କ୍ବାଲିଟ ଚ୍ୟାନେଲ ଦେଖିବାର ସୁଯୋଗ ନ ଥିଲା। ବର୍ତ୍ତମାନ ‘ଷ୍ଟାର କିରଣ ଏଚଡି’ ସେହି ଅଭାବକୁ ପୂରଣ କରିବାକୁ ଯାଉଛି।
ଷ୍ଟାର କିରଣ ପାଇଁ ବିଭିନ୍ନ କାର୍ଯ୍ୟକ୍ରମ କରୁଥିବା ପ୍ରଯୋଜକମାନେ ଏହାକୁ ନେଇ ବେଶ୍ ଉତ୍ସାହିତ ଅଛନ୍ତି। ସେମାନଙ୍କର କହିବା କଥା ଯେ, ଷ୍ଟାର ଟିଭି ବର୍ତ୍ତମାନ ଯେଉଁ ପ୍ରକାରର କାର୍ଯ୍ୟକ୍ରମ ଆଣୁଛି ତାହା ଓଡିଆ ମନୋରଂଜନ ଜଗତରେ କେବେ ବି ହୋଇ ନ ଥିଲା। ଏଥିସହିତ କଂପାନୀ ଗୋଟିଏ ଗୋଟିଏ ଧାରାବାହିକ ପଛରେ ଯେତେ ପଇସା ଖର୍ଚ୍ଚ କରୁଛି ତାହା ଓଡିଶାରେ କେହି କରି ନାହାଁନ୍ତି। ଏପରି ହାଇ ବଜେଟ କାର୍ଯ୍ୟକ୍ରମ ଓଡିଶା ଦର୍ଶକଙ୍କ ମହଲରେ ହଇଚଇ ସୃଷ୍ଟି ହେବ ବୋଲି ସେମାନେ କହିଛନ୍ତି।
ଓଡିଶାର ମନୋରଂଜନ ଶିଳ୍ପରେ ବର୍ତ୍ତମାନ ପାଞ୍ଚୋଟି ଚ୍ୟାନେଲ ମଧ୍ୟରେ ପ୍ରତିଯୋଗୀତା ଚାଲିଛି। ସେଗୁଡିକ ହେଉଛି ତରଙ୍ଗ, ଜୀ ସାର୍ଥକ, କଲରସ ଓଡିଆ, ସିଦ୍ଧାର୍ଥ ଟିଭି ଏବଂ ମଞ୍ଜରୀ ଟିଭି। ଏଗୁଡିକ ମଧ୍ୟରୁ ତରଙ୍ଗ ଏବଂ ଜୀ ସାର୍ଥକ ଦର୍ଶକଙ୍କୁ ବାନ୍ଧି ରଖିବାରେ ସକ୍ଷମ ହୋଇପାରିଥିବା ବେଳେ ଅନ୍ୟ ଚ୍ୟାନେଲଗୁଡିକ ସଂଘର୍ଷ ଚଳାଇଛନ୍ତି। ଏହି ପ୍ରତିଯୋଗୀତାରେ ଷ୍ଟାର ପରି ଜାତୀୟ ସ୍ତରର ଚ୍ୟାନେଲ ସାମିଲ ହେବ।
ଦେଶରେ ଡିସ୍ନି ଷ୍ଟାର ନେଟୱାର୍କର ବର୍ତ୍ତମାନ ଛଅଟି ଆଞ୍ଚଳିକ ଭାଷାର ଚ୍ୟାନେଲ ରହିଛି।ସେଗୁଡିକ ହେଲା ମାଲାୟାଲମ୍, କନ୍ନଡ, ତେଲୁଗୁ, ତାମିଲ, ବଙ୍ଗଳା ଏବଂ ମରାଠୀ। ଏହା ଯଥାକ୍ରମେ ଏସିଆନେଟ୍, ଷ୍ଟାର୍ ସୁବର୍ଣ୍ଣା, ଷ୍ଟାର୍ ମା, ଷ୍ଟାର୍ ବିଜୟ, ଷ୍ଟାର୍ ଜଲସା ଏବଂ ଷ୍ଟାର୍ ପ୍ରଭା ବ୍ରାଣ୍ଡରେ ଚାଲିଛି। ଷ୍ଟାର କିରଣ, ଏହି ନେଟୱାର୍କର ସପ୍ତମ ଆଞ୍ଚଳିକ ଭାଷାର ଚ୍ୟାନେଲ ହେବ।
