ନୂଆଦିଲ୍ଲୀ: କୃଷକ ଆନ୍ଦୋଳନ ମଧ୍ୟରେ ନରେନ୍ଦ୍ର ମୋଦି ଆଖୁର ଏମଏସପି ବୃଦ୍ଧି କରି ଏକ ନୂଆ ବାଜି ଲଗାଇଛନ୍ତି। କେନ୍ଦ୍ର ସରକାର ଆଖୁ (ଏଫଆରପି) ମୂଲ୍ୟରେ ୨୫ ଟଙ୍କା ବୃଦ୍ଧି କରିଛନ୍ତି। ସରକାରଙ୍କ ଏହି ନିଷ୍ପତ୍ତି ପରେ ଆଖୁର ଏମଏସପି କୁଇଣ୍ଟାଲ ପିଛା ୩୪୦ ଟଙ୍କାକୁ ବୃଦ୍ଧି କରାଯାଇଛି। ଗତବର୍ଷ ଏହାର ମୂଲ୍ୟ କ୍ୱିଣ୍ଟାଲ ପିଛା ୩୧୫ ଟଙ୍କାକୁ ବୃଦ୍ଧି ପାଇଥିଲା। ନିର୍ବାଚନ ପୂର୍ବରୁ ଉଚିତ ଓ ଲାଭଦାୟକ ମୂଲ୍ୟ (ଏଫଆରପି) ୨୫ ଟଙ୍କା ବୃଦ୍ଧି କରି ସରକାର ଆଖୁ ଚାଷୀଙ୍କୁ ସିଧାସଳଖ ଟାର୍ଗେଟ କରିବାକୁ ଚେଷ୍ଟା କରିଛନ୍ତି। ୨୦୧୯ରେ ବଡ଼ ଆଖୁ ଉତ୍ପାଦନକାରୀ ରାଜ୍ୟ ଉତ୍ତରପ୍ରଦେଶ, ମହାରାଷ୍ଟ୍ର ଓ କର୍ଣ୍ଣାଟକରେ ବିଜେପି ୧୫୦ ଆସନରୁ ୧୨୮ଟିରେ ବିଜୟୀ ହୋଇଥିଲା। ଗତ ନିର୍ବାଚନରେ ବିଜେପି ୟୁପିରେ ୬୨, ମହାରାଷ୍ଟ୍ରରେ ୨୩ ଏବଂ କର୍ଣ୍ଣାଟକରେ ୨୫ ଆସନ ରେ ବିଜୟୀ ହୋଇଥିଲା। ବିହାର ଓ ମଧ୍ୟପ୍ରଦେଶ ଭଳି କ୍ଷୁଦ୍ର ଚିନି ଉତ୍ପାଦନକାରୀ ରାଜ୍ୟକୁ ମିଶାଇଲେ ବିଜେପି ସପକ୍ଷରେ ୧୭୩ ଟି ଆସନ ମିଳିଥିଲା।
ଆଖୁ ରାଜନୀତିର ପ୍ରଭାବ ସିଧାସଳଖ ୟୁପିର ୪୦ଟି ଆସନରେ ଦେଖିବାକୁ ମିଳିବ
୨୦୨୪ ମାର୍ଚ୍ଚରେ ଲୋକସଭା ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇବ। ପୂର୍ବରୁ ବିଜେପି ସବୁ ମୋର୍ଚ୍ଚାକୁ ମଜବୁତ କରିବା ଆରମ୍ଭ କରିଛି। ଯେଉଁମାନେ କ୍ରୋଧିତ ଅଛନ୍ତି ସେମାନଙ୍କୁ ଖୁସି କରିବାକୁ ଚେଷ୍ଟା କରୁଛନ୍ତି। ହରିୟାଣା-ପଞ୍ଜାବର କୃଷକ ଆନ୍ଦୋଳନର ମୁକାବିଲା ପାଇଁ କେନ୍ଦ୍ର ସରକାର ଆଖୁର କ୍ରୟ ମୂଲ୍ୟ ବୃଦ୍ଧି କରିବାକୁ ଘୋଷଣା କରିଛନ୍ତି। ଆଖୁ ଚାଷରେ ୟୁପି, କର୍ଣ୍ଣାଟକ ଓ ମହାରାଷ୍ଟ୍ର ଶୀର୍ଷରେ ରହିଛନ୍ତି। ଏହାବ୍ୟତୀତ ବିହାର ଓ ମଧ୍ୟପ୍ରଦେଶରେ ବହୁ ସଂଖ୍ୟାରେ ଆଖୁ ଚାଷୀ ଅଛନ୍ତି। ଏହି ନିଷ୍ପତ୍ତିଦ୍ୱାରା ଦେଶର ପାଞ୍ଚ କୋଟିରୁ ଅଧିକ ଆଖୁ ଚାଷୀ ସିଧାସଳଖ ଉପକୃତ ହେବେ। ଯଦି ପଞ୍ଜାବ ଓ ହରିୟାଣାର କୃଷକଙ୍କ ସହ ତୁଳନା କରାଯାଏ ତେବେ ଏହି ସଂଖ୍ୟା ଦୁଇଗୁଣ। ୟୁପିର ୪୦ଟି ଲୋକସଭା ଆସନରେ ଆଖୁ ଚାଷୀଙ୍କ ଆଧିପତ୍ୟ ରହିଛି। ଏଥିରେ ପଶ୍ଚିମ ୟୁପିର ୨୮ଟି ଓ ପୂର୍ବାଞ୍ଚଳର ୯ଟି ଆସନ ରହିଛି। ୟୁପିରେ ୧୧୯ଟି ଚିନିକଳ ଚାଲୁଥିବାବେଳେ ସେଥିମଧ୍ୟରୁ ୯୪ଟି ଘରୋଇ ଓ ୨୪ଟି ସମବାୟ ଚିନିକଳ ରହିଛି। ଚିନି କଳରୁ ଚାଷୀଙ୍କ ପ୍ରାପ୍ୟ ପାଇବାରେ ରାଜ୍ୟର ଯୋଗୀ ସରକାର ବହୁ ମାତ୍ରାରେ ସଫଳ ହୋଇଛନ୍ତି। ଏବେ ମିଲଗୁଡ଼ିକ ଉପରେ ସର୍ବନିମ୍ନ ବକେୟା ରହିଛି। କେବଳ ୟୁପିରେ ୨ କୋଟି ଆଖୁ ଚାଷୀ ଅଛନ୍ତି। ରାଷ୍ଟ୍ରୀୟ ଲୋକଦଳ ସହ ମେଣ୍ଟ ପରେ ପଶ୍ଚିମ ୟୁପିରେ ବିଜେପି ୨୮ଟି ଆସନରେ ବିଜୟୀ ହେବ ବୋଲି ନିଶ୍ଚିତ ରହିଛି। ଏବେ ଆଖୁ ଏମଏସପିର ଅଂଶଧନ ସେମାନଙ୍କ ଦାବିକୁ ଦୃଢ଼ କରିଛି।
ମହାରାଷ୍ଟ୍ରର ୨୩ ଟି ଏବଂ କର୍ଣ୍ଣାଟକର ୨୦ ଟି ଆସନ ଉପରେ ନଜର
ୟୁପି ଭଳି ମହାରାଷ୍ଟ୍ର ଓ କର୍ଣ୍ଣାଟକରେ ମଧ୍ୟ ଆଖୁ ରାଜନୀତି ଗୁରୁତ୍ୱପୂର୍ଣ୍ଣ। ମହାରାଷ୍ଟ୍ରରେ ମୋଟ ୪୮ଟି ଲୋକସଭା ଆସନ ଥିବାବେଳେ ସେଥିମଧ୍ୟରୁ ୧୫ଟି ପଶ୍ଚିମ ମହାରାଷ୍ଟ୍ରରେ ରହିଛି। ପଶ୍ଚିମ ମହାରାଷ୍ଟ୍ର ଏବଂ ମରାଠୱାଡାକୁ ରାଜ୍ୟର ଆଖୁ ଅଞ୍ଚଳ ଭାବରେ ବିବେଚନା କରାଯାଏ । ମରାଠୱାଡ଼ାରେ ୮ଟି ଲୋକସଭା ଆସନ ରହିଛି ଅର୍ଥାତ୍ ମହାରାଷ୍ଟ୍ରର ଅଧା ଲୋକସଭା ଆସନରେ ଆଖୁ ରାଜନୀତି ଗୁରୁତ୍ୱପୂର୍ଣ୍ଣ। ମହାରାଷ୍ଟ୍ରରେ ମୋଟ ୧୯୫ଟି ଚିନି କଳ ଥିବାବେଳେ ସେଥିମଧ୍ୟରୁ ୫୪ଟି ମରାଠାୱାଡ଼ାରେ ରହିଛି। ୨ କୋଟିରୁ ଅଧିକ କୃଷକ ଏବଂ ଲକ୍ଷ ଲକ୍ଷ ଶ୍ରମିକ ଆଖୁ କଳ ସହିତ ଜଡ଼ିତ ଅଛନ୍ତି। କର୍ଣ୍ଣାଟକରେ ମଧ୍ୟ ସମାନ ସ୍ଥିତି ରହିଛି, ଯେଉଁଠି ବେଲଗାମ, ବିଜୟପୁରା, ୟାଦଗିରି, ଉତ୍ତର କନ୍ନଡ, ଶିମୋଗା, ମହୀଶୂର, ବେଲାରୀ, ବାଗଲକୋଟ, ବିଦାର, କଲବୁର୍ଗି ଏବଂ ମାଣ୍ଡ୍ୟାରେ ଆଖୁ ରାଜନୀତି ସାଂସଦ ଓ ବିଧାୟକଙ୍କ ଭବିଷ୍ୟତ ନିର୍ଦ୍ଧାରଣ କରିଥାଏ। ଆଖୁ ଦର ବୃଦ୍ଧିର ପ୍ରଭାବ କର୍ଣ୍ଣାଟକର ୨୦ଟି ଲୋକସଭା ଆସନରେ ଦେଖିବାକୁ ମିଳିଛି। ଏହାବ୍ୟତୀତ ବିହାର ଓ ମଧ୍ୟପ୍ରଦେଶର କୃଷକମାନେ ବର୍ଦ୍ଧିତ ଏମଏସପିର ଲାଭ ପାଇପାରିବେ।
