ନୂଆଦିଲ୍ଲୀ: ଆର୍ଥିକ ସଙ୍କଟ ମଧ୍ୟରେ ହିମାଚଳ ସରକାର ଏକ ବଡ ନିଷ୍ପତ୍ତି ନେଇଛନ୍ତି ଏବଂ ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କ ସମେତ ସମସ୍ତ ମନ୍ତ୍ରୀଙ୍କୁ ଦୁଇମାସ ଦରମା ନଦେବାକୁ ନିଷ୍ପତ୍ତି ନେଇଛନ୍ତି। ଏହା ସହିତ ମୁଖ୍ୟ ସଂସଦୀୟ ସଚିବ ମଧ୍ୟ ଆଗାମୀ ଦୁଇ ମାସ ପାଇଁ ତାଙ୍କ ଦରମା ନେବେ ନାହିଁ। ରାଜ୍ୟର ଆର୍ଥିକ ସ୍ଥିତି ଯୋଗୁଁ ମୁଖ୍ୟମନ୍ତ୍ରୀ ଓ ମନ୍ତ୍ରୀମାନେ ଏହି ନିଷ୍ପତ୍ତି ନେଇଛନ୍ତି।
ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ କହିଛନ୍ତି ଯେ, ଜୁନ୍ ୨୦୨୨ ପରେ ଜିଏସଟି କ୍ଷତିପୂରଣ ବନ୍ଦ ହେତୁ ରାଜ୍ୟ ରାଜସ୍ୱ ଅଭାବର ସମ୍ମୁଖୀନ ହେଉଛି। ଏହି କାରଣରୁ ରାଜ୍ୟ ବାର୍ଷିକ ୨୫୦୦-୩୦୦୦ କୋଟି ଟଙ୍କା କ୍ଷତିର ସମ୍ମୁଖୀନ ହେଉଛି। ପୁରୁଣା ପେନ୍ସନ୍ ଯୋଜନାର ପୁନରୁଦ୍ଧାର ହେତୁ ରାଜ୍ୟର ଋଣ କ୍ଷମତା ମଧ୍ୟ ପ୍ରାୟ ୨୦୦୦ କୋଟି ଟଙ୍କା ହ୍ରାସ ପାଇଛି। ଏହି ଆହ୍ଵାନଗୁଡିକ ବର୍ଣ୍ଣନା କରି ସିଏମ୍ ସୁଖୁ କହିଛନ୍ତି ଯେ, ବର୍ତ୍ତମାନର ଆର୍ଥିକ ସଙ୍କଟରୁ ବାହାରିବା ସହଜ ହେବ ନାହିଁ।
ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ କହିଛନ୍ତି ଯେ, ତାଙ୍କୁ କେନ୍ଦ୍ର ସରକାରଙ୍କଠାରୁ କୌଣସି ସହାୟତା ମିଳୁନାହିଁ। ୨୦୨୩-୨୪ ବର୍ଷରେ ରାଜସ୍ୱ ନିଅଣ୍ଟ ଅନୁଦାନ ୮,୦୫୮ କୋଟି ଟଙ୍କା ଥିଲା ଯାହା ଚଳିତ ବର୍ଷ ୬,୨୫୮ କୋଟି ଟଙ୍କାକୁ ହ୍ରାସ ପାଇଛି। ଫଳରେ ହେଉଛି ୧୮୦୦ କୋଟି ଟଙ୍କା ହ୍ରାସ ପାଇଛି। ଆସନ୍ତା ବର୍ଷ ଏହି ଅନୁଦାନରେ ୩୦୦୦ କୋଟି ଟଙ୍କା ହ୍ରାସ ହେବାର ସମ୍ଭାବନା ରହିଛି ଏବଂ ଏହି କାରଣରୁ ଏହା ମାତ୍ର ୩,୨୫୭ କୋଟି ଟଙ୍କାରେ ରହିବ। ମୁଖ୍ୟମନ୍ତ୍ରୀ ସୁଖୁ ମଧ୍ୟ ହିମାଚଳଠାରେ ବିପର୍ଯ୍ୟୟ ପରେ ଆବଶ୍ୟକତାର ମୂଲ୍ୟାଙ୍କନ ବିଷୟରେ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ ଏଥିପାଇଁ ରାଜ୍ୟକୁ ୯,୦୪୨ କୋଟି ଟଙ୍କା ଆବଶ୍ୟକ କିନ୍ତୁ ଏପର୍ଯ୍ୟନ୍ତ କେନ୍ଦ୍ର ସରକାରଙ୍କ ତରଫରୁ କୌଣସି ରାଶି ଗ୍ରହଣ କରାଯାଇ ନାହିଁ।