ନେତାଙ୍କ ସ୍ବାଗତ ପାଇଁ ସ୍କୁଲ ଛାତ୍ରଛାତ୍ରୀଙ୍କୁ ଖରାରେ ଛିଡା କରାଇବା କାରଣରୁ ସ୍କୁଲ ଅଧିକାରୀଙ୍କ ବିପକ୍ଷରେ ମାମଲା ରୁଜୁ କରାଯାଇଛି। କରୀମନଗରରେ ତେଲଙ୍ଗାନା ରାଷ୍ଟ୍ରୀୟ ସମିତିର କାର୍ଯ୍ୟକାରୀ ଅଧ୍ୟକ୍ଷ କେଟୀ ରାମାରାଓଙ୍କୁ ସ୍ୱାଗତ କରିବା ପାଇଁ ଶହେରୁ ଅଧିକ ସ୍କୁଲ ପିଲାଙ୍କୁ ଖରାରେ ୩ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ଛିଡା କରାଯାଇଥିବା ଅଭିଯୋଗରେ ପୋଲିସ ଏକ ପ୍ରାଇଭେଟ ସ୍କୁଲ ବିରୋଧରେ ମାମଲା ରୁଜୁ କରିଛି। ଛାତ୍ର-ଛାତ୍ରୀଙ୍କ ହାତରେ ପୋଷ୍ଟର-ବ୍ୟାନର ଦେଇ ଟିଆରଏସର ରାଲିକୁ ନିଆଯାଇଥିଲା। ଶିଶୁ ଅଧିକାର ସହ ଜଡିତ ଥିବା ଏକ ବେସରକାରୀ ସଂଗଠନର ଅଭିଯୋଗ ପରେ କରୀମନଗର ବନ ଟାଉନ ପୋଲିସ ସ୍କୁଲ ଅଧିକାରୀଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଛି। ଜିଲ୍ଲା ଶିକ୍ଷା ଅଧିକାରୀଙ୍କ ଅନ୍ତରୀଣ ତଦନ୍ତ ପରେ ପୋଲିସ କିଶୋର ନ୍ୟାୟ ଧାରା ୭୫ ଅନୁସାରେ ମାମଲା ରୁଜୁ କରିଛି। ରାଲିରେ ପିଲାମାନଙ୍କୁ ଶାରୀରିକ ନିର୍ଯାତନା ଦିଆଯାଇଥିବାର ମାମଲା ରୁଜୁ କରାଯାଇଛି। ମହିଳା ଏବଂ ଶିଶୁ କଲ୍ୟାଣ ବିକାଶ ବିଭାଗର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ଯେ ଟିଆରଏସ ନେତାଙ୍କ ସ୍ୱାଗତ ପାଇଁ ଶହେରୁ ଅଧିକ ପିଲାଙ୍କୁ ପୋଷ୍ଟର ବ୍ୟାନେର ସହ ସକାଳ ୧୧ ଟାରୁ ଆରମ୍ଭ କରି ଅପରାହ୍ନ ୨ ପର୍ଯ୍ୟନ୍ତ ଟାଣ ଖରାରେ ଛିଡା କରାଯାଇଥିଲା। ଏହି ସମୟରେ ପିଲାମାନଙ୍କୁ ଖାଇବା ଏବଂ ପିଇବା ପାଇଁ ମଧ୍ୟ ଦିଆଯାଇନଥିଲା।
