The Samikhsya Odia
ଭୁବନେଶ୍ବର: ପାଣିପାଗ ନେଇ ଆସିଛି ଏକ ବଡ ସୂଚନା। ତାହା ହେଲା ବର୍ତ୍ତମାନର ପାଣିପାଗ ସ୍ଥିତି ଅନୁସାରେ ଓଡିଶାର ପ୍ରବେଶ କରୁଛି ପଶ୍ଚିମା ଝଡ। ଏହାଦ୍ବାରା ୧୭ ତାରିଖ ବେଳକୁ ରାଜ୍ୟର ନଅଟି ଜିଲ୍ଲାରେ ବର୍ଷା ହେବ ବୋଲି ପାଣିପାଗ ବିଭାଗ କହିଛି।
ରାଜ୍ୟରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ଥିବା ଜିଲ୍ଲାଗୁଡିକ ହେଲା ସୁନ୍ଦରଗଡ, କେନ୍ଦୁଝର, ମୟୁରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ ଏବଂ ଢେଙ୍କାନାଳ ଜିଲ୍ଲା। ଏଥିସହିତ ଆଉ କେତକ ଜିଲ୍ଲାରେ ଗୋଟିଏ ରୁ ଦୁଇଟି ସ୍ଥାନରେ ହାଲୁକା ବର୍ଷା ସମ୍ଭାବନା ରହିଛି।
ଘରୋଇ ପାଣିପାଗ ସଂସ୍ଥା ସ୍କାଏମେଟ ପରେ ଭାରତୀୟ ପାଣିପାଗ ବିଭାଗ (ଆଇଏମ୍ଡି) ବୁଧବାର ଦିନ ଚଳିତ ବର୍ଷ ଦକ୍ଷିଣ-ପଶ୍ଚିମ ମୌସୁମୀ ବିଳମ୍ବରେ ପହଞ୍ଚିବା ନେଇ ପୂର୍ବାନୁମାନ କରିଛି। ଆଇଏମଡିର ପୂର୍ବାନୁମାନ ଅନୁସାରେ ଚଳିତ ବର୍ଷ ଜୁନ୍ ୬ରେ ମୌସୁମୀ କେରଳ ଛୁଇଁବ। ମୌସୁମୀ ପ୍ରାୟେ ସପ୍ତାହେ ବିଳମ୍ବରେ ପହଞ୍ଚିବ ବୋଲି ପାଣିପାଗ ବିଭାଗ ତରଫରୁ ସୂଚନା ରହିଛି। ଆସନ୍ତା ମେ ୧୮ ଓ ମେ ୧୯ ମଧ୍ୟରେ ମୌସୁମୀ ଆଣ୍ଡାମାନ – ନିକୋବର ଛୁଇଁବ ବୋଲି ଅନୁମାନ କରାଯାଉଛି। ତେବେ ବିଳମ୍ବରେ ମୌସୁମୀ ପହଞ୍ଚିଲେ ବି ଚଳିତ ବର୍ଷ ସ୍ବାଭାବିକ ବର୍ଷା ହେବ ବୋଲି ଆଶା କରାଯାଉଛି। ଜୁନ୍ ୨୯ରେ ଦିଲ୍ଲୀ-ଏନ୍ସିଆରରେ ମୌସୁମୀ ପହଞ୍ଚିବ ବୋଲି ଅନୁମାନ କରାଯାଇଛି।
ଭାରତର ପାଣିପାଗ ବିଭାଗ ମୌସୁମୀକୁ ନେଇ ନିଜର ଅଭିମତ ରଖିଛି। ଚଳିତ ଥର ମୌସୁମୀ ସ୍ବାଭାବିକ ହେବ ବୋଲି କୁହାଯାଇଛି। ଏହା ପୂର୍ବରୁ ଆମେରିକା ଓ ଅଷ୍ଟ୍ରେଲିଆ ସମେତ ଅନେକ ଦେଶର ପାଣିପାଗ ଏଜେନ୍ସି ସମେତ ଭାରତର ସ୍କାଇମେଟ୍ ମଧ୍ୟ ମୌସୁମୀ ଉପରେ ଏଲନିନୋର ପ୍ରଭାବ ରହିବ ବୋଲି ଆଶଙ୍କା ପ୍ରକାଶ କରିଥିଲେ। ମାତ୍ର ଭାରତୀୟ ପାଣିପାଗ ବିଭାଗ ମୁତାବକ ଚଳିତ ବର୍ଷ ମୌସୁମୀ ସ୍ଵାଭାବିକ ରହିବ। ମୌସୁମୀ ଉପରେ ଏଲନିନୋର ପ୍ରଭାବ ପଡ଼ିବ ନାହିଁ। ପାଣିପାଗ ବିଭାଗ ଅନୁମାନ ମୁତାବକ, ମୌସୁମୀ ସମୟରେ ଦେଶରେ ଲମ୍ବା ଅବଧିର ହାରାହାରି ୯୬ ପ୍ରତିଶତ ବର୍ଷା ହେବ। ତେବେ ଜୁନ୍ରୁ ସେପ୍ଟେମ୍ବର ମଧ୍ୟରେ ୪% କମ୍ ବର୍ଷା ହେବା ନେଇ ସୂଚନା ରହିଛି। ଦେଶରେ ୭୦ ଭାଗ ଜଳସେଚନ ବର୍ଷା ଉପରେ ହିଁ ନିର୍ଭରଶୀଳ।