ମୁମ୍ବାଇ : ଟିକ୍ଟକ୍ ୟୁଟ୍ୟୁବ୍ ଲଢେଇ ଏକ ଅଲଗା ସ୍ତରରେ ପହଞ୍ଚିଛି । ପୂର୍ବରୁ ୟୁଟ୍ୟୁବର କ୍ୟାରୀ ମିନାଟିଙ୍କ ରୋଷ୍ଟିଂ ଭିଡିଓ ୟୁଟ୍ୟୁବ୍ରୁ ହଟାଯାଇଥିବା ବେଳେ ଆଜି ଫୈଜଲ ସିଦ୍ଦିକିଙ୍କ ଟିକ୍ଟକ୍ ଆକାଉଣ୍ଟକୁ ବ୍ୟାନ୍ କରାଯାଇଛି । ଏସିଡ୍ ଆକ୍ରମଣକୁ ନେଇ କରାଯାଇଥିବା ଭିଡିଓ କାରଣରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଫୈଜଲଙ୍କର ପ୍ରାୟ13 ମିଲିୟନ୍ ଫଲୋଅର ରହିଛନ୍ତି ।
ପୂର୍ବରୁ ଫୈଜଲଙ୍କ ଭାଇ ତଥା ଟିକ୍ଟକର୍ ଆମିର ସିଦ୍ଦିକିଙ୍କୁ ଏକ ଭିଡିଓରେ ରୋଷ୍ଟ କରିଥିଲେ କ୍ୟାରୀ । ଏହି ଭିଡିଓଟି ନନ୍ ମ୍ୟୁଜିକାଲ୍ ବର୍ଗରେ ସବୁଠାରୁ ଅଧିକ ଲୋକ ଦେଖିଥିବା ବେଳେ ଆପତ୍ତି ଜନକ ଶବ୍ଦ ବ୍ୟବହାର କାରଣରୁ ୟୁଟ୍ୟୁବ୍ ପକ୍ଷରୁ ଏହି ଭିଡିଓଟିକୁ ହଟାଯାଇଥିଲା । ଏହାପରେ କ୍ୟାରୀଙ୍କ ସମର୍ଥକଙ୍କ ରୋଷର ଶିକାର ହୋଇଥିଲା ଟିକ୍ଟକ୍ । ପ୍ଲେ ଷ୍ଟୋରରେ ଟିକ୍ଟକ୍ର ରେଟିଂ 4.5ରୁ 2କୁ ଖସି ଆସିଥିଲା ।
