ନୂଆଦିଲ୍ଲୀ: ମହେନ୍ଦ୍ର ସିଂ ଧୋନି (ଏମଏସ ଧୋନି) ଜଣେ ଆଇପିଏସ ଅଧିକାରୀଙ୍କ ବିରୋଧରେ ମାଡ୍ରାସ ହାଇକୋର୍ଟରେ ପହଞ୍ଚିଛନ୍ତି। ଏଠାରେ ସେ ଅଧିକାରୀଙ୍କ ବିରୋଧରେ ଅପରାଧିକ ଅବମାନନା ଆବେଦନ କରିଛନ୍ତି। ଆଇପିଏଲ ବେଟିଂ ମାମଲାରେ ସୁପ୍ରିମକୋର୍ଟ ଦେଇଥିବା ଆଦେଶ ବିରୋଧରେ ମନ୍ତବ୍ୟ ଦେବା ପ୍ରସଙ୍ଗରେ ଏହି ପିଟିସନ ଦାଖଲ କରାଯାଇଛି।
ଧୋନି ଆଇପିଏଲ୍ ୨୦୧୩ ସ୍ପଟ୍ ଫିକ୍ସିଂ ଏବଂ ବେଟିଂ ଯାଞ୍ଚ କରିଥିବା ଆଇପିଏସ୍ ଅଧିକାରୀ ଜି ସମ୍ପତ କୁମାରଙ୍କ ବିରୋଧରେ ଏହି ଅବମାନନା ଆବେଦନ କରିଛନ୍ତି। ଏହା ସହିତ ଧୋନିଙ୍କ ବିରୋଧରେ ମ୍ୟାଚ୍ ଫିକ୍ସିଂ ଅଭିଯୋଗ ଆଣିଥିବାରୁ ସମ୍ପତ କୁମାରଙ୍କ ଠାରୁ ୧୦୦ କୋଟି କ୍ଷତିପୂରଣ ମାଗିଛନ୍ତି। ଶୁକ୍ରବାର ଦିନ ଏହି ମାମଲାର ଶୁଣାଣି ହେବାର ଥିଲା କିନ୍ତୁ ବର୍ତ୍ତମାନ ମଙ୍ଗଳବାର ଦିନ ଏହା ଶୁଣାଣି ହେବ।
ଧୋନି ୨୦୧୪ ମସିହାରେ ଜି ସମ୍ପତ କୁମାରଙ୍କ ଉପରେ ମାନହାନି ମକଦ୍ଦମା ଦାୟର କରିଥିଲେ। ସେହିବର୍ଷ ଧୋନିଙ୍କ ବିରୋଧରେ କୌଣସି ମନ୍ତବ୍ୟ ନଦେବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ତେବେ ଏହା ସତ୍ତ୍ୱେ ସମ୍ପତ କୁମାର ଏହି ମାମଲାରେ ସୁପ୍ରିମକୋର୍ଟରେ ଏକ ଆଫିଡେଭିଟ୍ ଦାଖଲ କରିଥିଲେ। ଧୋନିଙ୍କ ପକ୍ଷ କହିଛନ୍ତି ଯେ, ଏହି ଆଫିଡେଭିଟ୍ରେ ନ୍ୟାୟପାଳିକା ଏବଂ ମାଡ୍ରାସ ହାଇକୋର୍ଟଙ୍କ ବିରୋଧରେ ଅପମାନଜନକ ମନ୍ତବ୍ୟ ଦିଆଯାଇଛି। ବର୍ତ୍ତମାନ ଧୋନି ଏହି ଘଟଣାରେ କୋର୍ଟ ଅବମାନନା କରିଥିବାରୁ ସମ୍ପତ କୁମାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ଦାବି କରିଛନ୍ତି।
