କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ୱେଭେକ୍ସ ୨୦୨୫ର ଶୁଭାରମ୍ଭ କରିଛି। ଏହା ଗଣମାଧ୍ୟମ ଏବଂ ମନୋରଞ୍ଜନ କ୍ଷେତ୍ରରେ ଷ୍ଟାର୍ଟଅପଗୁଡ଼ିକୁ ପାଣ୍ଠି ଯୋଗାଣ ଏବଂ ଜାତୀୟ ପରିଚୟ ପ୍ରଦାନ କରିବା ଉଦ୍ଦେଶ୍ୟରେ ଏକ ଅଗ୍ରଣୀ ପଦକ୍ଷେପ। ଓ୍ୱେଭେକ୍ସ ୨୦୨୫ ଭାରତୀୟ ଇଣ୍ଟରନେଟ୍ ଓ ମୋବାଇଲ୍ ସଂଘ (ଆଇଏଏମଏଆଇ) ସହଭାଗିତାରେ ଆୟୋଜନ କରାଯିବ। ଆସନ୍ତା ମଇ ୧ରୁ ୪ ତାରିଖ ମୁମ୍ବାଇର ଜିଓ ୱାର୍ଲ୍ଡ କନଭେନ୍ସନ ସେଣ୍ଟର ଠାରେ ଆୟୋଜିତ ହେବାକୁ ଥିବା ବିଶ୍ୱ ଅଡିଓ-ଭିଜୁଆଲ ଓ ମନୋରଞ୍ଜନ ଶିଖର ସମ୍ମିଳନୀ (ୱେଭ୍ସ) ୨୦୨୫ର ଅଂଶବିଶେଷ ଭାବେ ଏହି କାର୍ଯ୍ୟକ୍ରମ ଆୟୋଜନ କରାଯାଉଛି।
ୱେଭେକ୍ସ ୨୦୨୫ ନୂଆ ପରିବର୍ତ୍ତନର ନେତୃତ୍ୱ ନେବା ଲାଗି ଭାରତୀୟ ଷ୍ଟାର୍ଟଅପଗୁଡ଼ିକ ପାଇଁ ସହାୟକ ହେବ। ଏହାଦ୍ୱାରା ଷ୍ଟାର୍ଟଅପ୍ମାନେ ସେମାନଙ୍କର ବ୍ୟବସାୟକୁ ବଢ଼ାଇବା ଲାଗି ସଠିକ ସୁଯୋଗ ଓ ନିବେଶ ପାଇପାରିବେ। ଷ୍ଟାର୍ଟଅପଗୁଡ଼ିକ ଉତ୍ସର୍ଗୀକୃତ ଅଧିବେଶନରେ ଉଦ୍ୟୋଗ ପୁଞ୍ଜିପତି ଏବଂ ସେଲିବ୍ରିଟି ଏଞ୍ଜେଲ ନିବେଶକଙ୍କ ନିକଟରେ ସେମାନଙ୍କ ଉପାୟର ପ୍ରସ୍ତାବ ଉପସ୍ଥାପନ କରିବାର ସୁଯୋଗ ପାଇବେ। ଏହି ପ୍ରକ୍ରିୟାକୁ ବ୍ୟାପକ ଜାତୀୟ ଟେଲିଭିଜନ କଭରେଜ୍ ଦିଆଯାଇ ସର୍ବାଧିକ ପ୍ରସାର ସୁନିଶ୍ଚିତ କରାଯିବ।
ୱେଭେକ୍ସ ୨୦୨୫ ଗେମିଂ, ଆନିମେସନ୍, ଏକ୍ସଟେଣ୍ଡେଡ ରିଅଲିଟି (ଏକ୍ସଆର), ମେଟାଭର୍ସ, ଜେନେରେଟିଭ୍ ଏଆଇ ଏବଂ ପରବର୍ତ୍ତୀ ପିଢ଼ିର କଣ୍ଟେଣ୍ଟ ବା ବିଷୟବସ୍ତୁ ପ୍ଲାଟଫର୍ମ ଉପରେ ଧ୍ୟାନ ଦେଇଥାଏ। ପାଣ୍ଠି ଯୋଗାଣ ବ୍ୟତୀତ, ଏହି କାର୍ଯ୍ୟକ୍ରମ ପରାମର୍ଶଦାତା, ନିବେଶକ ନେଟୱାର୍କିଂ ଏବଂ ପ୍ରମୁଖ ଗଣମାଧ୍ୟମ ଓ ପ୍ରଯୁକ୍ତିବିଦ୍ୟା ସଂସ୍ଥା ସହିତ ସହଯୋଗର ସୁଯୋଗ ପ୍ରଦାନ କରିଥାଏ। ଏହି କାର୍ଯ୍ୟକ୍ରମ ଉଦ୍ୟୋଗୀ, ଉଦ୍ୟୋଗ ପୁଞ୍ଜିପତି, ଏଞ୍ଜେଲ ନିବେଶକ ଏବଂ ଶିଳ୍ପ ନେତୃବର୍ଗଙ୍କୁ ଏକାଠି କରିବ। ଏହି ସୁଯୋଗ କେବଳ ପ୍ରତ୍ୟକ୍ଷ ପାଣ୍ଠି ସୁରକ୍ଷିତ କରିବାରେ ସାହାଯ୍ୟ କରିବ ନାହିଁ ବରଂ ବ୍ୟାପକ ବ୍ୟବସାୟ ଓ ସହଯୋଗ ସୁଯୋଗ ମଧ୍ୟ ସୃଷ୍ଟି କରିବ।
ୱେଭେକ୍ସ ୨୦୨୫ରେ ନିବେଶ ପ୍ରସ୍ତାବ ଉପସ୍ଥାପନ ଅଧିବେଶନର ଦୁଇଟି ମୋଡ ରହିବ। ଗୋଟିଏ ଅଧିବେଶନରେ, ଷ୍ଟାର୍ଟଅପଗୁଡ଼ିକ ଭେଞ୍ଚର୍ ପୁଞ୍ଜିପତି ଏବଂ ଏଞ୍ଜେଲ ନିବେଶକମାନଙ୍କ ଆଗରେ ସେମାନଙ୍କର ଉପସ୍ଥାପନ କରିବେ। ଅନ୍ୟଟିରେ, ମନୋନୀତ ଷ୍ଟାର୍ଟଅପଗୁଡ଼ିକ ସେମାନଙ୍କ ଉପାୟକୁ ସେଲିବ୍ରିଟି ଏଞ୍ଜେଲ ନିବେଶକଙ୍କ ଦଳ ଆଗରେ ଉପସ୍ଥାପନ କରିବେ। ଏହି କାର୍ଯ୍ୟକ୍ରମକୁ ଜାତୀୟ ଟେଲିଭିଜନରେ ବ୍ୟାପକ ଭାବେ ପ୍ରସାରଣ କରାଯିବ, ଯାହାଦ୍ୱାରା ଅଂଶଗ୍ରହଣକାରୀ ଷ୍ଟାର୍ଟଅପଗୁଡ଼ିକ ପାଇଁ ବ୍ୟାପକ ପ୍ରସାର ଏବଂ ସର୍ବାଧିକ ନିବେଶ ସୁଯୋଗ ସୁନିଶ୍ଚିତ ହେବ।
ୱେଭେକ୍ସ ୨୦୨୫ ପାଇଁ ଆବେଦନ ବର୍ତ୍ତମାନ ଖୋଲା ଅଛି। ଏହି କାର୍ଯ୍ୟକ୍ରମ ଏକ ବହୁ-ପର୍ଯ୍ୟାୟ ଚୟନ ପ୍ରକ୍ରିୟା ଅନୁସରଣ କରିବ ଯାହା ଏକ ଉଚ୍ଚକୋଟୀର ଟେଲିଭିଜନ ଫିନାଲେ ସହ ସମାପ୍ତ ହେବ। ଏଠାରେ ସବୁଠାରୁ ସମ୍ଭାବନାପୂର୍ଣ୍ଣ ଷ୍ଟାର୍ଟଅପ୍ ସିଧାସଳଖ ଶୀର୍ଷ ସେଲିବ୍ରିଟି ଏଞ୍ଜେଲ ନିବେଶକ ଏବଂ ଭିସିଙ୍କ ଆଗରେ ସେମାନଙ୍କର ପ୍ରସ୍ତାବ ଉପସ୍ଥାପନ କରିବେ। ଶିଳ୍ପ ବିଶେଷଜ୍ଞ, ନିବେଶକ ନେଟୱର୍କିଂ ସୁଯୋଗ ଏବଂ ପ୍ରମୁଖ ଗଣମାଧ୍ୟମ ଓ ପ୍ରଯୁକ୍ତିବିଦ୍ୟା ସଂସ୍ଥା ସହ ସମ୍ଭାବ୍ୟ ସହଯୋଗ ସହିତ ଢାଞ୍ଚାଗତ ପରାମର୍ଶଦାତା କାର୍ଯ୍ୟକ୍ରମରୁ ମନୋନିତ ଷ୍ଟାର୍ଟଅପ୍ ଉପକୃତ ହୋଇପାରନ୍ତି।
ୱେଭେକ୍ସର ଲକ୍ଷ୍ୟ ହେଉଛି, ଆର୍ଟିଫିସିଆଲ ଇଣ୍ଟେଲିଜେନ୍ସ ଦ୍ୱାରା ପରିଚାଳିତ ବିଷୟବସ୍ତୁ, ଡିଜିଟାଲ ମିଡିଆ ଏବଂ ଉଦୀୟମାନ ମନୋରଞ୍ଜନ ପ୍ରଯୁକ୍ତିବିଦ୍ୟାରେ ନବସୃଜନର ଲାଭ ଉଠାଇବା ସହିତ ଗଣମାଧ୍ୟମ-ପ୍ରଯୁକ୍ତି ଉଦ୍ୟୋଗ ବିକାଶ ପାଇଁ ଏକ ବିଶ୍ୱସ୍ତରୀୟ କେନ୍ଦ୍ର ଭାବେ ଭାରତର ସ୍ଥିତିକୁ ସୁଦୃଢ଼ କରିବା। ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ୱେଭ୍ସ ପାଇଁ ନୋଡାଲ ଅଧିକାରୀ ଆଲୋକପାତ କରି କହିଛନ୍ତି ଯେ ଏହି ପଦକ୍ଷେପ ଗଣମାଧ୍ୟମ-ପ୍ରଯୁକ୍ତି ନବସୃଜନରେ ଭାରତକୁ ଏକ ଅଗ୍ରଣୀ ଭାବରେ ଅବସ୍ଥାପିତ କରିବା ଦିଗରେ ଏକ ରଣନୀତିକ ପଦକ୍ଷେପ।
ଭାରତ ଡିଜିଟାଲ୍ ବିଷୟବସ୍ତୁ ଏବଂ ପ୍ରଯୁକ୍ତିବିଦ୍ୟାରେ ଏକ ବିଶ୍ୱସ୍ତରୀୟ ନେତା ଭାବରେ ନିଜର ସ୍ଥିତିକୁ ସୁଦୃଢ଼ କରିବା ଜାରି ରଖିଥିବାରୁ ୱେଭେକ୍ସ ୨୦୨୫ ଷ୍ଟାର୍ଟଅପ୍ ପାଇଁ ଶିଳ୍ପରେ ନିଜକୁ ପ୍ରତିଷ୍ଠିତ କରିବା ପାଇଁ ଏକ ପରିବର୍ତ୍ତନକାରୀ ସୁଯୋଗ ଉପସ୍ଥାପନ କରିଥାଏ। ଜାତୀୟ ସୁଯୋଗ, ପାଣ୍ଠି ଏବଂ ଶୀର୍ଷସ୍ତରୀୟ ପ୍ରଶିକ୍ଷଣ ଚାହୁଁଥିବା ଉଦ୍ୟୋଗୀମାନେ https://wavex.wavesbazaar.com/ ରେ ଆବେଦନ କରିପାରିବେ।