ନୂଆଦିଲ୍ଲୀ: ସ୍ୱାଧୀନତାର ୭୫ତମ ବର୍ଷ ଉପଲକ୍ଷେ ସାରା ଦେଶରେ ଆଜାଦୀ କା ଅମୃତ ମହୋତ୍ସବ ପାଳନ କରାଯାଉଛି। ଏହି ଅମୃତ କାଳରେ ଆସନ୍ତା ନଭେମ୍ବର ୨୦ରୁ ୨୮ ତାରିଖ ପର୍ୟ୍ୟନ୍ତ ଗୋଆଠାରେ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫଏଫଆଇ)ର ୫୨ତମ ସଂସ୍କରଣ ଆୟୋଜନ କରାଯିବ।
ଏହି ପରିପ୍ରେକ୍ଷୀରେ ଚଳଚ୍ଚିତ୍ର ନିର୍ମାଣ କ୍ଷେତ୍ରରେ ଦେଶର ୭୫ ଜଣ ସୃଜନଶୀଳ ପ୍ରତିଭାମାନଙ୍କୁ ମଞ୍ଚ ପ୍ରଦାନ କରିବା ଉଦ୍ଦେଶ୍ୟରେ ‘୭୫ କ୍ରିଏଟିଭ୍ ମାଇଣ୍ଡସ୍ ଅଫ୍ ଟୁମୋରୋ’ ପ୍ରତିଯୋଗିତା ଆୟୋଜନ କରାଯିବ। ଆଇଏଫଏଫଆଇ ଏସିଆ ମହାଦେଶର ସବୁଠୁ ପୁରୁଣା ଏବଂ ସର୍ବବୃହତ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ। ତେଣୁ ସୂଚନା ପ୍ରସାରଣ ମନ୍ତ୍ରଣାଳୟ ପକ୍ଷରୁ ଆରମ୍ଭ କରାଯାଇଥିବା ଏହି ପ୍ରତିଯୋଗିତା ମାଧ୍ୟମରେ ସାରା ଦେଶର ୭୫ ଜଣ ଯୁବ ପ୍ରତିଭାଶାଳୀ ଚଳଚ୍ଚିତ୍ର ନିର୍ମାତା ସେମାନଙ୍କର କଳା ଓ ସୃଜନଶୀଳତା ପ୍ରଦର୍ଶନ ନିମନ୍ତେ ଆବଶ୍ୟକ ସୁଯୋଗ ପାଇପାରିବେ। ପ୍ରତିଯୋଗିତା ପାଇଁ ଦେଶର ବିଭିନ୍ନ ସ୍ଥାନରୁ ୭୫ ଜଣ ସୃଜନଶୀଳ ପ୍ରତିଭାମାନଙ୍କୁ ଚୟନ କରାଯିବ। ସେମାନଙ୍କୁ ଗୋଆରେ ଅନୁଷ୍ଠିତ ହେବାକୁ ଥିବା ୫୨ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ଅଂଶଗ୍ରହଣ କରିବା ଲାଗି ଆମନ୍ତ୍ରଣ କରାଯିବ।
ଅତିକମରେ ଦୁଇଟି କ୍ଷୁଦ୍ର ଚଳଚ୍ଚିତ୍ର/ଅଡିଓ (ଫିଚର/ଅଣଫିଚର) ମାଧ୍ୟମରେ ଏହି ପ୍ରତିଭାମାନେ ସେମାନଙ୍କର କଳାକୌଶଳ ପ୍ରଦର୍ଶନ କରିବେ। ଚଳଚ୍ଚିତ୍ର ନିର୍ଦ୍ଦେଶନା, ଏଡିଟିଂ, ସିନେମାଟୋଗ୍ରାଫୀ, ସାଉଣ୍ଡ ରେକର୍ଡିଂ, ଅଭିନୟ, ପ୍ରଚ୍ଛଦ ପଟ୍ଟ ଗାୟନ, ପ୍ରଡକ୍ସନ ଡିଜାଇନ କିମ୍ବା ଚିତ୍ରନାଟ୍ୟ ରଚନା କ୍ଷେତ୍ରରେ ସେମାନଙ୍କୁ ନିଜର ପ୍ରତିଭା ଓ କୌଶଳ ପ୍ରଦର୍ଶନ କରିବା ଲାଗି ସୁଯୋଗ ଦିଆଯିବ। ପ୍ରତିଯୋଗିତାରେ ଭାଗ ନେବାକୁ ଚାହୁଁଥିବା ପ୍ରତିଯୋଗୀମାନେ ଶେଷ ତାରିଖ ଅର୍ଥାତ୍ ଅକ୍ଟୋବର ୩୦ ତାରିଖ ସୁଦ୍ଧା ସେମାନଙ୍କର ଆବେଦନପତ୍ର ପଠାଇପାରିବେ।
ଏଥିରେ ଭାଗ ନେବା ଲାଗି ସର୍ବାଧିକ ବୟସ ସୀମା ୩୫ ବର୍ଷ ରଖାଯାଇଛି। ବିଶିଷ୍ଟ ବିଚାରକମାନେ ଆବେଦନକାରୀମାନଙ୍କ ଆବେଦନର ବିଚାର କରି ପ୍ରତିଯୋଗିତା ନିମନ୍ତେ ଚୟନ କରିବେ। ଏ ସମ୍ପର୍କରେ ଅଧିକ ବିସ୍ତୃତ ବିବରଣୀ ଏବଂ ଆବେଦନପତ୍ର https://dff.gov.in/images/News/[email protected] ରେ ଉପଲବ୍ଧ।